ވާނުވާ ބަންދުގައި ތިބި މީހުންނަށް އިންސާފު ލިބެންޖެހޭ ކަމަށާ، އެކަމުގެ މަސައްކަތް ފަށާފައިވާ ކަމަށް ރައީސުލްޖުމުހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ. 

އައްޑޫސިޓީއަށް ކުރަވަމުންދާ ދަތުރުފުޅުގެ ތެރެއިން ރޭ ފޭދޫގެ ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައި ރައީސް މުޢިއްޒު ވިދާޅުވީ، މި ސަރުކާރަކީ ޢަދުލުވެރިކަން ގާއިމް ކުރާނެ ސަރުކާރެއް ކަމަށެވެ. އަދި ކުޑަ މީހެއް ނަމަވެސް ބޮޑު މީހެއް ނަމަވެސް، އެއްވެސް މީހަކަށް އަނިޔާވެރި ނުވާނެ ކަމަށެވެ. 

އެހެންކަމުން، ޝަރީޢަތް ނުނިމި ތިބި މީހުން، ނުވަތަ ވާނުވާ ބަންދުގައި ތިބި މީހުންނަށްވެސް އިންސާފު ލިބެންޖެހޭ ކަމަށް އެމަނިކުފާނު ވިދާޅުވި އެވެ.

Advertisement

އެކިއެކި ކުށްތަކުގެ ތަޙްޤީޤުގައި، "ވާނުވާ"ގައި، ބަންދުކޮށްފައި ތިބޭ ތިބުން ނިމުމަކަށް ގެނައުމަކީ، ރިޔާސީ އިންތިޚާބުގައި ރައީސް މުޢިއްޒު ވެވަޑައިގެންނެވި ވަޢުދެކެވެ. އަދި އެ ވަޢުދު ފުއްދުމުގެ މަސައްކަތް މިމަހު ފަށްޓަވާނެ ކަމަށް އެމަނިކުފާނުގެ ރިޔާސީ ބަޔާނުގައި ވަނީ ވިދާޅުވެފަ އެވެ. 

"އެކިއެކި ކުށްތަކުގެ ތަޙްޤީޤުގައި، "ވާނުވާ"ގައި، އާދެ، ވަކި މުއްދަތެއްނެތި ބަންދުކޮށްފައި ތިބުން ނިމުމަކަށް ގެނައުން، އެއީ ރިޔާސީ އިންތިޚާބުގައި އަޅުގަނޑުވީ ވަޢުދެއް. ތަޙްޤީޤަށް ހައްޔަރުކޮށްފައި "ވާނުވާ"ގައި ބޭތިއްބުން ނިމުމަކަށް ގެނައުމުގެ މަސައްކަތް މި މަހު ފަށާނަން. އަދި ރައްޔިތުންގެ މަޖްލީހުގެ މި ފެށޭ ދައުރުތެރޭގައި ޤާނޫނަށް އިޞްލާޙު ހުށަހަޅާނަން." ރައީސުލްޖުމްހޫރިއްޔާގެ ރިޔާސީ ބަޔާނުގައި ވިދާޅުވި އެވެ. 

ރައީސް މުޢިއްޒު ވިދާޅުވީ، އެ ގާނޫނު އެކުލަވައިލެވި ތަސްދީގު ކުރެވުމުން ވާނުވާ ބަންދުގައި ތިބެންޖެހޭ ތިބުމަށް ތާ އަބަދަށް ނިމުމެއް އަންނާނެ ކަމަށެވެ.