ނިމިދިޔަ ރައީސް އިބްރާހިމް މުހައްމަދު ޞާލިހު ގެ ސަރުކާރުން އެކުލަވާލި ފޮރިން އެކްސްޗޭންޖް ރިފޯމް ސިޔާސަތު ތަންފީޒުކުރުމަށް އިދިކޮޅު އެމްޑީޕީން ގޮވާލައިފިއެވެ.
މިމަހު ރައީސް ޑރ.މުއިއްޒު ދެއްވި އެމަނިކުފާނުގެ ފުރަތަމަ ރިޔާސީ ބަޔާނަށް ރައްދު ދެއްވަމުން މަޖިލީހުގެ މެޖޯރިޓީ އޮންނަ ޕާޓީ، އެމްޑީޕީގެ ޕީޖީ ލީޑަރު އަދި އަލިފުށީ ދާއިރާގެ މެމްބަރު މުހައްމަދު ރަޝީދު ހުސެއިން (ބިގޭ) ވިދާޅުވީ ރާއްޖެއަށް ބޭރު ފައިސާ ލިބުން ދަތިވެ އެކަމުގެ ސަބަބުން މާކެޓަށް އަންނަ ބަދަލުތަކަކީ ކަންބޮޑުވުމެއް ކަމަށެވެ.
ރިޔާސީ ބަޔާން އިއްވަމުން ރައީސް ޑރ.މުއިއްޒު ވިދާޅުވެފައިވާ މި ސަރުކާރުން ބޭރު ފައިސާ ހޯއްދަވަމުން ގެންދަވާ އާ ގޮތް ތަކުގެ ވާހަކަތައް ފާހަގަކުރައްވަމުން ބިގޭ ވަނީ މިކަމަށް އިތުރު ވަގުތު ހޭދަ ނުކުރެއްވުމަށް ގޮވާލައްވާފައެވެ. އަދި އެއް ސަރުކާރުން ކުރާ ކޮންމެ ކަމެއް ބޮލާލައި ޖެހުމުގެ ދިގު މާޒީއަށް ބޮޅެއް އިތުރުނުކުރެއްވުމަށް ރަޝީދު އެދިވަޑައިގެންނެވިއެވެ.
"މިކަމުގައި ރާއްޖޭގެ މާލީ އިދާރާތަކާއ,ި ބޭރުގެ އިދާރާތަކުގެ މަޝްވަރާއާއެކު ފޮރިން އެކްސްޗޭންގެ ރިފޯމް ސްޓްރެޓަޖީ އެކުލަވާލައި ނިމިދިޔަ ކެބިނެޓްގެ އެންޑޯޒްމަންޓްވެސް ވަނީ ހޯދާފައި. ރައީސް މިއަދު ކުރައްވަންވީ ކަމަކީ އެކަން ތަންފީޒުކުރެއްވުން."
ރަޝީދު ވިދާޅުވިއެވެ.
ރަޝީދު މިފަދައިން ވިދާޅުވި ނަމަވެސް ކުރީ ސަރުކާރުން އެކުލަވާލި ފޮރިން އެކްސްޗޭންޖް ރިފޯމް އާއި ގުޅޭ އިތުރު ތަފްސީލެއް އެބޭފުޅާގެ ވާހަކައިގައި ހާމަކުރައްވާފައެވެ ނުވެއެވެ.
ރާއްޖެ އަށް ކުރިމަތިވެފައިވާ ޑޮލަރު ލިބުމުގެ މައްސަލަ ހައްލު ކުރުމަށް ކަމާބެހޭ ފަރާތްތަކާއި ގުޅިގެން ހަރުދަނާ ފިޔަވަޅު ތަކެއް އަޅަމުން އަންނަ ކަމަށް ސަރުކާރުން ބުނެއެވެ. އަދި ދިވެހި ރާއްޖޭގެ މާލީ އަދި އިގްތިސާދީ ހާލަތު ރަނގަޅުކޮށް، ދަރަނީގެ ހިރާސްތައް ކުޑަކޮށް، ބޭރު ފައިސާ ލިބުމުގެ މަގުތައް ސަރުކާރުން ފަހި ކުރަމުންދާ ކަމަށް ވެސް ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
