ހިތަދޫ-ހުޅުމީދޫ ގުޅުވާލާ ރާއްޖޭގެ އެންމެ ބޮޑު ބްރިޖްގެ މަޝްރޫއުގައި ސޮއިކޮށް، މިސްރުގެ ކުންފުންޏެއް ކަމަށްވާ "ދަ އަރަބް ކޮންޓްރެކްޓާސް - އޮސްމާން އަހުމަދު އޮސްމާން އެންޑް ކޯ" އާ މިއަދު ހަވާލުކޮށްފި އެވެ.
އައްޑޫ ސިޓީގައި ބްރިޖް އެޅުމަކީ ރައީސް ޑރ.މުއިއްޒު ގެ ރިޔާސީ ވައުދުފުޅަކަށް ވާއިރު، އެ މަޝްރޫއުގައި މިއަދު ސޮއިކުރީ އިންތިހާބަށް ފަހު އެމަނިކުފާނު އައްޑުއަށް ކުރެއްވި ފުރަތަމަ ދަތުރުފުޅުގައި، ހުޅުދޫ ރައްޔިތުންނާ އެކު އޮތް ބައްދަލުވުމުގަ އެވެ.
މި ރަސްމިއްޔާތުގައި ބްރިޖުގެ ސާވޭ އަދި ޕްލިމިނަރީ ޑިސައިން މަސައްކަތުގެ އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ އިމާރާތް ކުރުމާއި ބިނާރާ ބެހޭ ވަޒީރު ޑރ. އަބްދުالله މުއްޠަލިބެވެ. އަދި އަރަބް ކޮންޓްރެކްޓަރސްގެ ފަރާތުން ސޮއިކުރެއްވީ އެ ކުންފުނީގެ ބޯޑު މެންބަރު، ހީބާ އަހުމަދުއެވެ.
މި ރަސްމިއްޔާތުގައި ވާހަކަފުޅު ދައްކަވަމުން ވަޒީރު މުއްޠަލިބު ވިދާޅުވީ އައްޑޫ ސިޓީގައި އަޅާ ބްރިޖަކީ އެންމެ މަދުވެގެން 14 ކިލޯމީޓަރުގެ ބްރިޖަކަށް ވާނެ ކަމަށެވެ. އަދި ރައީސް ޑރ.މުއިއްޒު ސަރުކާރާ ހަވާލުވެވަޑައިގެން، އެ ބްރިޖުގެ މަޝްރޫއު އިއުލާން ކުރެއްވުމާއެކު ގިނަ ބަޔަކު ޝައުގުވެރިކަން ފާޅު ކުރި ކަމަށާއި އޭގެ ތެރޭގައި ޗައިނާގެ ބޮޑެތި ކުންފުނިތައް ވެސް ހިމެނޭ ކަމަށެވެ. ނަމަވެސް އަރަބް ކޮންޓްރެކްޓާސްއާ މަޝްރޫއު ހަވާލު ކުރެއްވުމަށް ނިންމެވީ އެ ކުންފުނިން މުޅި މަޝްރޫއު އެއްކޮށް ނިންމަން ޝައުގުވެރިކަން ފާޅުކޮށްފައިވާތީ ކަމަށް ވަޒީރު މުއްޠަލިބު ވިދާޅުވިއެވެ.
މިކަމާއި ގުޅިގެން އައްޑޫ ސިޓީގެ މޭޔަރ އަލީ ނިޒާރު ވިދާޅުވީ މިސަރުކާރުން އެންމެ އިސްކަންދެއްވައިގެން އައްޑޫ ބްރިޖް މަޝްރޫއު ފެއްޓެވުމަކީ، ސަރުކާރުން އައްޑޫ ސިޓީއަށް ގެންގުޅުއްވާ ތަސައްވުރު ހާމަގެންދާ ކަމެއްކަމަށެވެ. އަދި އައްޑޫ ބްރިޖް މަޝްރޫއު ވެގެންދާނީ އުމްރާނީ ބިނާތަކުން ދުނިޔޭގެ ބޮޑެތި ސަހަރުތައް ބަދަލުކޮށްލި ފަދަ މަޝްރޫޢަކަށް ކަމަށްވެސް ނިޒާރު ވަނީ ވިދާޅުވެފައެވެ.
"ރައީސް ޑރ.މުޢިއްޒު އައްޑޫގައި ބްރިޖް އަޅުއްވާނެ. އެ ޔަގީންކަން ލިބެނީ ރައީސް ޚުދު އެޔަގީންކަން ދެއްވާތީ، އެހާމެ ކެރިގެން އެވާހަކަ ވިދާޅުވާތީ. ރައީސް ވިދާޅުވާ ބަހުގެ ޔަގީންކަން އެބައޮތް."
ނިޒާރު ވިދާޅުވިއެވެ.
ހިތަދޫ އާއި ހުޅުމީދޫ ގުޅާލުމަށް އަޅާ ބްރިޖުގެ ދިގު މިނަކީ އެންމެ މަދުވެގެން 14 ކިލޯ މީޓަރެވެ. ރާއްޖޭގައި ފުރަތަމަ އެޅި ސިނަމާލެ ބްރިޖުގެ ދިގު މިނަކީ 1.3 ކިލޯ މީޓަރެވެ. މާލެ އާއި ވިލިމާލެ އަދި ތިލަފުށި ގުޅާލުމަށްޓަކައި އަޅަމުންދާ ބްރިޖުގެ ދިގުމިނަކީ 6.7 ކިލޯ މީޓަރެވެ. އެހެންކަމުން މިއީ މިހާތަނަށް ރާއްޖޭގައި އަޅާ އެންމެ ބޮޑު ބްރިޖެވެ.
މި އަހަރުގެ ބަޖެޓުގައި ހިތަދޫ-ހުޅުމީދޫ ބްރިޖުގެ ސާވޭ ހެދުމަށް 30 މިލިއަން ރުފިޔާ ހިމަނާފައިވީ ނަމަވެސް ދަ އަރަބް ކޮންޓްރެކްޓާސް އިން އެ މަސައްކަތް ހިލޭ ކޮށްދޭން ޝައުގުވެރިކަން ވަނީ ފާޅުކޮށްފައިކަމަށް ރައީސް އޮފީހުގެ ޕަބްލިކް ޕޮލިސީ ސެކްރެޓަރީ އަބްދުالله ނާޒިމް ވަނީ މީގެ ކުރިން ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
