މޯލްޑިވްސް މަނިޓަރީ އޮތޯރިޓި (އެމްއެމްއޭ) އިން އަތޮޅުތެރޭގެ ސުކޫލުތަކަށް އަމާޒުކޮށް ލެކްޗާ ސީރީސް އެއް ފަށައިފިއެވެ.

މި ސީރީސް ގެ ތެރެއިން އެމްއެމްއޭ އިން ފުރަތަމަ ސެޝަން ކުރިއަށް ގެންދިޔައީ ޏ. ފުވައްމުލަކު ގައެވެ. ފުވައްމުލަކު އަތޮޅު ތައުލީމީ މަރުކަޒުގައި އެމްއެމްއޭ އިން ކުރިއަށް ގެންދިޔަ ސެޝަންގައި އެ ސްކޫލްގެ ސާނަވީ ގްރޭޑްތަކުގެ ބައެއް ދަރިވަރުން ބައިވެރިވި އެވެ.

މިސެޝަންގައި އެމްއެމްއޭ ގެ ގަވަރުނަރު އަލީ ހާޝިމް ވެސް ވަނީ ބައިވެރިވެ ވަޑައިގެން،  އެ މަނިކުފާނުގެ ތަޖުރިބާ ދަރިވަރުންނާ ހިއްސާކޮށް ދަރިވަރުންގެ ފަރާތުން ގަވަރުނަރަށް ހުށަހެޅުނު އެކި ސުވާލުތަކަށް ޖަވާބު ދެއްވާފަ އެވެ.

މިލެކްޗާ ސީރީސް ގެ ތެރެއިން އެމްއެމްއޭ އިން ދަރިވަރުންނަށް މައުލޫމާތުދޭ ދާއިރާތަކުގެ ތެރޭގައި ރާއްޖޭގެ އިގްތިސާދީ އަދި މާލީ ދާއިރާ ގެ އިތުރުން މާލީ ހޭލުންތެރިކަމާއި ފަހަށް ރައްކާކުރުމުގެ މުހިއްމުކަން ހިމެނެއެވެ.

މިއީ މާލޭގައި ބޭއްވޭ މި ފަދަ ޕްރޮގްރާމުތަކުގައި ރަށްރަށުގެ ސްކޫލްތަކުން ބައިވެރިވުމުގައި ހުރި ދަތިކަން ފާހަގަކުރެވިފައިވާތީ، އެމްއެމްއޭ އިން ކުރިއަށް އޮތްތަނުގައި ރާއްޖޭގެ ހުރިހާ އަތޮޅެއްގައި ވެސް އެކި ދުވަސް މަތިން ކުރިއަށް ގެންދިޔުމަށް ކަނޑައަޅާފައިވާ ސެޝަން ތަކެކެވެ.