ރާއްޖޭގެ އެއްނަމްބަރު ޓޭބަލް ޓެނިސް ކުޅުންތެރިޔާ ފާތުމަތު ދީމާ އަލީ ކްރޮއޭޝިއާގައި ކުރިއަށްދާ މުބާރާތަކުން ފާހަގަކޮށްލެވޭ ފަދަ ބޮޑު ކާމިޔާބީއެއް ހޯދައިފިއެވެ.

އެގޮތުން ދީމާވަނީ މިހާރު ކްރޮއޭޝިއާގައި ފުރިހަމަ ކުރަމުންދާ ތަމުރީނުގެ ތެރެއިން އުމުރުފުރާތަކަށް ވަކިން ވާދަކުރެވޭ ގޮތަށް އެ ޤައުމުގައި ބޭއްވުނު ޑުބެނިކް މެމޯރިއަލް މުބާރާތުގެ 17 އަހަރުންދަށުގެ އުމުރުފުރާގެ ބައިން ފަޙްރުވެރި 2 ވަނަ ހޯދާފައެވެ.

ކްރޮއޭޝިއާގެ ޑޫގޯ ސެލޯ ސިޓީގައި ކުރިއަށް ދިޔަ މި މުބާރާތުގެ ފައިނަލުގައި ދީމާ ބަލިވެފައިވަނީ ، ދުނިޔޭގެ ނިސްބަތުން ޓީޓީގައި ފާހަގަކޮށްލެވޭ ޤައުމެއް ކަމަށްވާ ޕޮލެންޑްގެ ކުޅުންތެރިއެއްގެ އަތުންނެވެ.

Advertisement

ރާއްޖޭގެ ތާރީހުގައިވެސް މިހާތަނަށް އުފެދުނު އެންމެ މޮޅު ޓީޓީ ކުޅުންތެރިޔާކަމަށް ގިނަ ބަޔަކު ބުނަމުން އަންނަ ދީމާ ކްރޮއޭޝިއާގައި މިވަގުތު ހުރީ އޮލިމްޕިކް ކޮމިޓީގެ ޓްރޭނިން ސްކޮލާޝިޕެއްގެ ދަށުން ލިބުނު ފުރުޞަތެއްގެ ދަށުން ތަމްރީނުތަކެއް ފުރިހަމަ ކުރުމަށެވެ.

އެގޮތުން ދީމާ ތަމްރީނުތައް ފުރިހަމަކުރަމުން އަންނަނީ ކްރޮއޭޝިއާގައި ކުލަބުތަކުގެ ކޯޗުންގެ ބެލުމުގެ ދަށުންނެވެ. އޭގެއިތުރުން އިންޑިއަން އޯޝަން އައިލެންޑް ގޭމްސްގައި ރާއްޖޭގެ ގައުމީ ޓީމުގެ ކޯޗުގެ ގޮތުގައި މަސައްކަތް ކުރި ޒެވޯނިމިރް ކޮރެނިޗްގެ ޓްރޭނިންތަކުގައި ވެސް ހަފުތާއަކު ތިން ފަހަރު ދީމާ ބައިވެރިވަމުންދާކަމަށް މަޢުލޫމާތު ލިބެއެވެ.

ދީމާ ފާހަގަ ކުރެވިފައިވަނީ ކުޅިވަރުގެ ރޮނގުން މިހާތަނަށް ރާއްޖެއަށް އެންމެ ގިނަ ކާމިޔާބީތައް ހޯދައިދީފައިވާ އެއް ކުޅުންތެރިޔާގެ ގޮތުގައެވެ. އެގޮތުން ދީމާވަނީ އިންޑިއަން އޯޝަން އައިލެންޑު ގޭމްސް އިންވެސް ރާއްޖެއަށް ރަންމެޑެލް ހޯދައިދީފައެވެ.

މި ސަރުކާރު ވެރިކަމަށް އައުމަށްފަހު ބުނެފައިވަނީ މިފަދަ ހުނަރުވެރި ޒުވާން ކުޅުންތެރިންނަށް ދުނިޔޭގެ އެންމެ ރަނގަޅު ތަމްރީނާއި ތަޖުރިބާ ހޯދައިދެއްވުމަށް މަސައްކަތް ކޮށްދެއްވާނެ ކަމަށެވެ.