ނިމިދިޔަ ސަރުކާރުން އެންމެފަހު ވަގުތު ހިންގި ބިންވެރިޔާ ސްކީމުގެ ދަށުން ގިރާވަރުފަޅުން ގޯތި ލިބުނު ފަރާތްތަކުގެ ގޯތި ގުޅީފަޅަށް ބަދަލުކުރުމުގެ ފުރުސަތު އެބައޮތް ކަމަށާއި އެކަމާ މެދު ވަރަށް ފުންކޮށް ވިސްނަވަމުން ގެންދަވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
އެމަނިކުފާނު މިފަދައިން ވިދާޅުވެފައި ވަނީ އާއްމު ރައްޔިތުންގެ ސުވާލުތަކަށް ޖަވާބުދެއްވުމަށް ކުރިއަށް ގެންދަވާ "ރައީސްގެ ޖަވާބު" ސިލްސިލާ ޕްރޮގްރާމުގެ ދަށުން ހުޅުމާލެ، ފްލެޓް 159204، އާމިނަތު ލީލާ ކުރެއްވި ސުވާލަށް ޖަވާބު ދެއްވަމުންނެވެ.
އާމިނަތު ލީލާގެ ސުވާލު އަމާޒުކުރެއްވީ ގިރާވަރުފަޅުން ގޯތި ލިބުނު ފަރާތްތަކުގެ ގޯތި ގުޅީފަޅަށް ނުވަތަ ހުޅުމާލެ ފަޅަށް ބަދަލުކުރެވިދާނެ ފުރުޞަތެއް އޮތްތޯބެލުމުގެ މައްޗަށެވެ.
ލީލާގެ ސުވާލަށް ޖަވާބު ދެއްވަމުން ރައީސް ވިދާޅުވީ ގިރާވަރު ފަޅުން ގޯތި ލިބުނު ގިނަ ބައެއްގެ ފަރާތުން އެ ސުވާލު ލިބެމުން އަންނަ ކަމަށާއި، އަދި އެކަމަށް ވަކި ގޮތެއް ނުނިންމަވާ ކަމަށެވެ.
"ތި ސުވާލު އަޅުގަނޑުމެންނަށް އެބަ ކުރިމަތި ކުރައްވާ ބައެއް ބައެއް އެހެން ބޭފުޅުންވެސް. ގިރާވަރުފަޅުން ގޯތިލިބުނު ބައެއް ބޭފުޅުން ހަމަ ތިސުވާލު އެބަ ކުރައްވާ. އަދި ތިކަމަށް ވަކި ގޮތެއް ނުނިންމޭ. ތިކަމަކީ ހަމަ ފުރުސަތު އޮތް ކަމެއް ނަމަވެސް އަދި ސިޔާސަތެއް ކަނޑަނޭޅޭ."
ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވިއެވެ.
ރައީސް އިތުރަށް ވިދާޅުވި ގޮތުގައި ގިރާވަރުފަޅުން ގޯތި ލިބުނު މީހުންނަށް ގުޅީފަޅުން ޖާގަ ލިބިދާނެތޯ ނުވަތަ ނުންތޯ ނިންމަވާނީ، އެ ދެ ތަނުގެ ލޭންޑް ޔޫސް ޕްލޭން ނިމުމުން ކަމަށާއި، މިހާރު އެ މަސައްކަތް އޮތީ ފައިނަލް ކުރުމުގެ މަސައްކަތުގައި ކަމަށެވެ.
"އެހެންވީމަ ގިރާވަރުފަޅުން ގޯތި ލިބުނު މީހުންނަށް ގުޅީފަޅުން ގޯތި ހަމަޖެހުމަކީ ފުރުސަތު އޮތް ކަމެއްގެ ގޮތުގައި ބައްލަވާ، އަޅުގަނޑުމެން ތިހިޔާލުފުޅަށް ތިޔަސުވާލަށް ވަރަށް ބޮޑަށް ސީރިއަސްކޮށް އެޓެންޑް ވަމުންދާ ވާހަކަ ދަންނަވަން. އިރާދަކުރެއްވިއްޔާމުން ތިޔަށް ވަރަށް އަވަހަށް ޖަވާބެއް ދޭނަން،"
ރައީސުލްޖުމުހޫރިއްޔާ ވިދާޅުވިއެވެ.
ރައީސުލްޖުމުހޫރިއްޔާ މިފަދައިން ވިދާޅުވެފައިވާއިރު ގިރާވަރު ފަޅާއި ގުޅީފަޅު ހިއްކުމުގެ މަޝްރޫއަށް މި ސަރުކާރު ވަނީ ބަދަލުގެނެސް ކުރިން ހިއްކުމަށް ހަމަޖެހިފައިވާ ވަރަށް ވުރެ ބޮޑުކޮށް ހިއްކުމަށް ނިންމާފައެވެ.
ރައީސް ޑރ.މުހައްމަދު މުއިއްޒުގެ އެންމެ ބޮޑު ވައުދަކީ އެމަނިކުފާނުގެ ވެރިކަމުގެ ފަސް އަހަރުގެ ދަޢުރު ނިމިގެންދާއިރު ރާއްޖެގެ އެންމެހާ ރައްޔިތުންނަށް ބޯހިޔާވަހިކަން ހޯއްދަވައި ދެއްވުމެވެ.
Advertisement
This content is created and paid for by advertisers and does not involve Voice Journalists
