ހުވަދު އަތޮޅު ދެކުނުބުރި، ގދ. ތިނަދޫ ސިޓީގައި އިންޓަނޭޝަނަލް އެއާރޕޯޓެއް އެޅުމަށް މިރޭ ސޮއިކުރެވިއްޖެއެވެ.

މި އެއްބަސްވުމުގެ ސޮއިކުރުމުގެ ރަސްމީޔާތު ބާއްވާފައިވަނީ މިހާރު ރައީސުލްޖުމްހޫރިއްޔާ އުތުރުގެ އަތޮޅުތަކަށް ކުރައްވަމުން ގެންދަވާ ދަތުރުފުޅުގައި މިރޭ ތިނަދޫ ރައްޔިތުންނާއި ބައްދަލުކުރެއްވުމަށް އެރަށުގައި ބޭއްވި ބައްދަލުވުމުގެ ތެރެއިންނެވެ.

ތިނަދޫގައި މިރޭ ބޭއްވި ޖަލްސާގައި އެކަމުގެ އެއްބަސްވުމުގައި، ރައީސުލްޖުމުހުރިއްޔާ ޑރ. މުހައްމަދު މުއިއްޒުގެ ކުރިފުޅުމަތީގައި ދިވެހި ސަރުކާރުގެ ފަރާތުން ސޮއިކުރެއްވީ އިމާރާތްކުރުމާއި ބިނާރާ ބެހޭ ވަޒީރު ޑރ. އަބްދުﷲ މުއްތަލިބެވެ.

Advertisement

މި މަޝްރޫއުގެ މަސައްކަތް ކުރިއަށްގެންދަން ހަވާލު ކޮށްފައިވާ ތައިލެންޑުގެ ޕޭން ޕެސިފިކް ކޮމްޕެނީ ލިމިޓެޑްގެ ފަރާތުން ސޮއިކުރެއްވީ ސީއީއޯ މރ. ޖިރާޓް ޕެތްނުންތަވޮންގއެވެ.

މިރޭގެ ޖަލްސާގައި ވާހަކަދައްކަވަމުން ވަޒީރު މުއްޠަލިބު ވިދާޅުވީ މިރޭ މި ސޮއިކުރެވުނު އެއްބަސްވުމުގެ ދަށުން ތިނަދޫއަށް އަދި މުޅި ގދ.އަތޮޅަށް މިއިން ދުވަހަކު ނާންނަވަރުގެ ބޮޑުތަރައްޤީއަކާއި ކުރިއެރުމެއް ލިބިގެންދާނެ ކަމަށެވެ. 

އެގޮތުން އެ ސަރަހައްދުގައި ޔޮޓް މެރީނާއެއް ޤާއިމު ކުރެވި ، ސީޕްލޭން ހަބެއް ހެދި، މިތަނުގައި ފްލައިންގ ސްކޫލަކާއި، ކާގޯ ބްލިންގއަކާއި، ޑީކޮމްޕްރެޝަން ޗެމްބާއެއްވެސް ގާއިމް ކުރެވިގެންދާނެއެވެ. އަދި މިހާރު މަދު ރިސޯރޓެއް އޮތް ނަމަވެސް މި ޕްރޮޖެކްޓްގެ ދަށުން އެކަނިވެސް އެ ސަރަހައްދުގައި 12 ރިސޯޓެއް ތަރައްޤީވެގެން ދާނެކަން ވަޒީރު މުއްޠަލިބު ފާހަގަ ކުރެއްވިއެވެ.

ވަޒީރު މުއްޠަލިބު އިތުރަށް ފާހަގަ ކުރެއްވި ގޮތުގައި މިރޭ މި ސޮއިކުރެވުނު އެއްބަސްވުމުގެ ދަށުން ކުރެވިގެންދާ ހުރިހާ މަސައްކަތަކީވެސް ދައުލަތުގެ ބަޖެޓުން ހަރަދުކުރުމެއް ނެތި ހަމައެކަނި މަސައްކަތްކުރިއަށް ގެންދާފަރާތުން ހުރިހާ ހަރަދެއްކުރާގޮތަށް ކުރިއަށް ގެންދެވޭ ބިޔަ ބޮޑު ޕްރޮޖެކްޓެއް ކަމަށެވެ.