އިންޑިއާއިން ފިޔާ ލިބުމުގައި އެއްވެސް ދަތި ކަމެއް ނެތް ކަމަށް އެސްޓީއޯ އިން ބުނެފިއެވެ.
އެސްޓީއޯ އިން ބުނީ ފާއިތުވި ދެ މަހުގެ މާކެޓް ޓްރެންޑަށް ބަލާއިރު ފިޔާގެ އަގު ރާއްޖޭގެ މާކެޓްގައި އަންނަނީ ތިރިވަމުން ކަމަށާއި، ކުރި އެކޭވެސް އެއްފަދައިން އެއްވެސް ދަތި ކަމެއް ނެތި އެސްޓީއޯ އިން ފިޔާ ފޯރުކޮށްދެމުންދާނެ ކަމަށެވެ.
މީގެ އިތުރުންވެސް އެސްޓީއޯއިން ބުނީ ކުރިއަށްއޮތް ރަމަޟާންމަހު އަސާސީ ކާބޯތަކެތި ލިބުމުގައި ދަތިކަމެއް ކުރިމަތިވިޔަ ނުދިނުމަށް އެސްޓީއޯ އިން ވަނީ ފުރިހަމައަށް ތައްޔާރުވެފައި ކަމަށެވެ.
މީގެ ކުރިން ފިޔާގެ އަގު ރާއްޖޭގެ ބާޒާރުގައި މަތިވީ މިދިޔަ ޑިސެންބަރު މަހު ރާއްޖެއަށް އެންމެ ގިނައިން ފިޔާ އެތެރެކުރާ އިންޑިއާއިން ފިޔާ އެކްސްޕޯޓް ކުރުން ވަގުތީ ގޮތުން ހުއްޓާލުމާއި ގުޅިގެންނެވެ.
މޫސުމީ ގޮތުން މިވަގުތު އިންޑިއާއަށް ކުރިމަތި ވެފައިވާ ހާލަތާއި ގުޅިގެން، ބައެއް ގައުމު ތަކަށް ފިޔާ އެކްސްޕޯޓް ކުރުން ވަގުތީ ގޮތުން މަޑުޖައްސާލައިފައި އޮތް ނަމަވެސް، ދިވެހި ރައްޔިތުންނަށް ފިޔާ ލިބުމުގައި ދަތި ކަމެއް ދިމާވާނެ އެއްވެސް ފިޔަވަޅެއް އެގައުމުން އަޅާފައި ނެތް ކަމަށް އިކޮނޮމިކް މިނިސްޓްރީން ވެސް ވަނީ މީގެ ކުރިން ބުނެފައެވެ. އަދި ފިޔާ ފަދަ ޒަރޫރީ ބާވަތްތައް ރާއްޖެއަށް އިމްޕޯޓް ކުރުމުގައި އެއްވެސް ދަތި ކަމެއް ކުރި މަތި ވެއްޖެނަމަ މިކަމަށް އެކަށޭނަ ހައްލެއް ހޯދާނެ ކަމުގެ ޔަގީން ކަން ވެސް މިނިސްޓްރީން ވަނީ ދީފައެވެ.
Advertisement
This content is created and paid for by advertisers and does not involve Voice Journalists
