އިރާނުގެ ވެރިރަށް ތެހެރާނުގައި ފެބުރުއަރީ މަހުގެ 17-19 އަށް ކުރިއަށް ގެންދިޔަ 11 ވަނަ އޭޝިއަން އިންޑޯ އެތުލެޓިކްސް ޗެމްޕިއަންޝިޕްގައި ވާދަކުރި ރާއްޖޭގެ ޒުވާނުން އަންހެން ދުވުންތެރިޔާ ފަސޫހާ އަހުމަދު, 18 އަހަރުވީ 800މ އަންހެނުންގެ (އިންޑޯ) ގައުމީ ރެކޯޑް އައުކޮށްފި އެވެ.

އުމުރުން 20 އަހަރުގެ ފަސޫހާ 800މ އިވެންޓުގައި ވާދަކޮށް ރޭސް ނިންމީ ދެ މިނެޓު، 22.30 ސިކުންތުންނެވެ. ކުރިން މިރެކޯޑް އޮތީ 2006 ވަނަ އަހަރުގެ އޭޝިއާގެ އިންޑޯ ޗެންޕިއަންޝިޕްގައި ދެމިނެޓު 37.21 ސިކުންތުން ދުވި، ފާތިމަތު ހަޝްމާ އަތުގަ އެވެ. 

ފަސޫހާ، 800 މީޓަރުގެ ދުވުމުގެ ފައިނަލްގައި ދުވެ، ހަ ވަނަ އަށް ދިޔައިރު، އޭނާ ވާދަކުރި ރޭހުގެ އެއް ވަނަ ހޯދީ، އީރާނުގެ ތޮކްތަމް ދަސްތަރުބަންދަން އެވެ. އޭނާގެ ޓައިމިން އަކީ، ދެ މިނިޓް، 09.17 އެވެ.

Advertisement

800މ ދުވުމުގެ އަންހެން (އައުޓްޑޯ) ރެކޯޑު ވެސް އޮތީ ފަސޫހާ އަތުގައެވެ. އަދި މިދިޔަ، ޑިސެމްބަރު މަހު ބޭއްވި ނެޝަނަލް ގްރޯން ޕްރީގެ އެންމެ މޮޅު އަންހެން އެތުލީޓަކަށް ހޮވުނު ފަސޫހާ ވަނީ އެ މުބާރާތުގައި ދުވެ، އަންހެނުންގެ 1500މ ދުވުމުގެ އިތުރުން 800މ (އައުޓްޑޯ) ގައުމީ ރެކޯޑް ވެސް އައުކޮށްފަ އެވެ.

ނެޝަނަލް ގްރޯން ޕްރީގައި ފާސޫހާ 1500މ ގެ ރެކޯޑް ހެދީ ފަސް މިނެޓު 04.02 ސިކުންތުން ރޭސް ނިންމައިގެން ނެވެ. އަދި 800މ ގެ ރެކޯޑް އައުކޮށްފައިވަނީ ދެމިނެޓު 19.73 ސިކުންތުން ދުވެގެންނެވެ. މީގެ އިތުރުން 2023 ވަނަ އަހަރުގެ ފަހުކޮޅު ފަސޫހާ ވަނީ ތިން ފަހަރެއްގެ މަތިން 800މ (އައުޓްޑޯ) ގައުމީ ރެކޯޑް އައުކޮށްފަ އެވެ.

މި ފަހަރުގެ އޭޝިއާ އިންޑޯ މުބާރާތުގައި ރާއްޖޭގެ އެންމެ ބާރު ދުވުންތެރިޔާ، ހަސަން ސާއިދު ވެސް ވަނީ ވާދަކޮށްފަ އެވެ. ސާއިދު ދިޔައީ، 60 މީޓަރު ދުވުމުގެ ހީޓު، އެކެއްގެ ހަ ވަނަ އެވެ. އޭނާގެ ޓައިމިން އަކީ، 6.95 ސިކުންތެވެ. އެ ރޭހުގެ އެއް ވަނަ ހޯދި، ޝުހޭއި ޓާޑާގެ ޓައިމިން އަކީ، 6.60 ސިކުންތެވެ.