ސިވިލް ސަރވަންޓުންގެ ތެރެއިން 55 އަހަރުވުމުން ވަޒީފާއިން ރިޓަޔަރވާ ފަރާތްތަކަށް އެލަވަންސް އެއް ތައާރަފް ކުރުމުގެ ގާނޫނީ މަސައްކަތް ދަނީ ކުރަމުންދާ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސް އޮފީހުން ކުރިއަށް ގެންދާ ރައީސްގެ ޖަވާބު ޕްރޮގްރާމުގައި އުމުރުން 55 އަހަރު ވެގެން ރިޓަޔަރވާ ސިވިލްސާވިސް މުވައްޒަފުންނަށް އެލަވަންސެއް ލިބެމުންދާނެ ގޮތެއް ނޯންނާތީ އެކަމާ ގުޅޭގޮތުން ގއ.ގެމަނަފުށީ ސްކޫލް ޓީޗަރެއްކަމުގައިވާ، އެރަށު، މުޝްތަރީގޭ، މުޙައްމަދު ދެންނެވި ސުވާލަށް ޖަވާބު ދެއްވަމުންނެވެ. 

ރައީސް ޑރ.މުއިއްޒު ވިދާޅުވީ 55 އަހަރާ 65 އަހަރާ ދޭތެރޭ ރިޓަޔަރމަންޓަށްދާ ފަރާތްތަކަށް އެލަވަންސެއް ތަޢާރަފްކުރެއްވުމަކީ އެމަނިކުފާނުގެ ރިޔާސީ ވައުދުފުޅު ތަކުގެ ތެރޭގައި ހިމެނޭ ކަމެއް ކަމަށެވެ. މިގޮތުން ރައީސް ޑރ.މުއިއްޒު ވިދާޅުވީ މިކަމާއި ގުޅޭ އިދާރީ މަސައްކަތް ރައީސް އޮފީހުގެ ލީގަލް ޓީމާއި އެޓަރނީ ޖެނެރަލްގެ އޮފީހާ ގުޅިގެން ފައްޓާފައިވާ ކަމަށެވެ. 

އެލަވަންސް ދިނުމަށް ޤާނޫނުގެ ތެރެއިން މަގުފަހިކުރަންޖެހޭ ކަން ފާހަގަކުރައްވާ ރައީސް ޑރ.މުއިއްޒު ވިދާޅުވީ މިހާރު ކުރެވެމުންދަނީ މަޖިލީހަށް ފޮނުވަންޖެހޭ އިސްލާހްތައް ހުރުމުން އެކަމަށް ބޭނުންވާ އިދާރީ އަދި ޤާނޫނީ މަސައްކަތްތައް ކަމަށެވެ.

މީގެ ކުރިން ރައީސް ޑރ.މުއިއްޒު އެމަނިކުފާނުގެ ރިޔާސީ ބަޔާން އިއްވަމުން ވަނީ ޢުމުރުން 65 އަހަރުވީ ނަމަވެސް ޚިދުމަތުގައި ދެމިތިއްބަވަން ބޭނުންފުޅު ކޮންމެ ބޭފުޅަކަށްވެސް އެގްރީމެންޓް އުޞޫލުން ވަޒީފާ ހަމަޖައްސައިދީ، ޢުމުރުން 75 އަހަރާ ހަމަޔަށް ޚިދުމަތުގައި ކުރިއަށް ވަޑައިގެންނެވޭނެ އިންތިޒާމު ހަމަޖެއްސުމުގެ މަސައްކަތް ސަރުކާރުން ކުރަމުންދާ ކަމަށް ވިދާޅުވެފައެވެ.