ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ވަޢުދުފުޅާއި އެއްގޮތަށް އައްޑު އަތޮޅުގައި 10,000 ވަޒީފާ އުފައްދައިދޭނެ "އައްޑޫ އައްސޭރި ޓޫރިޒަމް" ގެ ޑިވަލޮޕްމަންޓް ޕްލޭން އެކުލަވާލައި، އެ އިފްތިތާހު ކޮށްފިއެވެ. 

މި ޕްލޭން އިފްތިތާޙް ކޮށްދެއްވީ ފަތުވެރިކަމާއި ބެހޭ ވުޒާރާގެ ވަޒީރު އިބްރާހީމް ފައިސަލް އެވެ. 

މިކަމާއި ގުޅިގެން ފަތުވެރިކަމާއި ބެހޭ ވުޒާރާއިން ނެރުނު ބަޔާނުގައި ބުނީ ސީޑިސީ ކޮންސަލްޓިންއިން އެކުލަވައިލި އެ ޕްލޭންގައި، ކުރިއަށް އޮތް ފަސް އަހަރު އެ ސިޓީގެ ފަތުރުވެރިކަން ތަރައްގީކުރުމަށް ކުރާނެ ކަންކަމުގެ ތަފްސީލު ހިމަނާފައިވާނެއެވެ. އަދި އެ ޕްލޭނަކީ ހަމައެކަނި އައްޑޫ ސިޓީގައި ފަތުރުވެރިކަން ކުރިއަރުވާނެ ޕްލޭނެއް ނޫން ކަމަށާ، އެހެނެއް ކަމަކު އައްޑޫ ސިޓީގެ އިގްތިސާދަށްވެސް ބޮޑު ކުރިއެރުމެއް ގެނެސްދޭނެ ޕްލޭނެއް ކަމަށެވެ. 

Advertisement

މީގެ އިތުރުން އެ ފްލޭންގައި ދަށުން ސަރުކާރުގެ ވައުދާ އެއްގޮތަށް އެސިޓީގައި 6000 އެނދު ތަރައްގީކުރާއިރު 10،000 ވަޒީފާގެ ފުރުސަތު އުފެދޭނެ ކަމަށް އެ މިނިސްޓްރީން ބުންޏެވެ.

އަދި، އައްޑޫގައި ކުރިން ހިންގި އަދި މިހާރު އޮޕަރޭޝަން ހުއްޓިފައި އޮތް ޝަންގްރިލާ ވިލިނގިލި ރިސޯޓްގެ ޚިދުމަތް އަލުން ފެށުމަށާއި ސީޕްލޭން ހަބެއް ގާއިމުކުރުމަށް ވެސް އެ ޕްލޭންގައި ވަނީ ހިމަނައިފައެވެ.

ފަތުރުވެރިކަމާއި ބެހޭ ވުޒާރާއިން ބުނެފައިވާގޮތުން މި ޕްލޭންގެ މަގުސަދަކީ ހަމައެކަނި ޒިޔާރަތްކުރާ ފަރާތްތައް ޝައުގުވެރި ކުރުވުމެއް ނޫން ކަމަށެވެ. އެހެނެއްކަމަކު، އައްޑޫ ސިޓީގެ މުއްސަނދި ތަރިކައާއި ގުދުރަތީ ރީތިކަން ދައްކައި ފަތުރުވެރިންނާއި ދިވެހިންނަށް ތަފާތު ތަޖުރިބާއެއް ފޯރުކޮށްދިނުން ކަމަށެވެ. އެގޮތުން ކަލްޗަރަލް ވިލެޖަކާއި ވެލްނެސް ޒޯންތަކާއި ހޮސްޕިޓާލިޓީ ސްކޫލެއް އެޅުމުގެ އިތުރުން ކަނޑުގެ ހިމާޔަތްކޮށްފައިވާ ސަރަހައްދުތައް ކަނޑަޅަން އެ ޕްލޭންގައި ހިމަނާފައިވާ ކަމަށް ބުންޏެވެ.