ރާއްޖެ މިހާރު އޮތް ހާލަތަށް ވައްޓާލީ، އަދުގެ ރައީސުލްޖުމްހޫރިއްޔާ ޑރ.މުހައްމަދު މުޢިއްޒު ނޫން ކަމަށް ކުރީގެ ރައީސް ޔާމީން އަބްދުލްގައްޔޫމް ވިދާޅުވެއްޖެއެވެ.
ރައްޔިތުންގެ މަޖިލީހަށް އެމަނިކުފާނުގެ ތާއީދާއެކު ނުކުންނަވާ ކެންޑިޑޭޓުން ތައާރަފުކުރުމަށް ދަ ފްރޮންޓު އޮފީހުގައި ބާއްވަމުން ގެންދަވާ ސިލްސިލާ ޖަލްސާތަކުގެ ތެރެއިން ރޭ ބޭއްވި ޖަލްސާގައި ކެންޑިޑޭޓަކަށް އަމާޒު ކުރެއްވި ސުވާލެއްގެ ތެރެއިން ރައީސް ޔާމީން ވިދާޅުވީ، އިދިކޮޅު މައި ޕާޓީ، އެމްޑީޕީ ސަރުކާރުން ނޫން އެހެން އެއްވެސް ސަރުކާރަކުން ހުށަހަޅާ ބަޖެޓަކަށް އެމްޑީޕީން މިހާތަނަށް ތާއީދު ކޮށްފައި ނުވާ ކަމަށެވެ.
އަދި ރާއްޖެ މިއަދު މިއޮތް ހަލަތުގައި މިއޮތީކީއެއް ކޮންމެހެން ޑރ. މުއިއްޒު އެ ހާލަތަށް ގައުމު ވައްޓާލައިގެނެއް ނޫން. އޭގެވެސް ހަގީގަތް އނެގޭނެ. ފަސް އަހަރެއްގެ ވެރިކަން ނިމިގެން ދިޔައިރު ރާއްޖެ މިހާލަތަށް ގެނެސްފައި މިއޮތީ އެމްޑީޕީ ވެރިކަމުގައި ތިބެގެން. އެކަމަކު މިއަދު އެ ބޭފުޅުން އެބަ ވިދާޅުވޭ ދައުލަތް ހިންގަން ނޭނގެއޭ ފައިސާ މެނޭޖުކުރާކަށް ވެސް ނޭނގެއޭ، ދަރަނި ފިލުވަން ނޭނގެއޭ. އެކަމަކު ދަރަނި އުފެއްދީ ކޮންބައެއް ކަމެއް ގަބޫލުކުރާކަށް ބޭނުމެއް ނުވޭ އެމީހުން. ދައުލަތުގެ މުވައްސަސާތައް މިނިވަން ނޫން ކަމަށް ވިދާޅުވޭ، ދައުލަތުގެ މުވައްސަސާތައް މިނިވަން ނުކޮށް މުށު ތެރޭގައި ގެންގުޅުނީ ކޮން ބައެއްކަންވެސް އެބަ އެނގޭ. ނިމިދިޔަ ފަސް އަހަރު އެމްޑީޕީއިން ނިންމާލީ ގައުމީ ސަލާމަތަށް ނުރައްކަލުގެ ރަނގަބީލު ޖަހަމުން ކަންކަން ސިއްރުކުރަމުން.
ރައީސް ޔާމީން
ޔާމީން އިތުރަށް ވިދާޅުވީ، ރާއްޖޭގެ ސިޔާދަތީ ބާރު ރާއްޖޭގައި ނުހިނގައިގެން އުޅެނީ ކީއްވެގެންކަންވެސް އެނގޭ ކަމަށާއި، އޭގެ ޒިންމާ އުފުލަން ޖެހޭނީ އެމްޑީޕީ މީހުން ކަމަށެވެ. އަދި ރާއްޖޭގެ ދެކުނުގައި އޮތް ބޮޑު މަސްކަނޑު ވިއްކާލީވެސް އެމްޑީޕީ ވެރިކަމުގައި ކަމަށް ރައީސް ޔާމީން ވަނީ ވިދާޅުވެފައެވެ.
ރައީސް ޔާމީން ވިދާޅުވި ގޮތުގައި، ސަރުކާރު ޖަވާބުދާރީ ކުރުވަން ޖެހޭ މަޖިލީހެއްގައި "މުޅި ރާއްޖެ ހަލާކު ކޮށްލައި، މުޅި ރާއްޖޭގެ ހައިބަތު ގެއްލޭ ފަދަ ކަންތައްތައް ކޮށްފައި ތިބި" އެމްޑީޕީ ފަދަ ބަޔަކަށް މަޖިލިސް އިންތިހާބުގައި އެންމެ ވޯޓެއްވެސް ދޭން ނުޖެހޭނެއެވެ.
Advertisement
This content is created and paid for by advertisers and does not involve Voice Journalists
