އަންހެން ވިޔަފާރިވެރިންނަށް ޚާއްސަކޮށްގެން އެސްއެމްއީ ޑިވަލޮޕްމެންޓް ފައިނޭންސް ކޯޕަރޭޝަން (އެސްޑީއެފްސީ) އިން ލޯން ސްކީމެއް ތައާރަފުކޮށްފިއެވެ.

އެސްޑީއެފްސީ އާއި އިގްތިޞާދީ ތަރައްގީއާއި ވިޔަފާރިއާ ބެހޭ ވުޒާރާއާ ގުޅިގެން ކުރިއަށް ގެންދާ މިލޯނު ސްކީމް ގެ ތެރެއިން "ފަށާ މަދަދު ލޯން" އަށް ކުރިމަތިލުމުގެ ފުރުސަތު ހުޅުވާލާނީ އަންނަ މަހުގެ 3 ގައެވެ. "ފަށާ މަދަދު ލީސިން" އަށް ވެސް އަންނަ މަހު ތެރޭގައި ހުޅުވާލާއިރު، ވަކި ތާރީހެއް އަދި ކަނޑައަޅާފައެއް ނުވެއެވެ.

އެސްޑީއެފްސީ އިން ބުނީ "ފަށާ މަދަދު" ކުރިމަތިލެވޭނީ އަންހެން ވިޔަފާރިވެރިންގެ ތެރެއިން އާމްދަނީ ކަށަވަރު ނުވުމުގެ ސަބަބުން  އެހެން ބޭންކްތަކުން ލޯނު ހޯދުމަށް ދަތިތައް ކުރިމަތިވެފައިވާ ފަރާތްތަކަށް ކަމަށެވެ. އެފަރާތްތަކަށް ފަށާ މަދަދުގެ ދަށުން އެއް ލައްކަ ރުފިޔާ އާއި ފަސް ލައްކަ ރުފިޔާއާ ދެެމެދުގެ އަދަދަކަށް ލޯނު ދޫކުރާއިރު، ލޯނު އަނބުރާ ދެއްކުމުގެ މުއްދަތަކީ 7 އަހަރެވެ. އަދި އިންޓަރެސްޓުގެ ގޮތުގައި ހަ ޕަސަންޓު މި ލޯނުގެ ދަށުން ނަގާނެއެވެ.

އަންހެން ވިޔަފާރިވެރިންނަށް ލުއިފަސޭހަ ގޮތެއްގައި ލީސިން ފައިނޭންސް ލިބޭނެ ގޮތް ހަމަޖައްސައި ދިނުމަށް ތައާރަފު ކޮށްފައިވާ ފަށާ މަދަދު ލީސިންގ ލޯނުގެ ދަށުން 10،000 ރުފިޔާއާ 100،000 ރުފިޔާއާ ދެމެދުގެ އަދަދަކަށް ލޯނު ދޫކުރާނެއެވެ. ގްރޭސް މުއްދަތުގެ ގޮތުގައި ހަ މަސް ލިބޭއިރު، ލޯނު ދައްކަން ލިބޭނީ ފަސް އަހަރު ދުވަހެވެ. އިންޓަރެސްޓުގެ ގޮތުގައި އަށް ޕަސަންޓު މި ލޯނުގެ ދަށުން ނަގާނެއެވެ. މި ލޯނަށް ޝަރުތު ހަމަވާނީ މެދުނުކެނޑި ހަ މަސްދުވަހު ވިޔަފާރި ހިންގާފައިވާ މީހުންނަށެވެ. މިއީ ވިޔަފާރި އަށް ހަރުމުދާ ގަތުމަށް ބޭނުންކުރާ ލޯނެކެވެ.

އަންހެނުންނަށް ހާއްސަކޮށް ހުޅުވާ ފައިނޭންސިން ފެސިލިޓީއަކީ ސަރުކާރުގެ ހަފްތާ 14ގެ ތެރޭގައި ހިމެނޭ ވައުދެއް ކަން ފާހަގަކޮށްލެވެއެވެ.