ހިނގަމުންދާ 19 ވަނަ ރައްޔިތުންގެ މަޖިލީހުގެ ބާކީ އޮތް ދުވަސްތަކުގައި ރައީސް ޑރ.މުއިއްޒު އަޒުލެއް ނުކުރެވޭނެ ކަމަށާއި، އެ ފުރުސަތު ނުވެސް ދެއްވާނެ ކަމަށް ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ޗެއާޕާސަން އަބްދުއްރަހީމް އަބްދުالله ވިދާޅުވެއްޖެއެވެ.
ރޭ ކުރިއަށްދިޔަ ޕީޕީއެމް/ޕީއެންސިގެ ފަރާތުން ރައްޔިތުންގެ މަޖިލީހުގެ އިނގުރައިދޫ ދާއިރާއަށް ވާދަކުރައްވާ އިބްރާހިމް ފަލާހްގެ ކެމްޕެއިން ރަސްމީކޮށް ފެށުމަށް ބޭއްވި ހާއްސަ ޖަލްސާގައި ވާހަކަފުޅު ދައްކަވަމުން އަބްދުއްރަހީމް ވިދާޅުވީ، ރައްޔިތުން ރައީސް ޑރ.މުއިއްޒު އަޒުލުކުރުމަށް ބޭނުން ނުވާ ކަމަށެވެ.
އަބްދުއްރަހީމް ވިދާޅުވީ މަޖިލީހުގެ އަޣުލަބިއްޔަތު އޮތަސް، ރައީސް ޑރ.މުއިއްޒު އަޒުލް ކުރުމަށް ޖާގައެއް ނުދެއްވާނެ ކަމަށެވެ.
" އަޅުގަނޑު މިރޭ ދަންނަވާލަން އަޅުގަނޑުމެންގެ ވާދަވެރިންނަށް، ރައްޔިތުން ތިބީ އެއްގޮތަކަށް ވެސް ރައީސް ޑރ.މުއިއްޒު ވެރިކަމުން އަޒުލު ކުރާ ގޮތަކަށް ނޫނޭ. ރައްޔިތުން ބޭނުންވީ ރައީސް ޑރ.މުއިއްޒު މި ރާއްޖޭގެ ވެރިކަމަށް ގެންނަން. އެހެންވެގެން މިއަދު ވެރިކަމުގައި ޑރ.މުއިއްޒު އެހުންނެވީ. އެހެންވީމަ ތިގޮތަށް ރައްޔިތުންގެ މަޖިލީހުގެ އަޣުލަބިއްޔަތު ތިބޭފުޅުންގެ އަތުގައި އޮތް ކަމަށް ވިޔަސް ތިގޮތަށް ތިކަން ކުރަން އަޅުގަނޑުމެން ޖާގަ ދޭ ގޮތަކަށް ނޫން މިތިބީކީ."
އަބްދުއްރަހީމް ވިދާޅުވިއެވެ.
އަބްދުއްރަހީމް ވިދާޅުވީ ރައީސް ޑރ.މުއިއްޒަށް ހަވާލުކޮށްފައިވަނީ ވަރަށް ބޮޑު މަސްއޫލިއްޔަތެއް ކަމަށާއި، އެމަނިކުފާނަށް ވެރިކަން ކުރުމަށް ޖާގަ ހޯދައިދިނުމަކީ ކުރަން ޖެހޭ ކަމެއް ކަމަށެވެ.
މީގެ އިތުރުންވެސް އަބްދުއްރަހީމް ވިދާޅުވީ އެމްޑީޕީގެ ކޮންމެ ވެރިކަމެއްގައި ރާއްޖޭގެ ގާނޫނުގެ ބާރު ކަނޑުވާލާ ކަމަށާއި، އެ ފަދަ ކޮންމެ ފަހަރކު ވެސް ތެދުވާނެ ކަމަށެވެ. އަދި ރައީސް ޑރ.މުއިއްޒުގެ ވެރިކަން ގާނޫނާއި ޚިލާފަށް ނިންމާ ނުލެވޭނެ ކަމަށް ބުނެ އަބްދުއްރަހީމް ވަނީ އިދިކޮޅަށް ރައްދު ދެއްވާފައެވެ.
Advertisement
This content is created and paid for by advertisers and does not involve Voice Journalists
