ޖުލައި މަސް ނިމުމުގެ ކުރިން ބަންކަރިންގެ ވިޔަފާރި އިހަވަންދިއްޕޮޅުގައި ފެށޭނެ ކަމަށް ލަފާކުރައްވާ ކަމަށް އިޤްތިޞާދީ ތަރައްޤީއާއި ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.
ރައީސް ޑރ.މުއިއްޒު އުތުރުގެ 4 އަތޮޅަކަށް މިހާރު ކުރައްވަމުންގެންދަވާ ދަތުރުފުޅުގައި ހއ.ހޯރަފުއްޓަށް ވަޑައިގެން އެރަށުގެ ރައްޔިތުންނާއި ބައްދަލުކުރެއްވުމަށް ބޭއްވި ޖަލްސާގައި ވާހަކަފުޅު ދައްކަވަމުން ވަޒީރު ސައީދު ވިދާޅުވީ ދެތިން ހަފްތާއެއްގެ ތެރޭގައި ދުނިޔޭގެ އެންމެ ވަރުގަދަ އެއް ކުންފުންޏާއި އެކު ބަންކަރިންގެ ހިދުމަތަށް އެ ސަރަހައްދު ވަންނާނެކަމަށެވެ.
"އިރާދަކުރެއްވިއްޔާ ދެތިން ހަފްތާއެއްގެ ތެރޭގައި އަޅުގަނޑުމެންނަށް ދުނިޔޭގެ ޓޮޕް ޓެން ގައި ހިމެނޭ އެންމެ ވަރުގަދަ އެއް ކުންފުންޏާއި އެކު ބަންކަރިންގެ ހިދުމަތަށް މި ސަރަހައްދު ވަންނާނެ. އެކަން އެ ހިސާބަށް ދިޔައީމަ ކުރިއަށް އޮތް ދެތިން މަހެއް ތެރޭ އަޅުގަނޑުމެން އިންތިޒާރު މި ކުރަނީ އެންމެ ލަސްވެގެންވެސް ޖުލައި މަސް ނިމުމުގެ ކުރިން އަޅުގަނޑުމެންނަށް އެ ވިޔަފާރި މިތާގައި ފެށޭނެ ކަމަށް."
ވަޒީރު ސައީދު ވިދާޅުވިއެވެ.
ސައީދު ވިދާޅުވީ ބަންކަރިންގެ ޙިދުމަތުގެ ސަބަބުން އެތައް ވަޒީފާތަކެއް އުފެދިގެންދާނެ ކަމަށެވެ. އަދި ކުދި، މެދުފަންތީގެ ވިޔަފާރިތަކަށް ވަރަށް ބޮޑެތި ވިޔަފާރީގެ ހަރަކާތްތަކެއް ތަނަވަސް ވެގެންދާ ކަމަށާއި ރާއްޖޭގެ އާމްދަނީ އެތައް ގުނަ އަކަށް އިތުރުވެގެންދާނެ ކަމަށް ވެސް ސައީދު ވިދާޅުވިއެވެ.
މިއީ އިހަވަންދިއްޕޮޅު ގެ ރައްޔިތުން ޒަމާންތަކަކަށް އިންތިޒާރު ކުރި މަސައްކަތެއްކަން ފާހަގަކުރައްވާ ވަޒީރު ވިދާޅުވީ، އެ ސަރަހައްދުން ދަތުރުކުރާ ބޯޓް ފަހަރަށް ދެތިން މަސްތެރޭގައި ބަންކަރިންގެ ހިދުމަތް ފޯރުކޮށްދެވިގެންދާނެ ކަމަށެވެ.
Advertisement
This content is created and paid for by advertisers and does not involve Voice Journalists
