ސްޓެލްކޯގެ ތާރީހުގައި އަލަށް ހެޑް އޮފީހުން ބޭރުގައި އެ ކުންފުނީގެ ބޯޑު ބައްދަލުވުމެއް ބާއްވައިފިއެވެ. 

ސްޓެލްކޯއިން މި ބައްދަލުވުން ބާއްވާފައިވަނީ ކ. ހިންމަފުށީ އިންޖީނުގޭ އޮފީހުގަ އެވެ. މި ބޯޑު ބައްދަލުވުމުގައި ބޯޑުގެ ޗެއާމަން މުހައްމަދު ލަތީފް އާއި މެނޭޖިންގ ޑިރެކްޓަރ ހުސައިން ފަހުމީ ގެ އިތުރުން ބޯޑުގެ ހުރިހާ މެންބަރުން ބައިވެރިވެވަޑައިގެންފައިވާ ކަމަށް ސްޓެލްކޯއިން ވަނީ ބުނެފައެވެ.

ހިންމަފުށީ ގައި ސްޓެލްކޯއިން ބޭއްވި މި ބޯޑު ބައްދަލުވުމަކީ ހިންމަފުށީ އިންޖީނުގޭގެ މަސައްކަތްތައް ބައްލަވާލައްވައި، އެ ރަށުގައި މަސައްކަތްކުރާ އެ ކުންފުނީގެ މުވައްޒަފުނާއި، ރަށުގެ އިސް ވެރިންނާއި ބައްދަލުކުރެއްވުމަށް ސްޓެލްކޯގެ އިސްވެރިން އެ ރަށަށް ކުރެއްވި ޒިޔާރަތުގެ ތެރެއިން ބޭއްވި ބައްދަލުވުމެކެވެ.

ސްޓެލްކޯއިން ބުނީ މިއީ މާލެއާއި އަތޮޅުތެރެއާއި ދެމެދު ހުރި ތަފާތުކުރުންތައް ނައްތާލުމަށް ސަރުކާރުން ގެންގުޅުއްވާ ސިޔާސަތުގެ ތެރެއިން، ސްޓެލްކޯގެ ހިންގުމުގައި ކުންފުނިން ޚިދުމަތްދޭ ރަށްތަކުގެ ބައިވެރިވުން އިތުރުކުރުމުގެ އަމާޒާއި ދިމާލަށް އެޅުނު މުހިއްމު ފިޔަވަޅެއް ކަމަށެވެ.