ސަރުކާރު މަސްވެރިންނަށް ދޫކުރަން ޖެހޭ ފައިސާގެ ތެރެއިން، މިދިޔަ އަހަރުގެ ނޮވެންބަރު މަހުގެ 17 ވަނަ ދުވަހުން ފެށިގެން،  މިހާތަނަށް ޖުމްލަ 561 މިލިއަން ރުފިޔާ މަސްވެރިންނަށް ދޫކުރެވިފައިވާނެ ކަމަށް މަސްވެރިކަމާއި ކަނޑުގެ ވަސީލަތްތަކާއި ބެހޭ ވުޒާރާއިން ހާމަކޮށްފިއެވެ.

މަސްވެރިންނަށް ސަރުކާރުން ދޭންޖެހޭ ފައިސާގެ ތެރެއިން މި އަހަރުގެ ޖެނުއަރީ 14 ގެ ނިޔަލަށް ހުރި ބިލުތަކަށްވާ ފައިސާ އިއްޔެ ދައްކާ ނިންމާނެ ކަމަށް މިފްކޯއިން ބުނުމާއި ގުޅިގެން އެ ވުޒާރާއިން އެކްސްގައި ކުރި ޕޯސްޓެއްގައި ބުނީ 561 މިލިއަން ރުފިޔާ މަސްވެރިންނަށް ދޫކޮށްފައިވަނީ ތެލަށާއި އައިސް އަށް ދެވިފައިވާ ފައިސާ ހިމަނައިގެން ކަމަށެވެ.

މިހާތަނަށް މަސްވެރިންނަށް ނުދެވި ހުރި ފައިސާގެ ތެރެއިން މިފްކޯއިން ޖަމާކުރި 35 މިލިއަން ރުފިޔާ އާއި އެކު މިދިޔަ ބުދަ ދުވަހާއި އިއްޔެ ހިމެނޭހެން، ޖުމްލަ 105 މިލިއަން ރުފިޔާ ޖަމާކޮށްދީފައިވާނެ ކަމަށް ވެސް އެވުޒާރާއިން ވަނީ ބުނެފައެވެ.

މީގެ އިތުރުންވެސް އެ ވުޒާރާއިން ބުނީ ބާކީ ދޫނުކޮށް، ބެކްލޮގް ގައި ހުރި ފައިސާތައް މަސްވެރިންނަށް ދެވޭނެ އިންތިޒާމް ހަމަޖައްސަމުންދާ ކަމަށެވެ.

މަސްވެރިންނަށް ބަރާބަރަށް ފައިސާ ދިނުމަށްޓަކައި ސަރުކާރުން ވަނީ މަސްގަންނަ އަގު 25 ރުފިޔާ އިން 20 ރުފިޔާ އަށް ދަށް ކޮށްފައެވެ. މިކަމާއި ގުޅިގެން މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަހްމަދު ޝިޔާމް ވިދާޅުވީ އަގު ދަށްކުރީ، މަސްވެރިންނާއި މިފްކޯ ސަލާމަތުން ބޭއްވުމަށްޓަކައި ކަމަށާއި، މި ބަދަލަކީ މަސްވެރިން މިއަދު ތިބި ހާލަތު ބަދަލު ކުރުމަށް ގެނެވުނު ބަދަލެއް ކަމަށެވެ. އަދި ދައުލަތަށް ކެތްވާ އަގެއްގައި މަސް ގަންނަ ޖެހޭ ކަމަށް މަސްވެރިން ވެސް ގަބޫލުކުރާ ކަމަށާއި މަސްވެރިންނަށް ނުދެވޭ އަގެއްގައި މަސް ގަނެގެން މަސްވެރިން ނިކަމެތި ކުރުމުގެ ވިސްނުމެއް ސަރުކާރުގެ ނެތް ކަމަށް ވެސް ޝިޔާމް ވިދާޅުވިއެވެ.

މި ސަރުކާރަށް ވާރުތަވީ 250 ވަރަކަށް މިލިޔަން ރުފިޔާ އާއެކު މިހާރު ނުދެވި ހުރި ރުފިޔާގެ ބެކްލޮގު އެއްކޮށް މާރޗު މަހުގެ 5 ވަނަދުވަހުގެ ނިޔަލަށް ސަރުކާރުން ނިންމާނެ ކަމަށް މީގެ ކުރިން ވަޒީރު ޝިޔާމް ވަނީ ވިދާޅުވެފައެވެ. އަދި މަހުގެ އަގު މުރާޖާ ކުރެވުނު ދުވަހުން ފެށިގެން ކިރުނު މަހަށްވާ 26 މިލިއަން ރުފިޔާ ކޮންމެ ހަފްތާއަކު މިފްކޯއަށް މަސްވެރިން ކިރާ މަހަށް، ހަފްތާއެއް ތެރޭގައި ދެވޭނެ އިންތިޒާމު ހަމަޖައްސާނެ ކަމަށް ވެސް ވަޒީރު ވަނީ ވިދާޅުވެފައެވެ.