އިދިކޮޅު އެމްޑީޕީން ގެންގުޅެނީ މުޅިން އެހެން ފަރާތެއްގެ މާ ބޮޑެތި މަސްލަހަތުތަކެއް ހިމާޔަތްކުރުމުގެ އެޖެންޑާއެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް ޑރ.މުއިއްޒު މިފަދައިން ވިދާޅުވީ ށ. ކަނޑިތީމު ރައްޔިތުންނާ ބައްދަލުކުރައްވައި މިއަދު ވާހަކަފުޅު ދައްކަވަމުންނެވެ. އެމަނިކުފާނުގެ ވާހަކަފުޅުގައި ވަނީ ސަރުކާރާ އިދިކޮޅު ޕާޓީ، އެމްޑީޕީން މާ ބޮޑަށް ސިޔާސީވެ، އަމިއްލަ މަސްލަހަތު އިސްކޮށް، ރައްޔިތުންގެ ކުރިއެރުމާއި ތަރައްގީއަށް ހުރަސްއެޅުމަށް މަޖިލިސް ތެރެއިން ޖެއްސުންކުރުމުގެ ވިސްނުން ގެންގުޅޭ ކަމަށް ވިދާޅުވެފައެވެ.
މިމޭރުމުން ވާހަކަފުޅު ދައްކަވަމުން ރައީސް ޑރ.މުއިއްޒު ވިދާޅުވީ، ތަރައްގީވެފައިވާ ނުވަތަ ތަހުޒީބުވެފައިވާ ޑިމޮކްރަސީތަކުގައި އިދިކޮޅު ޕާޓީތަކުގެ މެންބަރުން ތިބި ނަމަވެސް ކަންކަން ކުރުމުގައި އުނދަގޫތަކާ ކުރިމަތި ނުވާ ކަމަށާއި ކޮންމެ ޕާޓީއަކުން މީހަކު ހޮވިފައި ހުރި ނަމަވެސް އެ ދާއިރާއަކަށް ނުވަތަ ގައުމަކަށް ކުރިއެރުން އަންނަ ކަންކަމުގައި އެއްބާރުލުންދޭކަމަށެވެ.
ނަމަވެސް އެއާއި ޚިލާފަށް ރާއްޖޭގައި މަޖިލިސް އޮންނަނީ މާ ބޮޑަށް ސިޔާސީވެފައި ކަމަށާއި،މިހާރުގެ އިދިކޮޅު ޕާޓީން ކަންކަމުގައި ވަރަށް ބޮޑަށް ޕާޓީ ލައިން ނަގާކަމަށް ރައީސް ޑރ.މުއިއްޒު ވިދާޅުވިއެވެ. އެއީ ގައުމަށް ފައިދާ ހުރި، ތަރައްގީގެ ވިސްނުމެން ނޫންކަމަށާއި އިދިކޮޅުން މިދިޔަ ތިން މަސްދުވަހުގެ އިތުރުން، ވެރިކަމުގައި ތިބިއިރު ވެސް، ގެންގުޅުނީ މުޅިން އެހެން ފަރާތެއްގެ މާ ބޮޑެތި މަސްލަހަތުތަކެއް ހިމާޔަތްކުރުމުގެ އެޖެންޑާއެއް ކަމަށް ރައީސް ޑރ.މުއިއްޒު ވަނީ ވިދާޅުވެފައެވެ.
"މިދިޔަ ތިން މަސްދުވަހުގެ ތެރޭގައި ކަންކަން ފެނުނު ގޮތުން ވިއްޔާ އަދި އޭރު އެ ބޭފުޅުން ވެރިކަމުގައި ތިއްބެވިއިރު ވެސް ގައުމާ ދޭތެރޭގައި ކަންތައްތައް ކުރި ގޮތަށް ބަލާއިރުގައި މުޅިން އެހެން ފަރާތެއްގެ މާ ބޮޑެތި މަސްލަހަތުތަކެއް ހިމާޔަތްކުރުމުގެ އެޖެންޑާއެއް ގެންގުޅެނީ."
ރައީސް ޑރ.މުއިއްޒު ވިދާޅުވިއެވެ.
މީގެ އިތުރުންވެސް ރައީސް ޑރ.މުއިއްޒު ވިދާޅުވީ، މަޖިލީހުން މި އަހަރަށް ބަޖެޓު ފާސްކޮށްދިން އިރު ވެސް ،މަޝްރޫއުތަކަށް ފައިސާ ކަނޑައަޅާފައިވަނީ ބޭނުންވާވަރަށް ވުރެ މަދުން ކަމަށްވާތީ ގޮންޖެހުންތަކާއި ކުރިމަތިލައްވަން ޖެހޭ ކަމަށެވެ.
ސަރުކާރުން ބޭނުންވާ ކަންކަން ކުރުމުގައި ރައްޔިތުންގެ މަޖިލީހުގެ މެންބަރުންގެ އެއްބާރުލުން ބޭނުންވާކަން ފާހަގަކުރައްވަމުން، ރައީސް ވިދާޅުވީ މަޖިލިސް މެންބަރުންގެ އެއްބާރުލުން ނުލިބޭނަމަ ސަރުކާރުން ކުރިއަށް ގެންދަން ބޭނުންވާ ކަންކަން ކުރިއަށް ގެންދިއުމަށް ހުރަސްތަކެއް ހުންނާނެ ކަމަށެވެ.
އެހެންކަމުން ރައީސް ޑރ.މުއިއްޒު ވަނީ ކުރިއަށް އޮތް ރައްޔިތުންގެ މަޖިލީސް އިންތިހާބުގައި ވޯޓްލާއިރު މިކަންކަމަށް ރައްޔިތުން ވިސްނުމަކީ މުހިންމު ކަމެއް ކަމަށް ވިދާޅުވެ، އާއިލީ މަސްލަތާއި ޕާޓީ މަސްލަހަތުން އެއްކިބާވެ ތިބެ، ހެޔޮ ވިސްނުމަށް ޖާގަ ދިނުމަށް ގޮވައިލައްވާފައެވެ.
Advertisement
This content is created and paid for by advertisers and does not involve Voice Journalists
