ގިނަ ބަޔަކަށް ހިދުމަތްދޭއިރު، ހުޅުމާލެ ހޮސްޕިޓަލްގެ ފެންވަރު ވަރަށް ބޮޑުތަނުން މަތިކުރަންޖެހޭ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސް ޑރ.މުއިއްޒު މިފަދައިން ވިދާޅުވީ، ރައީސް އޮފީހުން ކުރިއަށް ގެންދާ ރައީސްގެ ޖަވާބު ޕްރޮގްރާމުގައި ހުޅުމާލެ، ފްލެޓް ނަންބަރު 51503، މުޙައްމަދު ރިޔާޒް، ހުޅުމާލޭގައި ޞިއްޙީ ޚިދުމަތް ލިބިގަތުމުގައި ދަތިތަކެއް ހުރިކަން ފާހަގަކޮށް ކުރި ސުވާލަށް ޖަވާބު ދެއްވަމުންނެވެ.

މުޙައްމަދު ރިޔާޒް ވަނީ ގާތްގަނޑަކަށް ހުޅުމާލޭގައި ލައްކައެއްހާ މީހުންގެ އާބާދީ އެއް އުޅޭއިރު، ހުޅުމާލެ ހޮސްޕިޓަލް ހުރީ ކުރިން ވެސް ހުރި ހާލަތުގައި ކަމަށާއި، ހުޅުމާލެ ހޮސްޕިޓަލުން އެތެރެ ހަށީގެ މީހަކަށް ދައްކާލަން ގުޅީމައި 500 ނުވަތަ 800 މީހުންގެ ކިޔުއަކަށްދާ މައްސަލަގައި ރައީސް ގެ ހިޔާލުފުޅަކީ ކޮބައިތޯ އަހާފައެވެ.

މިސުވާލަށް ޖަވާބުދެއްވަމުން ރައީސް ޑރ.މުއިއްޒު ވިދާޅުވީ، މުޙައްމަދު ރިޔާޒް ފާހަގަކުރި ކަންތައްތައް ހައްލު ވެގެން ދާނެ ކަމަށެވެ. އަދި އެހާ ގިނަ މީހުންނަށް ޚިދުމަތްދޭއިރު ހުޅުމާލެ ހޮސްޕިޓަލްގެ ފެންވަރު ވަރަށް ބޮޑަށް މަތިކޮށް، އިތުރު ހޮސްޕިޓަލެއް އަޅަން ޖެހޭ ކަމަށް ރައީސް ޑރ.މުއިއްޒު ވަނީ ވިދާޅުވެފައެވެ.

މީގެ އިތުރުުންވެސް ރައީސް ޑރ.މުއިއްޒު ވިދާޅުވީ  މާލެ ސިޓީ ސަރައްހައްދުގެ ސިއްހީ ނިޒާމު ވަރުގަދަ ކުރުމަކީ ސަރުކާރުން ވަރަށް އިސްކަންދޭ ކަމެއް ކަމަށެވެ. އޭގެތެރެއިން ސަރުކާރުން ކުރަމުންދާ މަސައްކަތުގެ ތެރެއިން، ދަރުމަންވަންތަ ހޮސްޕިޓަލާއި ދަރުމަވަންތަ ގްރޫޕް އޮފް ހޮސްޕިޓަލްސް އާއި އައިޖީއެމްއެޗް ގެ އިތުރުން ވިލިމާލެ އަދި ހުޅުމާލެ ހޮސްޕިޓަލް ތަރައްގީކުރުމުގެ މަސައްކަތްތަކެއް ފެށިފައިވާ ކަމަށް އެމަނިކުފާނު ވިދާޅުވިއެވެ.