މިދުވަސްވަރު ރާއްޖޭގައި ފާނަބަސަންދު ފެތުރޭތީ ސަމާލުވުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އެދެފިއެވެ.

އެޗްޕީއޭއިން ވިދާޅުވީ އެ ބަލީގެ ވޭދަނަތައް އިތުރުވާތީ ރައްކާތެރިވުމުގެ ގޮތުން އަޅަން ޖެހޭ ފިޔަވަޅުތައް އާންމުން އެޅުމަކީ ވަރަށް މުހިއްމު ކަމެއް ކަމަށެވެ. ވައިރަހަކުން ޖެހޭ މި ބައްޔަކީ އާންމުކޮށް ކުޑަކުދިންނަށް ޖެހޭ ބައްޔަކަށް ވިޔަސް ބޮޑެތި މީހުނަށް ވެސް މި ބަލި ޖެހުމުގެ ފުރުސަތު އޮންނަ ކަމަށް ވެސް އެ އިދާރާއިން ވަނީ ބުނެފައެވެ.

ފާނަބަސަންދަކީ ވަރަށް ފަސޭހައިން ގައިން ގަޔަށް އަރާ އެއްޗަކަށް ވާއިރު، މި ބަލި ޖެހެނީ ބަލި ޖެހިފައި ހުރި މީހަކު ކެއްސާ ކިނބިހި އަޅާއިރު ނޭވާލާ ނިޒާމުގެ ޒަރިޔާއިންގެ އިތުރުން، ބިހިނަގާފައި ހުރި މީހެއްގެ ގައިގައި ބީހުމުން ނުވަތަ އޭނާ ބޭނުންކޮށްފައި އޮތް ތުވާލި، އަންނައުނު ފަދަ ތަކެތި ބޭނުން ކުރުމުންނެވެ. އަދި ގައިގައި ހުރި ބިހިތައް އެއްކޮށް ކުރަމަގާލިލަންދެން މިބަލި ފެތުރުމުގެ ފުރުސަތުވެސް އޮންނާނެއެވެ.

Advertisement

ބަލީގެ އަލާމާތްތަކުގެ ތެރޭގައި، ހުން އައުން، ވަރުދެރަވުން، ނޭފަތުން ފެން އައުން އަދި ހަމުގައި ފެންއަރާފައި ހުންނަ ބިހިތަކެއް ނެގުން ހިމެނެއެވެ. އެއްފަހަރު ފާނަބަސަންދު ޖެހިއްޖެނަމަ، ދެވަނަ ފަހަރަށް މި ބަލި ޖެހުމުގެ ފުރުސަތު ވަރަށް ކުޑައެވެ.

އެޗްޕީއޭއިން ވަނީ މި ބަލި ޖެހިއްޖެ ނަމަ ގޭގައި އުޅޭ އެހެން މީހުންނާ އެކަހެރިވުމަށާއި ގެއިން ބޭރަށް ނުދިޔުމަށާއި ވެކްސިން ނުޖަހާ ނަމަ އެ ވެކްސިން ފުރިހަމަ ކުރުމަށް އިލްތިމާސް ކޮށްފައެވެ.