ށ. ފުނަދޫގައި އައިސް ޕްލާންޓެއް އެޅުމުގެ މަސައްކަތް، ރޯދަމަހަށް ފަހު ފަށައި، އެ މަސައްކަތް ފަށާތާ، ތިންމަސް ދުވަސް ތެރޭގައި ނިންމަވާނެ ކަމަށް މަސްވެރިކަމާއި ބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.
ށ. ފުނަދޫ ރައްޔިތުންނާއި ރައީސުލްޖުމުހޫރިއްޔާ ބައްދަލު ކުރެއްވުމަށް މިއަދު ބޭއްވި ޖަލްސާގައި ވާހަކަ ދައްކަވަމުން ޝިޔާމް ވިދާޅުވީ ފުނަދޫ ހިމެނޭ ސަރަހައްދަށް އައިސް ޕްލާންޓެއް ބޭނުންވާ ކަމަށް ފުނަދޫ އާއި ށ. އަތޮޅުގެ ގިނަ އަދަދެއްގެ މަސްވެރިން އެބޭފުޅާ އަށް ގުޅުއްވައި ދަންނަވާ ކަމަށެވެ.
އެހެންކަމުން އެމަސައްކަތް ފެށުމަށް މިހާރުވެސް ތައްޔާރުވަމުން އަންނަކަމަށާ، ކުރިއަށް އޮތް ރަމަޟާން މަސް ނިމުމުން އައިސް ޕްލާންޓުގެ މަސައްކަތް ފެށޭވަރު ވާނެ ކަމަށް ޝިޔާމް ވިދާޅުވި އެވެ.
އަޅުގަނޑު މިރަށަށް އަންނަ ކޮންމެ ފަހަރަކު، އަދި މި ރަށުގެ ކައުންސިލުގެ ބޭފުޅުންނާއި، އަދި މިރަށުގެ މަސްވެރި ކުރައްވާ ބޭފުޅުން އަޅުގަނޑަށް ވަރަށް ގިނައިން ގުޅުއްވާފައި ވިދާޅުވޭ، މިހިސާބުން އައިސް ލިބޭނެ ގޮތެއް މި ރަށުގައި ގާއިމް ކޮށްދޭށޭ. އެހެންވީމާ އައިސް ޕްލާންޓެއް އިރާދަކުރެއްވިޔާ ރަމަޟާން މަސް ނިމޭ ހިސާބުން ފެށިގެން، މިހާރު އެއޮތީ އެވޯޑް ކުރުމާއި ހިސާބުގައި، މިފްކޯއަށް އެވޯޑް ކުރުމާއެކު، އިރާދަކުރެއްވިޔާ އެ މަސައްކަތް މިރަށުގައި ކުރިއަށް ދާނެ. އަޅުގަނޑުމެން ނުނަގާނެ، އިރާދަކުރެއްވިޔާ މިދިޔަ ސަރުކާރުހެން އަހަރު ދެ އަހަރެއް. އައިސްޕްލާންޓެއް އެޅޭނެ ގިނަ ވެގެން 6 މަހުން. އަޅުގަނޑުމެންގެ އަމާޒަކީ އައިސް ޕްލާންޓެއް ތިން މަސް ތެރެއިން އެޅުން. އިރާދަކުރެއްވިޔާ ރަމަޟާން މަސް ނިމި، ތިން މަސް ތެރޭގައި އަޅުގަނޑުމެން ޔަގީން ކުރާނަން މި ރަށުގައި އެ އައިސްޕްލާންޓް ގާއިމް ކުރަން.
ވަޒީރު އަހުމަދު ޝިޔާމް
އައިސް ޕްލާންޓުގެ އިތުރުން ފުނަދޫއަކީ ފަރުމަހުގެ މަސްވެރިކަން ކުރާ ރަށަކަށްވުމުން އެ ރަށާ ކައިރީގައި ވަދު ކަނދުފައްޗެއް ބާއްވަން ރައްޔިތުން ބޭނުންވާ ކަމަށާއި އެކަން ވެސް އަންނަ ހުކުރު ދުވަހު ކުރިއަށް ދާނެ ކަމަށް ވަޒީރު ވިދާޅުވިއެވެ.
އަދި ފުނަދޫއަކީ މެރިކަލްޗަރ ކުރިއެރުވޭނެ ރަށަކަށްވުމުން އެ ފުރުސަތުތައް ފަހި ކުރުމަށް ކުރެވެން ހުރި ކަންކަން ވެސް ދިރާސާ ކުރަމުންދާކަމަށް ޝިޔާމް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
