ނޫނު އަތޮޅުގައި އާރުޓީއެލް ފެރީ ނިޒާމް ރަނގަޅު ފެންވަރެއްގައި ފައްޓަވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް ޑރ.މުއިއްޒު މިފަދައިން ވިދާޅުވީ އުތުރުގެ ހަތަރު އަތޮޅަށް މިހާރު ކުރައްވާ ދަަތުރުފުޅު ގެ ތެރެއިން ނ.މަނަދޫ އަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.
ނޫނު އަތޮޅުގައި އާރުޓީއެލްގެ ފެރީގެ ނިޒާމް ނެތްކަން ފާހަގަކުރައްވާ، ރައީސް ޑރ.މުއިއްޒު ވިދާޅުވީ އެކަމާއި ގުޅޭ މަޝްވަރާތައް ފައްޓަވާނެ ކަމަށެވެ. މިކަމާއި ގުޅޭ މާބޮޑު ތަފްސީލެއް އެމަނިކުފާނުގެ ވާހަކަފުޅުގައި ފާހަގަކުރައްވާފައި ނެތް ނަމަވެސް، ނޫނު އަތޮޅުގައި ރަނގަޅު ފެންވަރެއްގައި، އާރުޓީއެލް ފެރީގެ ހިދުމަތް ފައްޓަވާނެ ކަމުގެ ޔަގީންކަން ވަނީ ދެއްވާފައެވެ.
"އަޅުގަނޑު އެއްކަމެއް އެއާއި އެކީގައި ފާހަގަކޮށްލާނަން. ދެންމެގައި ކައުންސިލްގެ ރައީސް ވެސް ފާހަގަކުރެއްވި، އާރުޓީއެލް ފެރީ ނިޒާމް މި އަތޮޅުގައި ނެތްކަން. އަޅުގަނޑު އެކަމާއި ގުޅޭ މަޝްވަރާތައް ފައްޓާނަން. ދެން ތަފްސީލް ދޫކޮށްލާފަ ނަތީޖާގެ ވާހަކަ ދައްކާނީ. ނަތީޖާ އަކަށް ވާނީ އިރާދަ ކުރެއްވިއްޔާ މިއަތޮޅުގައި ރަނގަޅު ފެންވަރެއްގައި ފަށާނަން. އަދި މިރަށުގައި ބޭނުންވާ ފެރީ ޓާމިނަލް ގާއިމުކޮށްދީ އެކަން ކުރިއަށް ގެންދާނަން."
ރައީސް ޑރ.މުއިއްޒު ވިދާޅުވިއެވެ.
މަނަދޫގެ ރައްޔިތުންނާއި ރައީސް ޑރ.މުއިއްޒު ބައްދަލުކުރައްވާ ދެއްކެވި ވާހަކަފުޅުގައި، މިފަދައިން ވެފައި ހުރި ހުރިހާ ވައުދެއް ފުއްދަވާނެ ކަމަށް ވަނީ ވިދާޅުވެފައެވެ. އޭގެ ތެރޭގައި، ކުޅިވަރު ކުޅޭނެ މަލްޓި ސްޕޯޓްސް ކޮމްޕްލެކްސް އެއް ގާއިމު ކުރުން ހިމެނޭހެން އެ ރަށަށް ވެވަޑައިގެންނެވި ހުރިހާ ވައުދެއްވެސް ފުއްދަވާނެ ކަމަށް ރައީސް ޑރ.މުއިއްޒު ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
