ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ހަފްތާ 14 ގައި ހިމެނޭ މަސައްކަތެއް ކަމަށްވާ ލެބޯޓްރީގެ ހިދުމަތް ނުލިބޭ ހުރިހާ ރަށެއްގައި، އެ ހިދުމަތް ގާއިމު ކުރުމުގެ ވައުދުފުޅުގެ ތެރެއިން ކުރިއަށް އޮތް ތިން މަސް ތެރޭ އެ މަސައްކަތް ފެށުމަށް ހެލްތު މިނިސްޓްރީން ތައްޔާރު ވެއްޖެއެވެ.
"ހަފްތާ14" ގެ ތެރޭގައި ހިމެނޭ ސިއްހީ ކަންކަމާ ބެހޭ މައުލޫމާތު ހާމަކުރުމަށް މިއަދު ހެލްތު މިނިސްޓްރީން ކުރިއަށް ގެންދިޔަ އެ މިނިސްޓްރީގެ ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން މިނިސްޓަރު ޑރ. އަބްދުالله ހަލީލް ވަނީ މި ސަރުކާރު އައި ފަހުން މިހާތަނަށް އެ ހިދުމަތް ހަތަރު ރަށެއްގައި އަލަށް އެ ހިދުމަތް ފަށާފައިވާކަން ފާހަގަ ކުރައްވާފައެވެ.
މިނިސްޓަރު ޑރ. އަބްދުالله ހަލީލް ވިދާޅުވީ ރާއްޖޭގައި މީހުން ދިރިއުޅޭ 76 ރަށެއްގައި އަދިވެސް ލެބޯޓަރީގެ ހިދުމަތް ގާއިމުވެފައިނުވާ ކަމަށާއި، މި ރަށްރަށުގައި ކުރިއަށް އޮތް ތިން މަސް ތެރޭގައި ލެބޯޓަރީގެ ހިދުމަތް ގާއިމު ކުރުމަކީ ސަރުކާރުގެ އަމާޒެއް ކަަމަށެވެ. މި ރަށްތަކުގައި ލެބޯޓަރީގެ ހިދުމަތް ގާއިމު ކުރާއިރު، ބޭނުން ކުރާނީ ކުރިއާއި ހިލާފަށް ޕޮއިންޓް އޮފް ކެއާ ޓެސްޓިން މެޝިންތަކެއް ކަމަށާއި، މިއީ ކުރިން ބޭނުންކުރާ މެޝިން ތަކަށް ވުރެ ކުދި މެޝިންތަކަކަށްވި ނަމަވެސް ސައްހަ ނަތީޖާ ގެނެސްދޭނެ ކަމަށް ވެސް މިނިސްޓަރު ވިދާޅުވިއެވެ.
"މިކަން ތައާރަފް ކުރެވިގެން ދިއުމާއެކު މިހާރު ރަށްރަށުގައި ހެދިގެންދާ ޓެސްޓްތަކުގެ އަދަދު 15 ޓެސްޓަށް އިތުރުވެގެންދާނެ. އޭގެ ނަތީޖާއަކީ އެޓެންޑް ކުރަންވީ ބަލި މީހާގެ ކޮން ކަމަކަށްކަން ވަރަށް ސާފުކޮށް އެނގިގެން ދާނެ. މިސާލަކަށް ކިޑްނީގެ މައްސަލައަށް ހުރިއްޔާ އެކަން ފާހަގަކޮށްދޭނެ،"
މިނިސްޓަރު ޑރ. އަބްދުالله ހަލީލް ވިދާޅުވިއެވެ.
މީގެ އިތުރުންވެސް މިނިސްޓަރު ޑރ. އަބްދުالله ހަލީލް ވަނީ ލެބޯޓަރީގެ ހިދުމަތް ނުލިބޭ ރަށްރަށުގައި ހިދުމަތް ފަށަން ބޭނުންވާ ދެބައިކުޅަ އެއްބައި މެޝިން މިހާރު ލިބިފައިވީ ނަމަވެސް މިވަގުތަށް ހުރިހާ ރަށަކަށް މެޝިން ފޮނުވަން ކުޑަ މަޑުޖެހުމެއް އުޅޭކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
