މާދަމާ ފެށުމަށް ހަމަޖެހިފައިވާ އެއާ އެމްބިއުލާންސުން އެއް ދަތުރެއްގައި އިންޑިއާ އަދި ސްރީލަންކާ އަށް ދެވޭނެ ކަމަށް ހެލްތު މިނިސްޓަރު ޑރ.އަބްދުالله ހަލީލް ވިދާޅުވެއްޖެއެވެ.

މިފަދައިން މިނިސްޓަރު ޑރ.އަބްދުالله ހަލީލް ވިދާޅުވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ހަފްތާ 14 ގައި ހިމެނޭ ސިއްހީ ދާއިރާ ގެ ކަންކަމާއި ބެހޭ މައުލޫމާތު ހިއްސާ ކުރެއްވުމަށް ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ.

ޑޭޝް-8 މަރުކާގެ މަތިންދާބޯޓެއް އެއާ އެމްބިއުލާންސްއަކަށް ބަދަލުކޮށް އެ ބޯޓުގައި ބަލި މީހުން ތައިލޭންޑަށް އުފުލޭނެ ކަމަށް މީގެ ކުރިން ރައީސް ޑރ.މުއިއްޒު ވިދާޅުވި ނަމަވެސް، މިއަދު މިނިސްޓަރު ޑރ.އަބްދުﷲ ޚަލީލް ވިދާޅުވީ އެއާ އެމްބިއުލާންސުން ސީދާ ދަތުރުތައް ކުރެވޭނީ ހަމައެކަނި ދެ ގައުމަށް ކަމަށެވެ. އަދި ތައިލެންޑާއި ހިސާބަށް ދަތުރުކުރެވޭނީ އިތުރު ތަނަކަށް މަޑުކުރުމަށް ފަހުގައި ކަމަށާއި މިގޮތަށް މަޑުކުރި ނަމަވެސް މާގިނަ ވަގުތުތަކެއް ނުނަގާނެ ކަމަށް ވެސް މިނިސްޓަރު ޚަލީލް ވިދާޅުވިއެވެ.

އެއާ އެމްބިއުލާންސް ގެ ހިދުމަތާއި ގުޅޭ ގޮތުން މިނިސްޓަރު އިތުރަށް ވިދާޅުވީ އެއާ އެމްބިއުލާންސް އުދުހުމަށް ދިވެހި ސަރުކާރުން ވަނީ ލަންކާއިން ހާއްސަ ހުއްދައެއް ހޯދާފައި ކަމަށާއި، އެގޮތުން ހުއްދަ އަށް ހުށަހަޅާތާ ދެ ގަޑިއިރު ތެރޭގައި އެއާ އެމްބިއުލާންސް އުދުހުމުގެ ހުއްދަ އެގައުމުންދޭ ގޮތަށް ހަމަޖެހިފައިވާ ކަމަށެވެ. އަދި ލަންކާގެ އިތުރުން އެހެން ގައުމުތަކާއެކު ވެސް މިފަދަ އެއްބަސްވުންތައް ގާއިމު ކުރުމުގެ މަސައްކަތް ކުރަމުން އަންނަ ކަމަށް އެބޭފުޅާ ވިދާޅުވިއެވެ.

އެއާ އެމްބިއުލެންސް ގެ ހިދުމަތް ފަށަނީ  ލޭންޑް ކްރާފްޓް ގެ އިތުރުން ސީ ކްރާފްޓަކާއެކު ކަމަށާއި، އޭގެ ބޭނުމަކީ އެއާޕޯޓު ނެތް ނުވަތަ އެއާޕޯޓަކާ ދުރު ރަށަކުން ބަލި މީހަކު އުފުލަން ޖެހިއްޖެ ހާލަތެއްގައި ބޭނުން ކުރުމަށް މިނިސްޓަރު ޚަލީލް ވިދާޅުވިއެވެ.

އޭގެއިތުރުން، އެއާ އެމްބިއުލެންސް ގެ އެތެރޭގައި ގާއިމުކުރަންޖެހޭ ހިދުމަތްތައް މިއަދުގެ ނިޔަލަށް ގާއިމުކޮށް ނިމޭނެ ކަން ފާހަގަކުރައްވާ ޚަލީލް ވަނީ އެ ހިދުމަތަށް ހާއްސަ ފަސް ނަރުހުންނާއި ފަސް ޑޮކްޓަރުން އަދި ފަސް ޓެކްނީޝަނުން ރެކްރޫޓްކޮށްފައިވާ ކަމަށް ވެސް ވިދާޅުވެފައެވެ. އަދި މި ފަރާތްތައް ވެސް މިއަދު ގެ ނިޔަލަށް ތަމްރީނުކޮށް ނިމޭނެ ކަމަށާއި، ކުރިއަށް އޮތް ތަނުގައި އެއާ އެމްބިއުލާންސަށް ހާއްސަ ސިއްހީ ހިދުމަތްތެރިންގެ އަދަދުތައް ޑިމާންޑަށް ބަލާއި އިތުރުކުރަން ޖެހުމަކީ ވެސް އެކަށީގެންވާ ކަންވެސް ޚަލީލް ފާހަގަކުރެއްވިއެވެ.

އެއާ އެމްބިއުލެންސް ގެ ތެރޭގައި އެމަޖެންސީ ހާލަތުގައި ބޭނުންވާ ހުރިހާ ހިދުމަތެއް ލިބޭނެ ކަމަށާއި، އޭގެ ތެރޭގައި، އޮކްސިޖަނާއި ވެންޓިލޭޓަރު އަދި ހިތް ހުއްޓިއްޖެ ހާލަތެއްގައި ބޭނުންކުރާނެ އާލާތްތައް އަދި އިމަޖެންސީގައި ބޭނުންވާނެ އިންޖެކްޝަންތައް ވެސް ބޯޓުގައި ހުންނާނެ ކަމަށް ޚަލީލް ވިދާޅުވިއެވެ.އަދި މޯލްޑިވިއަން ގެ 38 މީހުން އުފުލޭ ވަރުގެ ޑޭޝް 8 މަތންދާބޯޓެއް އެއާ އެމްބިއުލަންސް އަކަށް ބަދަލުކޮށްލަނީ މިވަގުތުން ވަގުތަށް ދެ ބަލި މީހުން އެއްފަހަރާ އުފުލޭ ކެޕޭސިޓީގައި ނަމަވެސް ޑިމާންޑަށް ބެލުމަށްފަހު، ސްޓްރެޗާ އިތުރުކުރަން ޖެހިއްޖެނަމަ އެކަން ކުރެވޭނެ ޖާގަ ވެސް ބޯޓުގައި ހުންނާނެ ކަމަށް  ޚަލީލް ވަނީ ވިދާޅުވެފައެވެ.

ރޭގައި ނ.މަނަދޫ ރައްޔިތުންނާއި ބައްދަލުކުރެއްވުމުގެ ތެރެއިން ރައީސް ޑރ.މުއިއްޒު ވެސް ވަނީ އެއާ އެމްބިއުލެންސް ގެ ހިދުމަތް ތައާރަފް ކުރުމާއި ގުޅޭ ގޮތުން އަލި އަޅުވާލާފައެވެ. މިގޮތުން އެމަނިކުފާނު ވިދާޅުވީ މި ހަފްތާގެ ހުކުރުދުވަހު ފެށިގެންދާ އެއާ އެމްބިއުލެންސް ގެ ހިދުމަތާއި އެކު ، ރާއްޖޭގެ ކޮންމެ ކަންކޮޅަކުންވެސް ކޮންމެ ރަށަކުންވެސް، މެޑިކަލް އިވެކިއުއޭޝަނެއް ހަދަން ޖެހިއްޖެ ހާލަތެއްގައި، އެކަން ކުރުމުގެ ގާބިލުކަން ފަހިވެގެންދާނެ ކަމަށެވެ.