ގިނަ ދުވަސްވެ ބާވެފައި ހުންނަ އެއްގަމު އުޅަނދުތައް ސަރުކާރުން ގަތުމަށް ނިންމައިފިއެވެ.
މާލޭގައި ވެހިކަލްތައް ގިނަވުމުގެ ސަބަބުން އެކަމާ ސުވާލު ކުރުމަށް ރައްޔިތުންގެ މަޖިލީހުގެ ގަވައިދު ކޮމިޓީއަށް ޓްރާންސްޕޯޓު މިނިސްޓަރު މުހައްމަދު އަމީން ހާޒިރުކޮށް ދެއްކެވި ވާހަކަފުޅުގައެވެ. މިގޮތުން އަމީން ވިދާޅުވީ، ސަރުކާރުން ބައިބެކް ނުވަތަ ހަލާކުވެފައި ހުންނަ އުޅަނދުތައް ގަންނަން ނިންމައި އަންނަ އަހަރުގެ ބަޖެޓުގައި އެކަމަށް 500 މިލިއަން ރުފިޔާ ހިމަނާނެ ކަމަށެވެ.
މިއީ މާލެއަށް ދިމާވެފައިވާ އެންމެ ބޮޑު އެއް މައްސަލަ ކަމަށްވާ، ވެހިކަލް ގިނަވުމުގެ މައްސަލައަށް ހައްލެއް ހޯދުމަށް ސަރުކާރުން ކުރުމަށް ނިންމި ކަމެއް ކަމަށް ޓްރާންސްޕޯޓު މިނިސްޓަރު މުހައްމަދު އަމީން ވަނީ ވިދާޅުވެފައެވެ.
"ބައިބެކްގެ ދަށުން އަޅުގަނޑުމެން ބާވެ ހަލާކުވެފަ ހުންނަ އުޅަނދުތައް މިގަންނަނީ. އެކަމަކު އެހާ ބޮޑަށް ހަލާކުނުވެ، ބޭނުންކުރެވޭ ހާލަތުގަ ހުންނަ އުަޅަނދުތައްވެސް އަޅުގަނޑުމެން ގަންނާނަން. މި އުޅަނދުތައް ރީއެކްސްޕޯޓުކޮށްގެން ރަނގަޅު އާމްދަނީއެއް ލިބޭނެ. މއީ އޮސްޓްރޭލިއާ ފަދަ ގައުމުތަކުން ވަރަށް ކާމިޔާބު ކަމާއެކު ކުރިއަށް ގެންގޮސްފައިވާ ޕްރޮގުރާމުތަކެއް."
މިނިސްޓަރު އަމީން ވިދާޅުވިއެވެ.
މިއީ ބައެއް ގައުމުތަކުން ވަރަށް ކާމިޔާބު ކަމާއެކު ކުރިއަށް ގެންގޮސްފައިވާ ކަމެއްކަން ފާހަގަކުރައްވާ މިނިސްޓަރު އަމީން ވިދާޅުވީ، ވެހިކަލް މަދުކުރުމަށް ގިނަ ވިސްނުންތަކެއް އެބަހުރި ކަމަށާއި އެކަމަށް ގިނަ މަސައްކަތްތަކެއް މި ސަރުކާރުން ކުރާނެ ކަމަށެވެ. އޭގެރެއިން މިހާރުވެސް ކޮންމެ ދުވަހަކުވެސް ވެހިކަލް ރެޖިސްޓްރީ ކުރާ އަދަދު މަދުކޮށްފައިވާނެ ކަމަށް ވެސް މިނިސްޓަރު ވަނީ ވިދާޅުވެފައެވެ.
މާލޭގެ މަގުތަކުގައި ވެހިކަލްތައް ގިނަވެ، ތޮއްޖެހުމުގެ މައްސަލަ އަށް ހައްލެއް ގެނައުމަށް ޓްރާންސްޕޯޓް މިނިސްޓްރީ އާއި މޯލްޑިވްސް ޕޮލިސް ސަރވިސް އާއި މާލެ ސިޓީ ކައުންސިލް ގުޅިގެން މިހާރުވެސް ދަނީ މާލެ ސަރަހައްދުގެ މަގުތަކުގައި ހުރި ގިނަ ދުވަސްވީ އުޅަނދުތައް ނައްތާލުމުގެ މަސައްކަތް ކުރަމުންނެވެ.
Advertisement
This content is created and paid for by advertisers and does not involve Voice Journalists
