ފިއުލް ސަޕްލައި މޯލްޑިވްސް (އެފްއެސްއެމް) އިން މޯލްޑިވްސް ޕޯޓްސް ލިމިޓެޑް (އެމްޕީއެލް) އަށް ތެޔޮ ވިއްކުމުގައި ކޮރަޕްޝަން ހިމެނޭ ކަމުގެ ތުހުމަތުގައި މުވައްޒަފުންތަކަކަށް ދައުވާ ކުރުމަށް ޕްރޮސެކިއުޓާ ޖެނެރަލް (ޕީޖީ) އޮފީހުން ކްރިމިނަލް ކޯޓަށް ހުށަހަޅައިފިއެވެ.

ޕީޖީ އޮފީހުން ބުނީ 2019 ވަނަ އަހަރާއި 2020 ވަނަ އަހަރު ތެރޭގައި އެފްއެސްއެމް އިން އެމްޕީއެލްއަށް ތެޔޮ ވިއްކުމުގައި، އެ ކުންފުނިތަކުގެ މުވައްޒަފުން ކޮރަޕްޝަންގެ ޢަމަލުތަކެއް ހިންގައި، ފައިސާއަށް ޚިޔާނާތްތެރިވެފައިވާކަމަށް ތުހުމަތުކުރެވޭ މައްސަލައިގައި ދައުވާ ކުރުމަށް ނިންމާފައިވާ ކަމަށެވެ.

ޕީޖީ އޮފީހުން މި ދައުވާތައް އުފުލާފައިވަނީ 3 މީހެއްގެ މައްޗަށެވެ. މީގެ އިތުރުންވެސް، މި މައްސަލައިގައި އިތުރު 2 މީހެއްގެ މައްޗަށްވެސް ތުހުމަތުކުރެވުނު ނަމަވެސް އެ ދެމީހުންގެ މައްޗަށް ދަޢުވާކުރެވޭ މިންވަރަށް ހެކި ޤާރީނާ ލިބިފައިނުވާތީ، މިވަގުތަށް ދަޢުވާ ނުކުރުމަށް އެ އޮފީހުން ވަނީ ނިންމާފައެވެ.

ޕީޖީ އޮފީހުން ދައުވާ އުފުލު ތިން ފަރާތަކީ އެމްޕީއެލްގެ ޕްރޮކިއުމަންޓް ޑިޕާޓްމަންޓްގެ ޗީފް މެނޭޖަރ، ސ. ފޭދޫ، ވާރުގެ، މުޙައްމަދު އައިމަން އާއި އެފްއެސްއެމްގެ ތެޔޮ ބައުޒަރު ޑްރައިވަރު ބަނގްލަދޭޝް ރައްޔިތެއްކަމަށްވާ ސޮޖިބް ގެ އިތުރުން، އެމްޕީއެލްގެ ޕްރޮކިއުމަންޓް ޑިޕަރޓްމަންޓްގެ އެސިސްޓެންޓް މެނޭޖަރު  ސ. މަރަދޫ އާޒާދުގެ ޙަސަން ދީދީ ގެ މައްޗަށެވެ.

މީގެ ތެރެއިން މުޙައްމަދު އައިމަން ގެ މައްޗަށް ދެ ދައުވާ އެއް ވަނީ ކޮށްފައެވެ. އެއީ ޚިޔާނާތްތެރިވުމުގެ ކުށުގެ ދަޢުވާ އާއި މީހަކަށް ކަމެއް އޮޅުވާލުމުގެ ނިޔަތުގައި، އެނގިހުރެ، ޞައްޙަނޫން ލިޔުމެއްގެ ތެދުކަން ދެއްކުމުގެ ދައުވާއެވެ. މި ދެ ދައުވާ އޭނަ ގެ މައްޗަށް ސާބިތުވެއްޖެ ނަމަ 3 އަހަރާއި 11 މަހާއި 30 ދުވަހުގެ ޖަލު ހުކުމެއް އަންނާނެއެވެ.

ބަނގްލަދޭޝް ރައްޔިތެއްކަމަށްވާ ސޮޖިބް ގެ މައްޗަށް ޕީޖީން އުފުލާފައިވަނީ ޚިޔާނާތްތެރިވުމުގެ ކުށުގެ ދަޢުވާ އާއި މީހަކަށް ކަމެއް އޮޅުވާލުމުގެ ނިޔަތުގައި އެނގިހުރެ ޞައްޙަނޫން ލިޔުމެއް އުފެއްދުމުގެ ދައުވާއެވެ. މި ދެ ދައުވާ ސޮޖިބް ގެ މައްޗަށް ސާބިތުވެއްޖެ ނަމަ 3 އަހަރާއި 11 މަހާއި 30 ދުވަހުގެ ޖަލު ހުކުމެއް އަންނާނެއެވެ.

މި ދެމީހުންގެ އިތުރުން ދެން ޕީޖީ އޮފީހުން ދައުވާ އުފުލި އަނެއް ފަރާތަކީ ޙަސަން ދީދީއެވެ. އޭނާގެ މައްޗަށް މީހަކަށް ކަމެއް އޮޅުވާލުމުގެ ނިޔަތުގައި ޞައްޙަނޫން ލިޔުމެއް އުފެއްދުމުގެ ދައުވާ އުފުލާފައިވާއިރު، މި ދައުވާ ސާބިތުވެއްޖެ ނަމަ، 9 މަހާއި 18 ދުވަހުގެ ޖަލު ހުކުމެއް އަންނާނެއެވެ.

ޕީޖީ އޮފީހުން ބުނީ ޚިޔާނާތްތެރިވީކަމަށް ތުހުމަތުކުރެވޭ ފައިސާގެ ތެރެއިން 6.7 މިލިއަން ރުފިޔާގެ ބައި އެ އޮފީހަށް ބަލައިގަނެފައިވާ ކަމަށާއި، މައްސަލައިގެ ތަޙުޤީޤު އަދިވެސް ކުރިއަށްދާތީ، އިތުރު ބައިތަކުގެ ތަޙުޤީޤު ނިމުމުން، ތުހުމަތުކުރެވޭ އިތުރު މީހުންގެ މައްޗަށް ދަޢުވާކުރުމާމެދު ގޮތެއް ނިންމާނެކަމަށެވެ.