ކުރީގެ ރައީސް ޔާމީން އަބްދުލްގައްޔޫމް ގެ އަނގަމަތީގައި މަލަން އަޅާފައިވާ ކަމަށާ، އޭގެ ސަބަބުން އެކިއެކި ވާހަކަތައް ދައްކަމުންދާއިރުވެސް އެވާހަކަތަކަށް ރައްދު ނުދެއްވޭ ކަމަށް އެމަނިކުފާނު ވިދާޅުވެއްޖެެއެވެ.
ރޭ ޕީއެންއެފް އޮފީހުގައި، އެ ޕާޓީގެ ފަރާތުން، މަޖިލީހަށް ވާދަކުރައްވާ ކެންޑިޑޭޓުންނާއި ސުވާލުކޮށް, އެ ކެންޑިޑޭޓުންގެ ސިޔާސަތުތައް ހާމަ ކުރުމަށް ބޭއްވުނު ޖަލްސާގައި ވާހަކަ ދައްކަވަމުން ރައީސް ޔާމީން ވަނީ، ޕޯޑިއަމްތަކުގައި ރައްޔިތުންނާއި މީޑިއާ ތަކުން ކުރާ ސުވާލު ތަކަށް ޖަވާބު ދިނުން އެމަނިކުފާނަށް އަދިވެސް މަނާ ކަމަށެވެ. އަދި އެއީ ވަރަށް ބޮޑު މައްސަލައެއް ކަމަށް ވިދާޅުވި އެވެ.
ތެދެއްމެ، ޝަރުޢީ ދާއީރާގައި އޮތް ކަމެއް ވީމާ، ޝަރުޢީ ދާއިރާއިން މިކަން ނިމޭ ދުވަހަކުން ނިމިގެން ދިޔުމަކީ އެކަން އޮންނާނެ ގޮތް. އެކަމަކު، މިއީ އަޅުގަނޑުމެން ގެނައި ސަރުކާރެއް. އެހާ ބޮޑު ގާނޫނީ ހުރަހެއް، ނުވަތަ، އެހާ ބޮޑަށް ރައްޔިތުން ކުށްވެރި ކުރާ ކަމަކަށް ވާނެތޯ އަޅުގަނޑު ޕޯޑިއަމް ތަކުގައި ވާހަކަ ދެއްކުމާއި، ޓީވީ އިންޓަވިއުތައް ދިނުމާއި، ތަންތަނަށް ދަތުރު ކުރުމަށް ހުއްދަ ދިނުމަކީ މި ސަރުކާރަށް ދަތިވެދާނެ ކަމެއްތޯ؟
ކުރީގެ ރައީސް، ޔާމީން އަބްދުލްގައްޔޫމް
ރައީސް ޔާމީން އިތުރަށް ވިދާޅުވީ އެމަނިކުފާނު ރަށު ބަންދަށް ބަދަލު ކުރެއްވި ފަހުން ޕީޕީއެމް އޮފީހަށް ވަޑައިގެންނެވި ކަމަށާ، އޭރު އެ އޮފީހަށް ގިނަ ބަޔަކު ވަދެ ނުކުމެ، އަދި ޕީޕީއެމަށް ވެސް ގިނަ ބަޔަކު ސޮއި ކޮށް ފޯމު ހުށަހަޅަމުން ދިޔަ ކަމަށެވެ.
އެހެންނަމަވެސް، އެތަނުގެ އިދާރީ އިންތިޒާމްތައް ހުރީ ރަނގަޅަށް ނޫން ކަމަށާ، ސެކެރެޓަރީ ޖެނެރަލްއެއްވެސް އަދި ޕާޓީ ހިންގާމެ ފަރާތެއްވެސް ނެތް ކަމަށް އެމަނިކުފާނު ވިދާޅުވިއެވެ. ހަމައެހެންމެ، ޕީޕީއެމް/ޕީއެންސީގެ އިސް ލީޑަރުންގެ ތެރެއިންވެސް މިހާރުގެ ފިޝަރީޒް މިނިސްޓަރ އަހުމަދު ޝިޔާމް އާއި، މާލެސިޓީ ކައުންސިލްގެ ހުޅުމާލޭ ދާއިރާގެ ކައުންސިލަރު އިބްރާހީމް ޝުޖާއު ފިޔަވައި އެހެން ބޭފުޅެއް އެ އޮފީހަށް ވަޑައިނުގަންނަވާ ކަމަށް އެމަނިކުފާނު ވިދާޅުވި އެވެ.
އަޅުގަނޑަށް މިއުޅެނީ މި ވާހަކަތައް ޓީވީ ކުރިމަތީގައި ރައްޔިތުންްނަށް އޮޅުން ފިލާވަރަށް ނުބުނެވިގެން. އެކަމަކު އަޅުގަނޑަށް މިވާހަކަ ނުބުނެވުނީމަ، އަޅުގަނޑުގެ އަޚުންގެ ގޮތުގައި، މިއަދުގެ ސަރުކާރުގެ މަގާމުތަކުގައި ތިއްބެވި ބޭފުޅުން، މީގެ ނާޖާއިޒް ފައިދާ ވަރަށް ބޮޑަށް އެބަ ނަންގަވާ. އަޅުގަނޑު އަޅުގަނޑުގެ ޕާޓީ ދޫކޮށްފައި ނުކުތީތޯ. ނޫނީ ކިހިނެއް ވެގެންތޯ އަޅުގަނޑު ނުކުތީ.
ކުރީގެ ރައީސް ޔާމީން އަބްދުލްގައްޔޫމް
މިއާއެކު ރައީސް ޔާމީން ވަނީ ޕީޕީއެމް ދޫކޮށް ދިޔަ ސަބަބުތައް ތަފްސީލުކޮށް ރައްޔިތުންނާއި ވާހަކަދެެއްކެވުނުހާ އަވަހަކަށް ކިޔާ ދެއްވާނެ ކަމަށް ވިދާޅުވެފައެވެ.
"އަޅުގަނޑަށް އުނދަގޫ ވެގެން މި އުޅެނީ، އަޅުގަނޑު ހިފަހަށްޓާފައި، އަނގަމަތީގައި މަލަން އަޅާފައި، ކަންކަން ހިނގީ މިހެންނޭ، އެހެންނޭ، ކިޔާފައި ވާހަކަ ދެއްކީމަ ދެން ތަންކޮޅެއް އުނދަގޫ ވެގެން މި އުޅެނީ. އެއީ ދެން އެ ފެންވަރުގައި ތިއްބެވި ބޭފުޅުންނާ ވަރަށް އެކަށީގެން ނުވާ ދަށުދަރަޖައިގެ ކަންކަން އެ ކުރައްވަނީ،"
ކުރީގެ ރައީސް ޔާމީން އަބްދުލްގައްޔޫމް
ރައީސް ޔާމީން މި މޭރުމުން ވާހަކަ ދައްކަވާފައި މިވަނީ، ދާދިފަހުން ރައީސުލްޖުމްހޫރިއްޔާ ޑރ މުހައްމަދު މުޢިއްޒު ށ. މިލަންދޫއަށް ކުރެއްވި ދަތުރުފުޅުގައި، އެ ރަށު ރައްޔިތުންނާ އެމަނިކުފާނު ބައްދަލުކުރެއްވުމަށް ބޭއްވި ޖަލްސާގައި، އެމަނިކުފާނުގެ ހާއްސަ އެޑްވައިޒަރު އަބްދުއްރަހީމް އަބްދުالله (އަދުރޭ) ނުސީދާ ގޮތެއްގައި ރައީސް ޔާމީން އަބްދުލްގައްޔޫމަށް ބަހުގެ ހަމަލާތަކެއް އަމާޒުކުރެއްވުމާއި ގުޅިގެން ކަމަށް ބެލެވެއެވެ.
"އަޅުގަނޑުމެން މި ތިބީ ފުރަތަމަ ދުވަހު ނުކުތް ސިޔާސީ ފިކުރާ އެކީގައި އަދިއަދަށް ވެސް. އަޅުގަނޑުމެން ދޫކޮށްފައި ބޭފުޅުން ވަޑައިގަތުން އެއީ އަޅުގަނޑުމެން ކުށްވެރިވާ ކަމެއް ނޫން. އަޅުގަނޑުމެން އެކަމާ ދޭތެރޭގައި ކަންބޮޑުވޭ، ދެރަވޭ،" އަދުރޭ ވިދާޅުވިއެވެ.
މީގެ އިތުރުން އަދުރޭ ވަނީ "ވަކި ބޭފުޅަކަށްޓަކައި ދުނިޔެ ހުއްޓި ނޯންނާނެ" ކަމަށްވެސް ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
