ކައުންސިލްތަކުގައި މަސައްކަތްކުރާ އިދާރީ މުވައްޒަފުން ނުވަތަ ސިވިލް ސާވަންޓުންނަށް ތައުލީމު ހާސިލުކުރުމުންދާ މިންވަރާއި އެއްވަރަށް މުސާރައިގެ ކުރިއެރުން ލިބޭގޮތް ހަދަން ގާނޫނަށް ގެންނަންޖެހޭ ބަދަލުތައް ގެނެސް، އެ ކަން ކޮށްދެއްވާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ރައީސުލްޖުމްހޫރިއްޔާ މިފަދައިން ވިދާޅުވީ، އާންމުންނަށް ސީދާ ރައީސާ ސުވާލުކުރެވޭ "ރައީސްގެ ޖަވާބު" ސިލްސިލާގެ މިއަދުގެ ޕްރޮގްރާމްގައި ނ. މަނަދޫ ކައުންސިލް އިދާރާގެ މުވައްޒަފެއްކަމަށްވާ، އެ ރަށު، ހޭޅި، ޢައްޒާ ޢަބްދުލްޣަފޫރު، ލޯކަލް ކައުންސިލްތަކުގެ އިދާރީ މުވައްޒަފުންގެ މުސާރައާ ޢިނާޔަތްތައް އެހެން ދާއިރާތަކުގައި ބޮޑުވާ ގޮތަށް ބޮޑު ނުވާތީ ކަންބޮޑުވުން ފާޅުކޮށް ކުރެއްވި ސުވާލަށް ޖަވާބުދެއްވަމުންނެވެ.
އެގޮތުން ކައުންސިލް ތަކުގެ އިދާރީ މުވައްޒަފުންގެ މުސާރަ، އެ މުވައްޒަފުންގެ ތަޢުލީމީ ފެންވަރު މަތިވި ނަމަވެސް ބޮޑު ނުވާތީ އެ މައްސަލަ ހައްލު ކުރުމަށް ސަރުކާރުން ކުރާނެ ކަންކަމާއި ގުޅޭގޮތުން ވަނީ ސުވާލުކޮށްފައެވެ.
އެ ސުވާލަށް ޖަވާބުދެއްވަމުން ރައީސް މުއިއްޒު ވިދާޅުވީ، ރައްޔިތުންނަށް ޚިދުމަތް ފޯރުކޮށްދިނުމުގައި ކައުންސިލްތަކުގެ މުވައްޒަފުން ރެޔާއި ދުވާލުކުރާ ބުރަ މަސައްކަތް ވަރަށް ގާތުން ދެކެވަޑައިގެންފައިވާ ކަމަށެވެ. އަދި އެމަނިކުފާނު މާލޭގެ މޭޔަރަކަށް ހުންނަވައިގެން މުވައްޒަފުންގެ މުސާރައިގެ ކަންކަމުގައި އުޅުއްވުމުން އެ ކަމުގައި ހުރި ގާނޫނީ ހުރަސްތައް ވެސް ވަރަށް ރަނގަޅަށް އެނގިވަޑައިގަންނަވާ ކަމަށް އެ މަނިކުފާނު ވިދާޅުވިއެވެ.
"ރައްޔިތުންގެ މަޖިލީހުން ކެޓަގަރައިޒްކޮށްފައި އޮންނަ ގޮތުން ކައުންސިލްތައް މި ވަނީ އެންމެ ދަށް ފަންތީގައި ކެޓަގަރައިޒްކޮށްފައި. އެހެންނަމަވެސް އަޅުގަނޑުމެންގެ ޕޭ ސްޓްރަކްޗާ ހެދުމުގެ ތެރޭގައި ތި ކަމަށް ހައްލެއް ގެންނަން އަޅުގަނޑު ބޭނުން،"
ރައީސުލްޖުމްހޫރިއްޔާ ޑރ މުހައްމަދު މުޢިއްޒު
ރައީސް މުޢިއްޒު ވިދާޅުވީ، އެހެން އޮފީސްތަކާ ހިލާފަށް ކައުންސިލްތަކުގައި މަސައްކަތްކުރާ ސިވިލް ސާވަންޓުންނަކީ އަބަދު ވެސް ޚިދުމަތްދޭންޖެހޭ ބައެއް ކަމަށެވެ.
އަދި އެފަރާތްތަކުގެ މުސާރަ ބޮޑުކުރުމުގައި ގާނޫނީ ހުރަސްތަކެއް ހުރިކަމަށާ، ސިވިލް ސާވިސް ކޮމިޝަނާއި އެލްޖީއޭއާ ދޭތެރޭގައި ވެސް ހިޔާލު އެއްގޮތް ނުކުރެވިފައި ހުރީ ގާނޫނީ މައްސަލަތަކެއް ހުރި ކަމަށް އެމަނިކުފާނު ވިދާޅުވިއެވެ.
"މަޖިލީސް ތެރެއިން ހައްލުކުރަންޖެހޭ ބައެއް ގާނޫނީ މާއްދާތަކަށް ގެންނަންޖެހޭ އިސްލާހުތައް ވެސް ހުރި ކަމެއް މިއީ،"ރައީސް މުޢިއްޒު ވިދާޅުވި އެވެ.
ރައީސް ވިދާޅުވީ، ކައުންސިލަތަކުގައި މަސައްކަތްކުރާ އިދާރީ މުވައްޒަފުންނަށް ވެސް ތައުލީމާ އެކު މުސާރައިގެ ކުރިއެރުން ލިބޭނެ ގޮތް ހައްދަވައިދެއްވަން މަޖިލީހުގެ ތެރެއިން މަސައްކަތް ކޮށްދެއްވާނެ ކަމަށެވެ.
Advertisement
This content is created and paid for by advertisers and does not involve Voice Journalists
