އެހީ ހޯދަން އެއްވެފައި ތިބި ފަލަސްތީނުގެ އާއްމު ރައްޔިތުންނަށް އަމާޒުކޮށް، އިސްރާއީލުގެ ނިރުބަވެރިން ހިންގި ގަތުލުއާންމު ކުށްވެރިކޮށް ފިޔަވަޅު އެޅުމަށް ރާއްޖެއިން ބައިނަލްއަޤްވާމީ މުޖުތަމައަށް ގޮވާލައިފިއެވެ.

ޣައްޒާ ސިޓީގެ ދެކުނުން އިންސާނީ އެހީއަށް އިންތިޒާރު ކުރަމުން ދިޔަ ފަލަސްޠީނުގެ އާއްމުންނަށް އަމާޒުކޮށް އިސްރާއީލު ސިފައިން އިއްޔެ ވަރުގަދަ ގަތުލު ޢާއްމެއް ހިންގާފައިވާއިރު، އެ ގަތުލު ޢާއްމުގައި ފަލަސްތީނުގެ 104 މީހުން ޝަހީދުވެ، 760 މީހުން ޒަޚަމްވެފައިވާ ކަމަށް އެންކްލޭވްގެ ހެލްތު މިނިސްޓްރީން ބުނެއެވެ.

އެކަމާއި ގުޅިގެން ދިވެހިރާއްޖޭގެ ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ އިންސާނީ އެހީގެ އިންތިޒާރުގައި ތިބި ހަތިޔާރު ނެތް ފަލަސްތީނުގެ އާންމުންނަށް އިސްރާއީލުގެ ސިފައިން ދިން ނިރުބަވެރި ހަމަލާ ދިވެހި ސަރުކާރުން އެންމެ ހަރުކަށި އިބާރާތުން ކުށްވެރިކުރާ ކަމަށެވެ.

ފޮރިން މިނިސްޓްރީން ބުނީ، ސަތޭކައަށް ވުރެ ގިނަ މައުސޫމް އާންމުންގެ ފުރާނަ ގެއްލި، އިތުރު އެތައް ސަތޭކަ މީހުންނަށް އަނިޔާ ލިބުނު މި އަނިޔާވެރި ހަމަލާއަކީ ބައިނަލްއަގްވާމީ ގާނޫނުތަކާއި އިންސާނީ ހައްގުތަކުގެ މިންގަނޑުތަކާ ވަރަށް ބޮޑަށް ހިލާފު ހަމަލާއެއް ކަމަށެވެ. 

މިއާއެކު އެ މިނިސްޓްރީން ވަނީ ބައިނަލްއަޤްވާމީ ޤާނޫނާ އެއްގޮތަށް އާންމުންގެ ރައްކާތެރިކަން ކަށަވަރުކުރުމަށްޓަކައި ވީހާވެސް އަވަހަށް ހަނގުރާމަ ހުއްޓާލުމަކަށް ގެނައުމަށް ގޮވާލާފައެވެ. އަދި އެ ޖަރީމާ ހިންގި ފަރާތްތަކާއި ދެކޮޅަށް އަވަހަށް ފިޔަވަޅު އަޅައި އެ އަމަލު ހިންގި ފަރާތްތައް ޒިންމާދާރުކުރުވަން ބައިނަލްއަޤްވާމީ މުޖުތަމައަށް ރާއްޖެއިން ވަނީ ގޮވާލާފައެވެ.

އެ ބަޔާނުގައި އިތުރަށް ބުނީ، ދިވެހި ސަރުކާރާއި ދިވެހި ރައްޔިތުން ތިބީ ފަލަސްތީނުގެ ރައްޔިތުންނާ އެކު ވަރުގަދަ އެއްބައިވަންތަކަމެއްގައި ކަމަށާ، މި ސަރަހައްދުގައި އިންސާފުވެރި، ދެމިއޮންނަ ސުލްހައެއް ހޯދުމަށް އަމާޒުކޮށްގެން ކުރާ މަސައްކަތްތަކަށް ތާއީދު ކުރުމުގައި ސާބިތުކަމާއެކު ދެމިތިބޭނެ ކަމަށެވެ.

ޣައްޒާގެ ހުޅަނގުދެކުނުގައި އެހީގެ ޓްރަކުތަކުގެ އިންތިޒާރުގައި އެއްވެފައި ތިބި އެތައް ސަތޭކަ ބައެއްގެ ތެރެއަށް ނިރުބަވެރި އިސްރާއީލުން ހަމަލާދިން މަންޒަރު ދުށް މީހުން ބުނާ ގޮތުގައި އިސްރާއީލްގެ ސިފައިން ހަމަލާދިންއިރު، ދޯވާރު އަލް ނަބްލޫސީ ކައިރީގައި އެހީ ލިބޭނެ ކަމުގެ އިންތިޒާރުގައި ފަލަސްތީނުގެ އެތައް ސަތޭކަ ބަޔަކު އެއްވެފައި ތިއްބެވެ.

ފަލަސްތީނު ސަރުކާރުގެ މީޑިއާ އޮފީހުން ތުހުމަތުކުރާ ގޮތުގައި އިސްރާއީލުގެ އަސްކަރިއްޔާއިން އެ މީހުންނަށް ހަމަލާދީފައިވަނީ ކާބޯތަކެއްޗާއި އެހީ ހޯދުމަށް އެ ސަރަހައްދުގައި އެމީހުން ތިބިކަން އިސްރާއީލަށް އެނގިތިބެ ގަސްތުގައެވެ.

އިސްރާއީލްގެ ޔަހޫދީން ހިންގި މި ގަތުލު އާންމު ފަލަސްތީނުގެ ލީޑަރުންނާއި އަވަށްޓެރި ގައުމުތަކުންވެސް ވަނީ ކުށްވެރިކޮށްފައެވެ.

އޮކްޓޯބަރ 7 ވަނަ ދުވަހުން ފެށިގެން ނިރުބަވެރި އިސްރާއީލުން ހިންގަމުންދާ ގަތުލުޢާއްމުގައި މިހާތަނަށް ފަލަސްޠީނުގެ 30،035 މީހުން ޝަހީދުވެ، 70،457 އަށްވުރެ ގިނަ މީހުން ވަނީ ޒަޚަމްވެފައެވެ.