ރައީސުލްޖުމުހޫރިއްޔާ ޑރ.މުހައްމަދު މުއިއްޒު ރާއްޖޭގެ ދެ އަތޮޅަކަށް ކުރައްވާ ދަތުރުފުޅެއްގައި ފުރާވަޑައިގެންފިއެވެ.

އެމަނިކުފާނުގެ މި ދަތުރުފުޅުގައި ވަޑައި ގަތުމަށް ހަމަޖެހިފައިވަނީ ރ އަދި ބ އަތޮޅަށެވެ.

ރައީސްގެ މި ދަތުރުފުޅުގައި އެންމެ ފުރަތަމަ ވަޑައިގެންވުމަށް ހަމަޖެހިފައިވަނީ ރ. އަލިފުއްޓަށެވެ. 

ރައީސް ޑރ، މުޢިއްޒުގެ މި ދަތުރުފުޅުގައި ވަޑައިގަންނަވާ ރަށްތަކުގެ ތެރޭގައި ރ. އަލިފުށި، ރ. މީދޫ، ރ. އުނގޫފާރު، ރ. ދުވާފަރު، ރ. އިނގުރައިދޫ، ބ. އޭދަފުށި، ބ. ހިތާދޫ، ބ. ތުޅާދޫ، ބ. ކެންދޫ އަދި ބ. ދަރަވަންދޫ ހިމެނެއެވެ.

ރައީސް ޑރ.މުހައްމަދު މުއިއްޒުގެ މި ދަތުރުފުޅަކީ ރާއްޖޭގެ ވެރިކަން ލިބިވަޑައި ގެންނެވުމަށްފަހު މިރަށްތަކަށް ކުރައްވާ ފުރަތަމަ ދަތުރުފުޅެވެ. މީގެ ކުރިން އެމަނިކުފާނުވަނީ ރާއްޖޭގެ ދެކުނާއި އުތުރުގެ ބައެއް އަތޮޅުތަކަށް ދަތުރު ކުރައްވާފައެވެ.

ރައީސުލްޖުމްހޫރިއްޔާ ޑރ. މުއޢިްޒު މިއަދު މި ފެއްޓެވި ދަތުރުފުޅުގައިވެސް ރަށްރަށުގެ ރަށުކައުންސިލްތަކާއި އތމކ ތަކާއި ބައްދަލު ކުރެއްވުމުގެ އިތުރުން ބައެއް ރަށްރަށުގެ ރައްޔިތުންނާއި ބައްދަލުކުރައްވާ އެފަރާތްތަކުގެ ހުރި ކަންބޮޑުވުންތައް ގާތުން ބެއްލެވުމަށް ވަނީ ހަމަޖެހިފައެވެ.

ރައީސްގެ މި ދަތުރުފުޅުގައި އެމަނިކުފާނުގެ ކެބިނެޓުގައި ހިމެނި ވަޑައިގަންނަވާ ބައެއް ވަޒީރުންނާއި ސަރުކާރުގެ ބައެއް ކުންފުނިތަކުގެ އިސްވެރިން ބައިވެރިވެ ވަޑައިގަންނަވާނެއެވެ.