ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވެރިކަމަށް ފުރަތަމަ އައުމާއެކީގައި ކުރަން ފެއްޓެވި ކަމަކީ ޑިމޮކްރެޓިކް ނިޒާމު ހަލާކުކޮށްލައި ހުދުމުހުތާރު ވެރިކަމަކަށް ބަދަލުކުރެއްވުމުގެ މަސައްކަތް ކަމަށް ކުރީގެ ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ރައީސް ޞާލިހު މިފަދައިން ވިދާޅުވީ ދަނޑިކޮށި ޖަގަހައިގައި އެމްޑީޕީން ރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ.މިގޮތުން ރައީސް ޞާލިހު ވަނީ ގާނޫނު އަސާސީން ރައްޔިތުންނަށް ދީފައިވާ ހައްގުތައް ހިފެހެއްޓުމުގެ މަސައްކަތް ވެސް ރައީސް ޑރ.މުއިއްޒު ކުރައްވާ ކަމަށް ވިދާޅުވެފައެވެ.
އެނގިވަޑައިގަންނަވާނެ މި ސަރުކާރު ވެރިކަމަށް ފުރަތަމަ އައުމާއެކީގައި ކުރަން ފެއްޓި ކަމަކީ މި ޑިމޮކްރެޓިކް ނިޒާމު ފައްކާވެފައި މި އޮތް ޑިމޮކްރެޓިކް ނިޒާމު ހަލާކުކޮށްލައި ހުދުމުހުތާރު ވެރިކަމަކަށް ބަދަލުކުރުމުގެ މަސައްކަތް. ދޮގު ހަދައި އޮޅުވާލުމުގެ އިތުރަށް މި ދެންނެވިހެން ގާނޫނުއަސާސީން އަޅުގަނޑުމެންނަށް ދީފައިވާ ހައްގުތައް ހިފެހެއްޓުމުގެ މަސައްކަތް،"
ރައީސް ޞާލިހު ވިދާޅުވިއެވެ.
އެގޮތުން އެންމެ ފުރަތަމަވެސް ނޫސްވެރިކަމުގެ މިނިވަންކަން ހުއްޓުވުމަށް މަސައްކަތް ކުރެއްވި ކަމަށާއި ބްލޮކްކުރި ސައިޓްތައް ދޫކޮށްލީ ޕްރެޝަރުގެ ސަބަބުން ކަމަށް ވެސް ރައީސް ޞާލިހު ވިދާޅުވިއެވެ. އެހެންކަމުން ކުރިއަށް އޮތް ރައްޔިތުންގެ މަޖިލިސް އިންތިހާބު އެމްޑީޕީއަށް ކާމިޔާބުކުރުން މުހިންމުކަމަށާއި، މެޖޯރިޓީ އެމްޑީޕީއަށް ނުލިބިއްޖެނަމަ އަނެއްކާވެސް ވެބްސައިޓްތައް ބަންދުކުރާނެ ކަމަށް ވެސް އެމަނިކުފާނު ވިދާޅުވިއެވެ.
މި ސަރުކާރު ވެރިކަމަށް އައުމަށްފަހު ރައްޔިތުންގެ މަޖިލީހުގެ ބާރު ކަނޑުވާލަން މަސައްކަތް ކުރި ކަމަށް ވިދާޅުވެ ރައީސް ޞާލިހު ވިދާޅުވީ އެތަނުގެ އަގު ވައްޓާލައި ގާނޫނުއަސާސީން ލިބިދީފަައިވާ ބާރުތައް ނިގުޅައިގަތުމަށްޓަކައި ވެސް ރައީސް ޑރ.މުއިއްޒު މަސައްކަތްކޮށްފައިވާ ކަމަށެވެ.
Advertisement
This content is created and paid for by advertisers and does not involve Voice Journalists
