ޝަރީއަތްތަކުގައި ދިވެހިބަހުން ދައްކާ ވާހަކަ އޮޓޯއިން ތާނައިން ލިޔެވޭ ސޮފްޓްވެއާ، "ކޭލި" މިއަދު އިފްތިތާހްކޮށްފިއެވެ.

މިކަމަށް ބޭއްވި ރަސްމިއްޔާތެއްގައި މި ސޮފްޓްވެއަރ އިފްތިތާހުކޮށްދެއްވީ ދިވެހިރާއްޖޭގެ އުއްތަމަފަނޑިޔާރު ޑރ.މުއުތަސިމް އަދުނާނެވެ. މިއީ ޝަރުއީ ދާއިރާގެ އިތުރުންވެސް މަޖިލީހާއި އެކިއެކި މުއައްސަސާތަކުން ޔައުމިއްޔާތައް ލިއުމާއި، މަޖިލީހުގެ ކޮމިޓީތަކުގައި ދެކެވޭ ވާހަކަތައް ލިއުމާއި، އިދާރާތަކުން ކުރާ ތަހުގީގުތައް ވަގުތުން ލިއުމަށް ބޭނުންކުރެވޭނެ ގޮތަށް ފަރުމާ ކޮށްފައިވާ ސޮފްޓްވެއަރއެކެވެ.

މި ސޮފްޓްވެއަރގެ އެހީގައި ރެކޯޑިންގތައް އަޕްލޯޑް ކުރުމަށްފަހު، ތާނަ އަކުރަށް ބަދަލު ކުރުމުގެ އިތުރުން، ލައިވްކޮށް ދެކެވޭ ވާހަކަތައްވެސް ދިވެހި ބަހުގެ އަކުރަށް ވަގުތުން ބަދަލުކުރެވޭނެއެވެ.

މި ސޮފްޓްވެއަރ އިފްތިތާހުކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން އުއްތަމަފަނޑިޔާރު ވިދާޅުވީ، މިއީ ޖުޑީޝަރީއަށް އެތައް ފައިދާތަކެއް ވާނެ މަސައްކަތެއްކަމަށާއި، މި ޕްރޮގްރާމް ބޭނުން ކުރުމުން ޝަރީއަތްތަކާ ގުޅުންހުރި މަސައްކަތްތަކުން އެތައް ވަގުތެއް އަވަސްވެގެންދާނެ ކަމަށެވެ. އަދި ޝަރީއަތް ނިމުނު ގޮތުގެ ރިޕޯޓު އޮންނަ މުއްދަތުގައި ފޯރުކޮށްދިނުމަށް ވެސް މިސޮފްޓްވެއަރ އެހީއަކަށް ވެގެންދާނެކަން އުއްތަމަފަނޑިޔާރު ފާހަގަކުރެއްވިއެވެ. 90 އިންސައްތަ އެކިއުރޭޓް މި ސޮފްޓްވެއަރ، ކުރިއަށް އޮތް ދުވަސްތަކުގައި ބޭނުންހިފާވަރަކަށް އިތުރަށް ތަރައްގީކުރެވެމުން ދާނެކަމަށް ވެސް ވިދާޅުވިއެވެ.

މީގެ ކުރިން 30 މިނެޓްގެ ބަޔާނެއް ޓައިޕްކުރުމަށް 2 ގަޑިއިރު ހޭދަވި ނަމަވެސް މި ސޮފްޓްވެއަރ މެދުވެރިކޮށް 30 މިނިޓް ގެ ބަޔާންތައް ޓައިޕްކުރުމަށް ހޭދަވާނީ ގިނަވެގެން 3 މިނެޓެވެ.

ދިވެހި ޑިވެލޮޕަރުންގެ ޓީމެއްކަމަށްވާ "އިންޓެލިއަރ"އިން ތައްޔާރުކުރި ސޮފްޓްވެއަރ އަކީ  ކޯޓުތަކާއި ސޮފްޓްވެއަރ ބޭނުންކުރާ އެންމެންނަށްވެސް ލުއިފަސޭހަވެގެންދާނެ ކަމެއްކަން ފާހަގަކުރައްވާ އުއްތަމަފަނޑިޔާރު ވަނީ ރާއްޖޭގައިވެސް އެފަދަ ހުނަރުވެެރި، އައިޓީ ދާއިރާގެ މަސައްކަތްތެރި ފަރާތްތައް ތިބިކަމަށް ވިދާޅުވެ އެ ފަރާތްތަކަށް ޝުކުރު އަދާކޮށްފައެވެ.