ރާއްޖޭގެ ކަނޑުގެ ސަރަހައްދު އަމިއްލައަށް ބެލެހެއްޓުމުގެ ނިޒާމް މި މަސް ތެރޭގައި ގާއިމް ކުރައްވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސް ޑރ.މުއިއްޒު މިފަދައިން ވިދާޅުވީ އަތޮޅު ތެރެއަށް އެމަނިކުފާނު މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ރ.މީދޫއަށް ވަޑައިގެން އެރަށު ރައްޔިތުންނާއި ބައްދަލު ކުރައްވާ ވާހަކަފުޅު ދައްކަވަމުންނެވެ. މިގޮތުން ރައީސް ޑރ.މުއިއްޒު ވިދާޅުވީ، މަސްވެރިކަން ފުޅާ ކުރެވެން އޮތް ނުވަ ލައްކަ އަކަ ކިލޯ މީޓަރުގެ ސަރަހައްދު އެއީ ރާއްޖޭގެ ބައެއް ކަމަށެވެ.

ރާއްޖޭގެ 99 އިންސައްތަ ކަމަށްވާ ކަނޑުގެ ބޮޑު ބައެއް ނުބެލެއްޓޭ ކަަމަށާއި ޒަމާނުއްސުރެ އެއީ ކެޕޭސިޓީ އޮތް ވަރު ކަމަށް ވިދާޅުވެ ރައީސް ޑރ.މުއިއްޒު ވަނީ މި ބޮޑު ސަރަހައްދުން އެހެން ބަޔަކު ވަދެ ބޭނުމެއް ކުރާނެ ކަމެއް ނެތް ކަަމަށާއި، ނުރައްކަލެއް އަޔަސް އެހެން ބައެއްގެ އެހީތެރިކަން ހޯދައިގެން ނޫނީ ކުރެވޭނެ އެއްވެސް ކަމެއް ނެތް ކަން ފާހަގަކުރައްވާފައެވެ.

Advertisement

އެހެން ނަަމަވެސް މި މަސް ތެރޭގައި 24 ގަޑިއިރު ތެރޭ ހުއްޓުމެއް ނެތި ރާއްޖޭގެ މި ސަރަހައްދު ބެލެހެއްޓޭނެ ނިޒާމް ހަމަޖެހިގެންދާނެ ކަމަށް ރައީސް ޑރ.މުއިއްޒު ވިދާޅުވިއެވެ.

މީގެ އިތުރުންވެސް ރައީސް ޑރ.މުއިއްޒު ވިދާޅުވީ ގައުމު އޮތީ ސަލާމަތްތެރިކަމާއި މިނިވަންކަންމަތީގައި، އަމިއްލަ ފައިމައްޗަށް ތެދުވެފައިވަކަން ޔަގީންވެގެން އެ ލިބޭ އިހުސާސްގެ މުއްސަނދިކަމަކީ އެމަނިކުފާނު މި ގައުމު ގެންދަން ބޭނުންވާ އަމާޒު ކަމަށެވެ. އަދި އެ މަގުން ކުރަން ޖެހޭ ހުރިހާ ކަމެއް ކުރުމަށް މަސައްކަތް ކުރަމުންދާ ކަމަށާއި، އިގްތިސާދީ ތަރައްގީ ހާސިލް ކުރުމަށްޓަކައި ކުރަން ޖެހުނު ހުރިހާ ކަމެއް ކުރުމަށް އިސްކަން ދެއްވާނެ ކަަމަށް ވެސް ރައީސް ޑރ.މުއިއްޒު ވިދާޅުވިއެވެ.

މީގެ ކުރިން ނ.މަނަދޫ އަށް ވަޑައިގެން އެ ރަށުގެ ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުންވެސް ރައީސް ޑރ.މުއިއްޒު ވަނީ ހުއްޓުމެއް ނެތި، ރާއްޖޭގެ ކަނޑުގެ ސަރަހައްދު ބެލެހެއްޓޭނެ ގާބިލުކަން ގާއިމު ކުރުމުގެ މަސައްކަތް ބާރުމިނުގައި ކުރިއަށްދާ ކަމަށް ވިދާޅުވެފައި ކަން ފާހަގަކޮށްލަން ޖެހެއެވެ.