ސްޕެނިޝް ލަލީގާގައި ހޮނިހިރު ދުވަހުގެ ރަށުން ބޭރުގައި ވެލެންސިއާ އާއި ދެކޮޅަށް ރެއާލް މެޑްރިޑުން ކުޅުނު މެޗު 2-2 ގެ ނަތީޖާއަކުން ދެޓީމް އެއްވަރުވެއްޖެ އެވެ.

މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން ކުޅެ ރެއާލް މެޑްރިޑުން މެޗު ޑޮމިނޭޓުކުރި ނަމަވެސް މިމެޗުގައި ފުރަތަަމަ ލަނޑުޖަހައި ކުރިހޯދީ ވެލެންސިއާ އިންނެވެ. މިލަނޑު ފުރަތަމަ ހާފުގެ 27 ވަނަ މިނެޓުގައި ކާމިޔާބުކޮށްދިނީ އެޓީމުގެ ސްޕެނިޝް ފޯވާޑް ހޫގޯ ޑޫރޯ އެވެ.

މިއީ އެޓީމުގެ ފޯވާޑް ފްރާން ޕެރޭޑް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި އޭގެ ތިން މިނެޓު ފަހުން ރެއާލްގެ ކެޕްޓަން ޑެނީ ކަވަހާލް އަށް ހެދުނު ގޯހެއްގެ ފައިދާ ނަގައި އެޓީމުގެ ލީޑު ފުޅާކޮށްދިނީ ޔުކުރެއިންގެ ފޯވާޑް ރޯމަން ޔަރެމްޗުކް އެވެ.

ރެއާލް މެޑްރިޑުން ނަތީޖާގެ ފަރަގު ކުޑަކުރި ލަނޑު ފުރަތަމަ ހާފުގެ އިތުރު ވަގުތުގެ ތެރޭގައި ކާމިޔާބުކޮށްދިނީ ބްރެޒިލްގެ ފޯވާޑް ވިނީޝިއަސް ޖޫނިއަރ އެވެ. މިއީ އެޓީމުގެ ބްރެޒިލް ފޯވާޑް ރޮޑްރީގޯ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-1 ގެ ނަތީޖާއަކުން ވެލެންސިއާ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ރެއާލް މެޑްރިޑުން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން ދެވަނަ ހާފުގެ 76 ވަނަ މިނެޓުގައި ރެއާލް މެޑްރިޑުން ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ.

މިލަނޑު އެޓީމަށް ކާމިޔާބުކޮށްދިނީ ވެސް ވިނީޝިއަސް ޖޫނިއަރ އެވެ. މިއީ އެޓީމުގެ މިޑްފިލްޑަރު ބްރަހީމް ޑިއާޒް ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މީގެ އިތުރުން މެޗުގެ އިތުރު ވަގުތުގެ ތެރޭގައި ރެއާލް މެޑްރިޑްގެ އިގިރޭސި މިޑްފީލްޑަރު ބެލިންހަމް ލަނޑެއް ކާމިޔާބު ކުރި ނަމަވެސް އެބޯޅަ ގޯލަށް ވަނުމުގެ ކުރިން ރެފްރީ ވަނީ މެޗު ނިންމާލާފައެވެ.

މިއާއެކު ރެއާލްގެ ކުޅުންތެރިން ވަނީ ވަރަށް ބޮޑަށް ނަރުހުން ފާޅުކޮށްފައެވެ. އަދި ނުރުހުން ފާޅުކުރުމުގެ ތެރޭގައި ކުޅިވަރުގެ ރޫހާ ހިލާފުވެފައިވާތީ ރެފްރީ ވަނީ ރެއާލްގެ މިޑްފީލްޑަރު ބެލިންހަމް އަށް ސީދާ ރަތް ކާޑެއް ދެއްކުމުގެ އިތުރުން ފޯވާޑް ހޯސެލޫ އަށް ރީނދޫ ކާޑެއް ވެސް ދައްކަފައެވެ.

މިނަތީޖާއާއެކު ލީގުގައި ކުޅުނު 27 މެޗުން ރެއާލް މެޑްރިޑަށް 66 ޕޮއިންޓް ލިބިފައިވާއިރު އެޓީމު މިވަގުތު އޮތީ ލީގު ތާވަލްގެ އެއްވަނައިގައެވެ. އަދި ދެވަނާގައި އޮތް ޖިރޯނާ އަށް 26 މެޗުން 59 ޕޮއިންޓް ލިބިފައިވާއިރު، މިމެޗުން ލިބުނު އެއް ޕޮއިންޓާއެކު ލީގުގައި ކުޅުނު 26 މެޗުން ވެލެންސިޔާއަށް ވަނީ 37 ޕޮއިންޓް ލިބިފައެވެ. އަދި އެޓީމު މިވަގުތު އޮތީ ލީގު ތާވަލްގެ 9 ވަނައިގައެވެ.