މާލެ ސިޓީ ކައުންސިލާއި ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ގުޅިގެން ކުރިއަށް ގެންދިޔަ, މާލެ ސަރަހައްދުގައި ކާބޯތަކެތީގެ ޚިދުމަތްދޭ ތަންތަން ބަލާ ފާސްކުރުމުގެ ހަރަކާތުގެ ތެރެއިން ސާފުތާހިރުކަން ކުޑަ ތަންތަނުގައި ކާބޯތަކެތި އުފައްދާ އެތައް ތަނެއް ފާހަގަކުރެވިފައިވާ ކަމަށް މާލެ ސިޓީ ކައުންސިލުން ބުނެފިއެވެ.

މިދިޔަ މަހު 18 އިން އިއްޔެގެ ނިޔަލަށް ކުރިއަށް ދިޔަ މި ހަރަކާތާއި ގުޅިގެން މާލެ ސިޓީ ކައުންސިލުން ނެރުނު ބަޔާނެއްގައި ބުނީ  މާލެ، ހުޅުމާލެ، ވިލިމާލެ، ހުޅުލެ، ތިލަފުށި، ގުޅީފަޅު އަދި ކްރޮސްރޯޑްގައި ހުރި ކާބޯތަކެތި ހަދާތަންތަން އިންސްޕެކްޓް ކުރެވިފައިވާ ކަމަށެވެ. އޭގެ ތެރެއިން ހުޅުމާލެ އިންސްޕެކްޓް ކުރެވިފައިވަނީ ހައުސިންގ ޑިވެލޮޕްމަންޓު ކޯޕަރޭޝަން (އެޗްޑީސީ) އާއި އެޗްޕީއޭ ގުޅިގެން ކަމަށާއި ވިލިމާލޭގައި ހުރި އައުޓްލެޓްސްތަށް މަދުވުމުން ވިލިމާލެ އިންސްޕެކްޓް ކޮށްފައިވަނީ އެޗްޕީއޭގެ މުއައްޒަފުން އަމިއްލަ އަށް ކަމަށް ވެސް އެބަޔާނުގައި ވެއެވެ.

މާލެ 8 ޒޯނަކަށް ބަހާލައިގެން ކުރިއަށް ދިޔަ މި އިންސްޕެކްޝަންގައި މި ޒޯނުތަކުގައި 8 ޓީމެއް އެކްޓިވްކޮށް ހަރަކާތްތެރިވެ މުޅިމާލޭގައި ހުރި ކާބޯތަކެތި ހަދާތަންތަން ބަލާފާސްކޮށްފައިވާއިރު، މާލޭގައި ހުރި ކާބޯތަކެތި ހަދާ ތަންތަނުގެ ތެރެއިން ސާފުތާހިރުކަން ކުޑަ ތަންތަން ގިނަ އަދަދަކަށް ފާހަގަކުރެވިފައިވާ ކަމަށް ސިޓީ ކައުންސިލުން ވަނީ ބުނެފައެވެ.

Advertisement

މީގެ އިތުރުންވެސް މި އިންސްޕެކްޝަން ގެ ތެރެއިން، ބިދޭސީން ހުއްދަނުނަގާ ގަވާއިދާއި ޚިލާފަށް ހިންގާ ތަންތަންވެސް ފާހަގަކުރެވިފައިވާ ކަމަށާއި، މިފަދަ ތަންތަނުގެ މައުލޫމާތު ނަގާ، އެތަންތަނާމެދު ފިޔަވަޅު އެޅުމަށް އެޗްޕީއޭ އިން ނިންމާފައިވާކަމަށް ވެސް މާލެ ސިޓީ ކައުންސިލުން ނެރުނު ބަޔާނުގައި ވެއެވެ.

މިއީ ކާބޯތަކެތީގެ ޚިދުމަތްދޭ ތަންތަނުގެ ސާފުތާހިރު ކަމުގެ މިންގަނޑުތައް ދެމެހެއްޓުމަށް ބާރުއަޅައި، ރައްކާތެރި ގޮތުގައި ޚިދުމަތް ދިނުމަށް ބާރުވެރިކޮށް އަހުލުވެރި ކުރުމުގެ މަގްސަދުގައި، މިއަހަރުގެ ރަމަޟާން މަސް ފެށުމުގެ ކުރިން އެޗްޕީއޭ އާއި މާލެ ސިޓީ ކައުންސިލް ގުޅިގެން ކުރިއަށް ގެންދިޔަ ހަރަކާތެކެވެ.