ކުރިއަށް އޮތް ރަމަޟާން މަހާއި ޝައްވާލު މަހުގެ ފުރަތަމަ 7 ދުވަހު، މާލެ ސަރަހައްދުގައި އެއްގަމު އުޅަނދުގައި ގަނޑުކޮށް މުދާ އުފުލޭނެ ގަޑިތައް މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ހާމަކޮށްފިއެވެ.

ޓްރާންސްޕޯޓް މިނިސްޓްރީން ބުނީ ރަމަޟާންމަހުގެ ފުރަތަމަ ދުވަހުން ފެށިގެން 19 ވަނަ ދުވަހާއި ހަމައަށް ބަރު އުޅަނދާއި ހުރިހާ ބާވަތެއްގެ މުދާ އުފުލާ އުޅަނދުތަކުގައި ހެނދުނު 9:30 އިން 16:30 އަށް މުދާ އުފުލޭނެކަމަށާއި ރޭގަނޑު 8:00 އިން ހެނދުނު 6:00 އަށްވެސް މުދާ އުފުލޭނެކަމަށެވެ. 

ރަމަޟާންމަހުގެ 20 ވަނަ ދުވަހުން ފެށިގެން ރަމަޟާންމަސް ނިމެންދެން މުދާ އުފުލޭނީ ހެނދުނު 6:00 އިން ފެށިގެން 16:30 އަށް އަދި ރޭގަނޑު 8:00 އިން ހެނދުނު 6:00 އަށް ކަމަށް އެ މިނިސްޓްރީން ބުނެފައިވާއިރު، ހުއްދަދީފައިވާ ވަގުތުތަކުގެ ބޭރުން މުދާ އުފުލާ ފަރާތްތައް 750 ރުފިޔާއިން ޖޫރިމަނާ ކުރާނެކަމަށްވެސް ވަނީ ބުނެފައެވެ.

ޝައްވާލު މަހުގެ ފުރަތަމަ 7 ދުވަހު ވެސް މުދާ އުފުލުމަށް މިނިސްޓްރީން ކަނޑައަޅާފައިވަނީ ހެނދުނު 9:30 އިން 16:30 އަށް އަދި ރޭގަނޑު 8:00 އިން ހެނދުނު 6:00 އަށެވެ.