ބިޒްނަސް ސެންޓަރ ކޯޕަރޭޝަން (ބީސީސީ) އިން ގާއިމްކުރާ ކްރިއޭޓަރ ހަބްގެ މަސައްކަތް ފަށައިފިއެވެ.

ކްރިއޭޓަރ ހަބަކީ ދިވެހިރާއްޖޭގައި ފަންނުވެރި އިޤްތިޞާދެއް ބިނާކުރުމަށް ވަޒީރުންގެ މަޖިލީހުގެ ލަފާފުޅާއެކު ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވާފައިވާ މުހިންމު މަސައްކަތްޕުޅެކެވެ.

ރޭ ސަލްޓަން ޕަރކްގައި ބޭއްވި ރަސްމިއްޔާތެއްގައި މި އިމާރާތުގެ ބިންގާ އަޅުއްވައިދެއްވީ އިގްތިސާދީ ތަރައްގީއާއި ވިޔަފާރިއާބެހޭ ވަޒީރު މުހައްމަދު ސައީދުއެވެ.

މި ރަސްމިއްޔާތުގައި ވާހަކަފުޅު ދައްކަވަމުން ބީސީސީ ގެ ޑެޕިއުޓީ މެނޭޖިންގ ޑިރެކްޓަރ ސާމިހް އާދަމް ވިދާޅުވީ އާމްދަނީ ހޯދުމުގެ ނިޔަތުގައި އަމިއްލަ މަސައްކަތް ކުރާ ފަންނުވެރި ފަރާތްތައް ދުވަހުން ދުވަހަށް އިތުރުވަމުން އަންނަ ކަމަށެވެ. އެހެންކަމުން، މިފަދަ އިގްތިސާދަކަށް މަގުފަހި ކުރުމުގެ ބޭނުން ރާއްޖެއަށް ނުހަނު ބޮޑު ކަން ފާހަގަކުރައްވާ ސާމިހް ވިދާޅުވީ، މިފަދަ ހަބެއް ވުޖޫދު ވުމާއިއެކު ފަންނީ އަދި އީޖާދީ އުފެއްދުންތެރިކަން އިތުރުވެ މިފަދަ އުފެއްދުން ތަކަށް ގައުމީ އަދި ބައިނަލްއަގްވާމީ ގޮތުން ބާޒާރު ލިބި އެކްސްޕޯޓް ކުރުމުގެ މަގު ތަނަވަސްވެގެން ދާނެކަމަށެވެ.

މިކަމާއި ގުޅިގެން ބީސީސީން ބުނީ، އެގާރަ ފަންގިފިލާއަށް އިމާރާތްކުރާ، ކްރިއޭޓަރ ހަބް އާއި އެކު ފަންނުވެރިކަމުގެ ސިނާއަތުގައި ޙަރަކާތްތެރިވާ ފަރާތްތަކަށް ފަސޭހައިން މަސައްކަތް ކުރެވޭނެ މަސައްކަތު ޖާގަތަކާއި ފަންނުވެރިން މަސައްކަތްތައް ކުރިއެރުވުމަށް ބޭނުންވާ ގިނަ ވަސީލަތްތައް ފަހިވެގެންދާނެ ކަމަށެވެ. އަދި މި މަސައްކަތާއެކު ފަންނީ އަދި އީޖާދީ މަސައްކަތްތެރިކަމުގައި އުޅޭ ފަރާތްތަކަށް މަސައްކަތްކުރެވޭނެ މާހައުލެއް ޒަމާނީ ވަސީލަތްތަކާއި އާލާތްތަކާއި އެކު ގާއިމްކުރެވޭނެ ކަމަށް ވެސް ބީސީސީ އިން މައުލޫމާތު ދެއެވެ.

ބީސީސީން ކްރިއޭޓަރ ހަބް ޑިޒައިންކޮށް އިމާރާތް ކުރުމުގެ މަސައްކަތް ފެޑޯ ޕްރައިވެޓް ލިމިޓެޑާއި ހަވާލުކޮށްފައިވަނީ، ނިމިދިޔަ ފެބްރުއަރީ މަހުގެ ތެރޭގައެވެ. ކްރިއޭޓަރ ހަބް ގެ ގޮތުގައި 1500 އަކަފޫޓުގެ ޖާގައެއްގައި ޤާއިމުކުރުމަށް ނިންމައި، މި މަސައްކަތް އެ ކުންފުންޏާއި ހަވާލު ކުރީ، ޑިޒައިން އެންޑް ބިލްޑް އުސޫލުން 400 ދުވަހުގެ ތެރޭގައި ނިންމާގޮތަށެވެ. މި ހަބް ހުޅުވުމަށް ހަމަޖެހިފައވަނީ 2025 ވަނަ އަހަރުގެ މެދުތެރޭގައެވެ.