ކަމުދާ އެތައް ފިލްމެއް މިހާތަނަށް ގެނެސްދީފައިވާ ޑާކްރެއިން އެންޓަޓެއިންމަންޓުން ބެލުންތެރިންގެ އިންތިޒާރު ނިމުމަކަށް ގެނެސް، "ފުރޭތަ" އޮލިމްޕަސް ސިނަމާގައި އަޅުވައިފިއެވެ.
ދިވެހި ފިލްމީ ފަންނާނުންގެ ތެރޭގައި މިވަގުތުހުރި އެންމެކުޅަދާނަ އެއް ބަތަލު ކަމުގައިވާ ޝަރަފް އަބްދުﷲ (ޝަރައްޕެ) ގެ ކުޅަދާނަ އެކްޓިން ފެނިގެންދާ މި ފިލްމު ބެލުންތެރިންނަށް ދޫކޮށްލާފައިވަނީ މި މަހުގެ 4 ވަނަ ދުވަހުއެވެ. ޝަރަފް ގެ އިތުރުންވެސް މި ފިލްމުން ފެނިގެންދާ ރަވީ ފާރޫގް، މުހައްމަދު މަނިކު، އައިޝަތު އަސީލާ، ހަމްދާން ފާރޫގް، މުހައްމަދު ރިފްޝާންގެ އިތުރުން އަލީ ނަދީހު ފަދަ ތަރިން ވެސް ދައްކުވައިދީފައިވަނީ ތައުރީފް ހައްގުވާވަރުގެ އެކްޓިން އެކެވެ.
އަލީ ޝިފާއު (ޗިއްޕެ) ޑައިރެކްޓްކޮށް މޮގާ ޕްރޮޑިއުސްކުރާ މި ފިލްމުގެ ސްކްރީންޕްލޭ ލިޔުނީ އަހްމަދު ތޮލާލެވެ. ފިލްމުގެ ފައިޓް ކޮރިއޯގްރަފަރަކީ ކުޅަދާނަ އެކްޓަރު ރަވީ ފާރޫގެވެ.
ފިލްމުގެ ނަމުން ފަހުމު ވެގެންދާ ބިރުވެރި މާނަ އާއި ޚިލާފަށް، ޑާކްރެއިންގެ މިއަހަރުގެ ފުރަތަމަ ފީޗަރ ފިލްމު "ފުރޭތަ" އަމާޒުކޮށްފައިވަނީ ދިވެހި މުޖަތަމައުގައި ހުރި ވަރަށް ނޭދެވޭ އަދި ނައްތައިލުމަށް ކޮންމެ ފަރުދަކު ވެސް މަސައްކަތް ކުރަންޖެހޭ ކަމެއްގެ މައްޗަށެވެ.
މި ފިލްމު ޕްރިމިއަރ ކުރުމަށް ބޭއްވި ހާއްސަ ޝޯވ ފެށުމުގެ ކުރިން ފިލްމުގެ ސްކްރީން ރައިޓަރު އަހްމަދު ތޮލާލު ވިދާޅުވީ، ނަން ކިތަންމެ ބިރުވެރި ވިޔަސް ފިލްމު ބިނާކޮށްފައިވަނީ ބަދަލުހިފުމުގެ ވާހަކަ އަކަށް ކަމަށެވެ. ފިލްމުގެ ސަސްޕެންސް ގެއްލުވާލަން ބޭނުންނުވާކަމަށާއި މިއީ މައިންބަފައިންގެ ފަރާތުން ލިބެންވާ އަޅައިލުމާއި ލޯތްބާއި އެހީތެރިކަން ނުލިބުމުގެ ސަބަބުން ދަރީން މަގުއޮޅި، ނުރަނގަޅު އާދަތަަކަށް ހުށަހެޅޭކަން ދައްކުވައިދޭ ފިލްމެއް ކަމަށް ވެސް ތޮލާލް ވަނީ ވިދާޅުވެފައެވެ.
މީގެ އިތުރުންވެސް މި ފިލްމުން ޢަދުލު އިންސާފު ގާއިމުކުރުމުގައި ހުރި 'ލޫޕް ހޯލް' ތަކުގެ ސަބަބުން އިންސާފު ލިބެންޖެހޭ ފަރާތަށް އިންސާފު ނުލިބުމުގެ ސަބަބުން މުޖުތަމައުގައި ކަން ހިނގާގޮތް ވެސް ވަރަށް ފުރިހަމަ އަށް ދައްކައިދީފައިވާ ކަން ވެސް ފާހަގަކޮށްލަން ޖެހެއެވެ.
މިހާރު އޮލިމްޕަހުގައި އަޅުވާފައި ހުރި މި ފިލްމް ގެ ޓިކެޓް، ޓިކެޓް ކައުންޓަރުން ލިބޭނެއެވެ.
Advertisement
This content is created and paid for by advertisers and does not involve Voice Journalists
