އަލަށް ތަމްރީނުކުރާ ޒުވާން ޚަޠީބުންނަށް މި މަހުގެ 10 ވަނަ ދުވަހު ރަސްމީ ހުއްދަ ދޫކުރާނެ ކަމަށް އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
މިނިސްޓަރު ޝަހީމް މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ ޒުވާން ހަތީބުންގެ އިންޓަވިއު ނިމި، މާލެ ސަރަޙައްދުގައި ތިބި ފަރާތްތަކުގެ އަމަލީ ތަމްރީނު މިއަދު ފަށާފައިވާ ކަމަށެވެ. މި ތަމްރީނު ޕްރޮގްރާމް މި މަހުގެ 6 އިން ފެށިގެން 9 ވަނަ ދުވަހާއި ހަމައަށް ކުރިއަށް ދިޔުމަށް ވަނީ ހަމަޖެހިފައެވެ.
އެއަށްފަހު، އަންނަ އާދިއްތަ ދުވަހު އެފަރާތްތަކަށް ހުއްދަ ދޫކޮށް، އަންނަ ރޯދަ މަހުގައި އެ ޒުވާނުން ހުތުބާ ކިޔާނެ ކަމަށް މިނިސްޓަރު ޝަހީމް ވިދާޅުވި އެވެ.
"ޒުވާން ޚަޠީބުންގެ އިންޓަވިއު ނިމި، މާލެ ސަރަޙައްދުގައި ތިބި ފަރާތްތަކުގެ އަމަލީ ތަމްރީނު ފެށުން. އިންޝާ الله ތަމްރީނު ނިންމައި 10 ވަނަ ދުވަހު ރަސްމީ ހުއްދަ ދޫކުރާނެ. ރޯދަ މަހު އެ ޒުވާނުން ޚުޠުބާ ކިޔާނެ."
މިނިސްޓަރު ޝަހީމް ވިދާޅުވިއެވެ.
ޒުވާން އިމާމުންނާއި ޚަޠީބުންނަށް ފުރުޞަތު ފަހިކޮށްދިނުމުގެ ގޮތުން ގްރޭޑް 10،11،12 ނިންމާފައިވާ ރީތިކޮށް ޤުރުއާންކިޔަވާ، ނަމާދުގެ ފިޤުހަށް އަހުލުވެރި ދަރިވަރުންނަށް އިމާމުވެ ހުކުރުކޮށް ޚުޠުބާކިއުމުގެ ހުއްދަ ދޭން މިނިސްޓްރީން ނިންމީ މިދިޔަ ޑިސެންބަރު މަހުގެ ތެރޭގައިއެވެ.
މި ޕްރޮގްރާމަށް ވަރަށް ބޮޑު ތަރުހީބެއް ލިބިގެން ދިޔައިރު، އިމާމުންނާއި ހަތީބުން ތަމްރީންކުރުމުގެ ޕްރޮގްރާމް އިފްތިތާހުކޮށް، އެ ޕްރޮގުރާމުގެ ފުރަތަމަ ބުރު މިދިޔަ ފެބްރުއަރީ މަހު ފެށީ ގެމަނަފުށީގަ އެވެ. އެ ޕްރޮގްރާމުގައި ދެކުނުގެ ރަށްތަކުން 77 އިމާމުން ވަނީ ބައިވެރިވެފައެވެ.
މިއީ ރާއްޖޭގެ ގިނަ ރަށްތަކެއްގައި ޚަޠީބުންނާއި، އިމާމުން ލިބުމުގެ ދަތިކަމަށް ޙައްލެއް ލިބިގެންދާނެ ކަމެއް ކަމަށް މިނިސްޓަރު ޑރ. ޝަހީމް ދެކިވަޑައިގަންނަވާ ކަމަށް އިސްލާމިކް މިނިސްޓްރީން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
