މ އަތޮޅުގައި ޕިކްނިކް އައިލެންޑެއް ޤާއިމުކޮށްދިނުމަށް އެ އަތޮޅު ކައުންސިލުން އެދެފިއެވެ.

މ އަތޮޅުގައި ޕިކްނިކް އައިލެންޑެއް ގާއިމުކޮށްދިނުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ އަރިހުން އެ އަތޮޅުގެ ކައުންސިލުން އެދިފައިވަނީ، އެ އަތޮޅުގެ ތަރައްޤީއަށްޓަކައި ކުރުމަށް ބޭނުންވާ ކަންކަމާ ގުޅޭގޮތުން މަޝްވަރާކުރެއްވުމަށް ރައީސް ޑރ.މުއިއްޒު އެ އަތޮޅުގެ ކައުންސިލާއި އެކު މ.މުލަކު ކައުންސިލް އިދާރާ ގައި ބޭއްވި ބައްދަލުވުމުގެ ތެރެއިންނެވެ.

މި ބައްދަލުވުމުގައި މ އަތޮޅުގެ ކައުންސިލުން ވަނީ، އަތޮޅު ހޮސްޕިޓަލްގެ ޚިދުމަތް ތަރައްޤީކޮށް، ޕިކްނިކް އައިލެންޑެއް އަތޮޅުގައި ޤާއިމުކޮށްދިނުމަށް އެދިފައެވެ. އަދި އަތޮޅުގެ އާބާދީ ބޮޑު ރަށްރަށުން އޭ.ޓީ.އެމް ގެ ޚިދުމަތް ލިބުމަށް އެދޭ ކަމަށާއި، މާލެ ދަތުރުކުރެވޭނެ ރަނގަޅު ލުއިފަސޭހަ ގޮތެެއް ހޯއްދަވައިދެއްވުމަށް ވެސް އެ އަތޮޅުގެ ކައުންސިލުން ވަނީ ރައީސް ޑރ.މުއިއްޒު ގެ އަރިހުން އެދިވަޑައިގެންފައެވެ. އަދި މީގެ އިތުރުންވެސް އެ އަތޮޅުގައި ހަދަން ފަށާފައިވާ ރިސޯޓްތައް އަވަހަށް ނިންމަވައިދެއްވައި، މަސް ބަނދަރުގެ މަސައްކަތް އަވަހަށް ނިންމަވައިދެއްވުމަށްވެސް ވަނީ އެދިފައެވެ.

Advertisement

ރައީސް ޑރ.މުއިއްޒު ވަނީ ކައުންސިލުން ފާހަގަކުރެއްވި ކަންކަމުގައި މަސައްކަތް ކޮށްދެއްވާނެ ކަމުގެ ޔަގީންކަން އަރުވާފައެވެ. އަދި އެމަނިކުފާނު ވަނީ މި ބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުން މެދުވެރިކުރައްވައި ކައުންސިލުން ފާހަގަކުރި ކަންކަމުގައި ސަރުކާރުން ކުރައްވަމުން ގެންދަވާ މަސައްކަތްޕުޅުތަކުގެ އެންމެ ފަހުގެ މަޢުލޫމާތު ވެސް ހިއްސާ ކުރައްވާފައެވެ.