މަސްވެރިންނަށް ސަރުކާރުން ދޫކުރަންޖެހޭ ފައިސާގެ ތެރެއިން މިހާތަނަށް ދޫނުކޮށް ހުރިފައިސާ، މި އަހަރުގެ ރަމަޟާން މަސް ފެށުމުގެ ކުރިން މަސްވެރިންނަަށް ދޫކޮށް ނިންމާނެ ކަމުގެ ޔަގީންކަން މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަޙުމަދު ޝިޔާމު ދެއްވައިފިއެވެ.
ހަފްތާ-14 މަގު ޗާޓުގައި މަސްވެރިކަމާއި ބެހޭ ވުޒާރާއަށް މަތިކޮށްފައިވާ ކަންތައްތަކުގެ ފަހުގެ މަޢުލޫމާތު ހިއްސާކުރެއްވުމަށް މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ވަޒީރު ޝިޔާމު ވިދާޅުވީ، އެ ވުޒާރާ އާއި ފިނޭންސް މިނިސްޓްރީ އާއި މިފްކޯ ގުޅިގެން މިހާރު އޮތް ބެކް ލޮގް ހަލާސްކުރުމުގެ މަސައްކަތް ކުރިއަށްދާ ކަމަށާއި، ޑިސްޕާސްމަންޓްގައި ކުޑަ ލަސްކަމެއް އުޅޭ ކަމަށާއި، ނަމަވެސް ރޯދައިގެ ކުރިން ފައިސާދީ ނިންމާލެވޭނެ ކަމަށެވެ.
"އަޅުގަނޑުމެން މި މަސައްކަތް ކުރަނީ ފިނޭންސާއި މިފްކޯ އަދި މިނިސްޓްރީ ހިމެނޭ ގޮތަށް ރޯދައިގެ ކުރިޔަށް މިހާރު އޮތް ބެކް ލޮގް ހަލާސްކުރަން. ޑިސްޕާސްމަންޓްގައި އެބަ އުޅޭ ކުޑަކުޑަ ލަސްކަމެއް، އެހެންނަމަވެސް އަޅުގަނޑުމެންނަށް އޮތް ޔަގީންކަމަކީ 5 މާރިޗްގައި މި ފެށި މަސައްކަތް ނިންމާ ރޯދައިގެ ކުރިން ނިންމާލެވޭނެ."
ވަޒީރު ޝިޔާމް ވިދާޅުވިއެވެ.
މީގެ އިތުރުންވެސް ވަޒީރު ވިދާޅުވީ، މިމަހުގެ 5 ވަނަދުވަހުވެސް މަސްވެރިންނަށް ދޫކުރުމަށް 50 މިލިއަން ހަމަޖައްސާ، އެ ފައިސާ ދޫކުރަމުން އަންނަކަމަށާއި އެ ފައިސާއަކީ މިދިޔަ ޖެނުއަރީ މަހުގެ 26 ގެ ނިޔަލަށް ކިރާފައިވާ މަހަށް ދޭންޖެހޭ ފައިސާކަމަށެވެ.
އަދިވެސް މަސްވެރިންނަށް ދޫނުކުރެވި 147 މިލިއަން ރުފިޔާ ހުރިކަމަށާއި، މިބެކްލޮގް އެއްކޮށް ކްލިއާ ކުރެވުމުން މަސްވެރިން ކިރާ މަހަށް 48 ގަޑިއިރު ތެރޭގައި ފައިސާ ދޫކުރުމުގެ އިންތިޒާމު ހަމަޖެހިގެންދާނެކަން ވެސް ޝިޔާމް ފާހަގަކުރެއްވިއެވެ.
ވަޒީރު ޝިޔާމް މިފަދައިން ވިދާޅުވެފައިވާއިރު، ރައީސް ޑރ.މުއިއްޒު ރ.ދުވާފަރު ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައި އެމަނިކުފާނު ވެސް ވަނީ މަސްވެރިންނަށް ސަރުކާރުން ދޫކުރަންޖެހޭ ފައިސާގެ ތެރެއިން ބާކީ ނުދެވި ހުރި ފައިސާ، ކުރިއަށް އޮތް ރަމަޟާން މަހުގެ ކުރިން ދިނުމަށް މަސައްކަތްޕުޅު ކުރައްވަމުން އަންނަކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
