އެއްވެސް ވަރަކަށް މަސައްކަތް ހިނގާފައިނުވާތީ، އައިސް ޕްލާންޓް އެޅުމަށް ފެނަކައާ ހަވާލުކުރި 8 އެއްބަސްވުމެއް މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާ އިން ބާތިލުކޮށްފިއެވެ.
ފިޝަރީޒް މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވީ، ނުވަ އައިސްޕްލާންޓެއް ގާއިމުކުރުމުގެ މަސައްކަތް މިފްކޯ އިން ފެނަކައާ ހަވާލުކޮށްފައިވާ ކަމަށެވެ. ނަމަވެސް، އޭގެ ތެރެއިން ބައެއް އައިސްޕްލާންޓްތަކުގެ މަސައްކަތް އެއްބަސްވުމާ އެއްގޮތަށް ކުރިއަށް ނުދާކަން ފާހަގަވެ، 8 އެއްބަސްވުމެއް ބާތިލު ކުރިކަމަށް ޝިޔާމް ވިދާޅުވިއެވެ.
"އަޅުގަނޑުމެން ވާނީ ބައެއް އައިސްޕްލާންޓްތަކުގެ އެގްރީމަންޓު ޓާމިނޭޓްކޮށް އެ އައިސްޕްލާންޓަތައް ވީހާ ވެސް އަވަހަކަށް ގާއިމުކުރުމުމަށްޓަކާ މިފްކޯއާ އަނެއްކާ ވެސް ހަވާލު ކުރެވިގެން ޓެންޑަރިންގައި މިހާރު ވަނީ،"
ވަޒީރު ޝިޔާމް ވިދާޅުވިއެވެ.
ޝިޔާމް ވިދާޅުވީ، ފެނަކަ އާއި އެކު މި އެއްބަސްވުންތައް ގާއިމުކޮށްފައިވަނީ، ދުނިޔޭގެ ބާޒާރުގައި މަސައްކަތް ކުރެވޭ އަގަށް ވުރެ ވެސް ދަށް އަގެއްގައި ކަމަށް ވާތީ ފެނަކައަށް އެ މަސައްކަތް ނުކުރެވޭނެ ކަމަށް ބަލާ ދެ ފަރާތުން އެއްބަސްވެގެން އައިސްޕްލާންޓް އެޅުމުގެ އެއްބަސްވުން ބާތިލުކުރީކަމަށެވެ.
ބާތިލުކުރި އެއްބަސްވުންތަކަކީ އެއްވެސް ވަރަކަށް މަސައްކަތް ހިނގާފައިނުވާ ނުވަތަ ވަރަށް ކުޑަ މިންވަރަކަށް މަސައްކަތް ކުރިއަށް ގޮސްފައިވާ މަސައްކަތްތަކެއްކަން ފާހަގަކުރައްވާ ޝިޔާމް ވިދާޅުވީ އެ އައިސްޕްލާންޓްތަކުގެ ތެރެއިން ގިނަ އައިސްޕްލާންޓްތައް މި އަހަރު ނިންމަން މަސައްކަތް ކުރަމުން އަންނަ ކަމަށެވެ.
Advertisement
This content is created and paid for by advertisers and does not involve Voice Journalists
