ރޯދަވެރިޔާ އަރާރުންވުމާއި، ދޮގުހެދުމާއި، ނެތިމޮށުމާއި، ދެބައޮޑުވުމާއި، އާޑަފުރައްސާރަ ކުރުންފަދަ އިސްލާމްދީން މަނާކުރާ ކަންތައްތަކުން ދޫ ރައްކައުތެރި ކުރުމަކީ ވާޖިބެއް ކަމަށް މިއަދުގެ ޚުތުބާގައި ބުނެފިއެވެ. 

ރަމަޟާންމަހަށް އިސްތިޤްބާލުކުރުން މަޢުޟޫއަށް މިއަދު އިއްވި ޚުތުބާގައި ވަނީ ރޯދަމަހުގެ މާތްކަން ހާސިލްވޭތޯ މަސައްކަތް ކުރަން އަތުކުރި އޮޅާލުމަށް ނަސޭހަތްތެރިވެފައެވެ. 

ޚުތުބާގައި ބުނީ، މުސްލިމުން ރަމަޟާން މަހާ އިސްތިޤްބާލުކުރަން ޖެހޭނީ އުފަލާއި، ހިނިތުންވުމާ އެކުގައި ކަމަށާ، އެއީ ކިޔަމަންތެރިވުމުގެ މޫސުންކަމުގައި ވާތީ ކަމަށެވެ. އަދި އެއީ ހެޔޮކަންތައް ކުރުމުގައި ވާދަކުރަން ޖެހޭ ވަގުތު ކަމަށެވެ.

މިއާއެކު ޚުތުބާގައި ބުނީ ރޯދަމަހަކީ ވަރަށް އަވަހަށް ވަކިވެގެން ހިނގައިދާނެ މަދު ދުވަސްކޮޅެއް ކަމަށެވެ. އެހެންކަމުން ރޯދަހިފުން ބުރަކަމަކަށް ނަހަދައި، ރޯދަމަހުގެ ޙުރުމަތް ނުކަނޑައި، ރޯދަހިފުމުން ލިބޭ ޘަވާބުގެ މަތިން ހަނދުމަކޮށް ރޯދަ ހިފަން ވަނީ ނަސޭހަތްތެރިވެފައެވެ. އަދި ރޯދައަށް ފަރުވާކުޑަ ކުރާ މީހާއަށް އެކަމުގެ ދެރައާ ވަރަށް އަވަހަށް ކުރިމަތިލާން ޖެހިދާނެ ކަމަށާ އެ ދުވަހުން އޭނާއަށް އެހީވާނެ އެއްވެސް ފަރާތެއް ނުލިބޭނެ ކަމަށް ޚުތުބާގައި ބުންޏެވެ. 

މީގެ އިތުރުން ޚުތުބާގައި ވަނީ ރޯދައަށް ހުންނައިރު ވަކިން ޚާއްސަކޮށް ދޫ ރައްކާތެރި ކުރުމަށް ނަސޭހަތްތެރިވެފައެވެ. 

"ކީރިތި ރަސޫލާ ޞައްލައްالله ޢަލައިހި ވަސައްލަމް ޙަދީޘްކުރައްވާފައި ވެއެވެ. (مَنْ لَّـمْ يَدَعْ قَوْلَ الزُّوْرِ وَالْعَمَلَ بِهِ، فَلَيْسَ لِلّٰهِ حَاجَةٌ فِيْ أَنْ يَدَعَ طَعَامَهُ وَشَرَابَهُ) މާނައީ: "ދޮގުހެދުމާއި އެފަދަ ޢަމަލުތައް ދޫކޮށްނުލައި (ރޯދަހިފުމަށްޓަކައި) ކެއުމާއި ބުއިން ދޫކޮށްލުމުގެ ބޭނުމެއް الله ގެ ޙަޟްރަތުގައެއް ނުވެއެވެ."

ޚުތުބާގައި އިތުރަށް ބުނީ މާތް الله އެދިވޮޑިގަންނަވާ މޭވާއާ ހިސާބަށް ރޯދަވެރިޔާއަށް ދެވޭނީ ހިތް ނިޔަތް ޚާލިޞްކޮށް، ކަންދެއްކުމެއްނެތި، މާތް الله ގެ ވަޖުހުފުޅު އަދައިގެން ރޯދަ ހިފުމުން ކަމަށެވެ. އަދި މާތް الله އަށް އީމާންވެ އެކަލާނގެއަށް އިޚްލާޞްތެރިވެ މަޖުބޫރުކަމެއް ނުވަތަ ބުރަހެލި ކަމެއްނެތި ރޯދަ ހިފުމުން ކަމަށެވެ.