މާލެ ސަރަހައްދުގައި ހިންގާ ގެދޮރުވެރިކަމުގެ މަޝްރޫއު ތަކުން އެންމެ އިސްކަމެއް ދެއްވާނީ މާލޭގެ ރައްޔިތުންނަށް ކަމަށާއި އެހެން ނަމަވެސް، އެ ސަރަހައްދުގައި ދިރިއުޅެމުންދާ އެހެން ރަށްރަށުގެ ރައްޔިތުންނަށްވެސް ފުރުސަތު ލިބޭނެ ކަމަށް ރައީސުލްޖުމުހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ. 

ރައީސުލްޖުމްހޫރިއްޔާ މިފަދައިން ވިދާޅުވީ ރައީސް އޮފީހުން ކުރިއަށްގެންދާ ''ރައީސްގެ ޖަވާބު'' ސިލްސިލާގެ ތެރެއިން ދ.މީދޫ، އާސްޓްރާ، ފަރިޔާޟް ޙުސައިން، ކުރި ސުވާލަށް ޖަވާބު ދެއްވަމުންނެވެ.

އެގޮތުން ފަރިޔާޟް ވަނީ އަތޮޅުތަކުގައި ދިރިއުޅޭ ރައްޔިތުންނަށް މާލެ ސަރަޙައްދުން ބޯހިޔާވަހިކަން ލިބޭނެތޯ އެމަނިކުފާނާއި ސުވާލު ކޮށްފައެވެ.

އެ ސުވާލަށް ޖަވާބު ދެއްވަމުން، ރައީސުލްޖުމްހޫރިއްޔާ ވިދާޅުވީ، މާލެ ސަރަހައްދުގައި ގާއިމްކުރަން މަސައްކަތް ކުރަމުންދާ ބޯހިޔާވަހިކަމުގެ ޕްރޮޖެކްޓްސް ތަކަކީ ހުރިހާ ރައްޔިތުންނަށް އޭގެ ފުރުސަތު ލިބިގެންދާނެ މަޝްރޫޢު ތަކެއް ކަމަށެވެ. 

އެހެން ކަމުން ސަރުކާރުގެ އެންމެ ފުރަތަަމަ އަމާޒަކީ މާލޭ ސަރަހައްދުގައި ބިން ހިއްކައިގެން ހިންގާ މަޝްރޫޢުތަކުން މާލޭގެ ރަށްވެހިންނަށް ގެދޮރުވެރިކަން ޔާގީންކޮށްދިނުން ކަމަށް ރައީސް މުޢިއްޒު ވިދާޅުވި އެވެ. 

މިއާއެކު ރައީސް މުޢިއްޒު ވިދާޅުވީ މާލެ ސަރަހައްދުގެ އިތުރުން ރާއްޖޭގެ ހުރިހާ ކަންކޮޅުތަކެއްގައި ވެސް ގެދޮރުވެރިކަމުގެ މަޝްރޫއު ހިންގޭނެ ކަމަށާ، އެމަނިކުފާނުގެ ވެރިކަމުގެ ދައުރު ނިމިގެންދާއިރު، ރާއްޖޭގެ ހުރިހާ ރައްޔިތުންނަށް ގެދޮރުވެރިކަން ޔަގީން ވެގެންދާނެ ކަމަށެވެ.