ރަަމަޟާން މަހަށް ގޭބީސީތަަކަށް ސަރުކާރުން ހަދިޔާކުރާ ހަނޑޫ އަދި ފުށް މާލެ ސިޓީ ކައުންސިލުން ދޫކުރަން ފަށައިފިއެވެ.

މާލެ ސިޓީ ކައުންސިލުން ވަނީ މި ތަކެތި ދޫކުރަން ވަކި ގަޑި ތަކެއް ކަނޑައަޅާފައެވެ. މިގޮތުން މުދާ ދޫކުރަން ނިންމާފައިވާ ގަޑިތަކަކަކީ ހެނދުނު 10:00 އިން ހަވީރު 16:00 އަށް އަދި ރޭގަނޑު 20:30 އިން 23:00 އަށެވެ. 

ރޯދަ މަހުވެސް މި ތަކެތި ދޫކުރާއިރު، ރޯދަ މަހު މުދާ ދޫކުރާ ގަޑި ތަކަކީ ހެނދުނު 9:30 އިން މެންދުރު 13:00 އަށް އަދި ރޭގަނޑު 21:00 އިން 23:30 އަށެވެ.

Advertisement

މުދާ ދޫކުރުމަށް އެ ކައުންސިލުން ވަނީ ވަކި ޕޮއިންޓް ތަކެއް ވެސް ކަނޑައަޅާފައެވެ. މިގޮތުން މުދާ ދޫކުރާ ޕޮއިންޓްތަކަކީ:

1. މާލޭ ގަލޮޅު ދަނޑު

2. މާލޭ ސިޓީ ކައުންސިލުގެ އާންމު ހިދުމަތްތަކާއި ބެހޭބައި

3. މާލޭ ސޯޝަލް ސެންޓަރ

4. ވިލިމާލޭ ބިއްރި މިސްކިތް ހޯލް

5. ހުޅުމާލޭ ފޭސް 1 ގެ އުމަރު ޒާހިރު ބިލްޑިންގ

6. ހުޅުމާލޭ ފޭސް 2 ގެ ހިޔާ ފްލެޓް ޓަވަރ 10 ޔޫތް ސެންޓަރ

މާލެ ސިޓީ ކައުންސިލުން ބުނީ، ހަދިޔާ ބަލައި އަންނަންވާނީ ދިވެހި ރައްޔިތެއް ކަމަށާއި، ދޫކުރާނީ ކަރަންޓް މީޓަރުގެ ނަންބަރ އަށް ބެލުމަށްފަހު ކަމަށެވެ. ހަނޑޫ އަދި ފުށް ބަލާ އަންނަ ފަރާތުގެ ދިވެހި ރައްޔިތެއްކަން އަންގައިދޭ އައިޑީ ކާޑް ،ނުވަތަ ލައިސަންސް ނުވަތަ ޕާސްޕޯޓް ގެންނަންވާނެ ކަމަށް ވެސް އެއިދާރާއިން ވަނީ ބުނެފައެވެ.

މީހުން ދިރިއުޅޭ ކޮންމެ ގޭބިސީއަކަށް ރޯދަމަހު 10 ކިލޯގެ ފުށް ބަސްތާއަކާއި ހަނޑޫ ބަސްތާއެއް ދިނުމަށް ސަރުކާރުން ނިންމާފައިވާކަން ރައީސް ޑރ. މުހައްމަދު މުއިއްޒު އިއުލާނު ކުރައްވާފައިވަނީ ޗައިނާއަށް ކުރެއްވި ރަސްމީ ދަތުރުފުޅު ނިންމަވައިލެއްވުމަށްފަހު މާލެ ވަޑައިގެން ދެއްކެވި ވާހަކަފުޅުގައެވެ. އެގޮތުން ރައީސް ޑރ.މުއިއްޒު ވިދާޅުވީ، މީހުން ދިރިއުޅޭ ކޮންމެ ގޭބިސީއަކަށް 10 ކިލޯ ހަނޑުލާއި 10 ކިލޯ ފުށް ދިނުމަށް މިއަހަރު ސަރުކާރުން ނިންމާފައިވީ ނަމަވެސް އަންނަ އަހަރު އެ އަދަދު އިތުރު ކުރައްވާނެ ކަމަށެވެ.