ރައީސުލްޖުމްހޫރިއްޔާ ޑރ.މުހައްމަދު މުއިއްޒު ޅ.ކުރެންދޫ އަށް ވަޑައިގަތުމުން އެރަށުގެ ރައްޔިތުން އެމަނިކުފާނަށް ހޫނު މަރުހަބާއެއް ދަންނަވައިފިއެވެ.
ރައީސް ޑރ.މުއިއްޒު ޅ އަތޮޅުގެ ތިން ރަށަކަށް ކުރައްވާ ދަތުރުފުޅުގެ ތެރެއިން ކުރެންދޫ އަށް ވަޑައިގެންނެވީ މިއަދު މެންދުރު ކުރީގެ ވަގުތެއްގައެވެ. ހޫނު ގަދަ އެ ވަގުތުވެސް، ރައީސް ޑރ.މުއިއްޒު އަށް މަރުހަބާ ކިޔުމަށް ރަށުގެ ގިނަ ރައްޔިތުން ބަނދަރު މައްޗަށް އައިސް ތިބިކަން ފާހަގަކޮށްލެވެއެވެ.
ރައީސް ޑރ.މުއިއްޒު މިއަދު މި ފެއްޓެވި ދަތުރުފުޅުގައި، ޅ އަތޮޅުގެ ތިން ރަށަކަށް ވަޑައިގަތުމަށް ހަމަޖެހިފައިވާއިރު، އެ ރަށްރަށުގެ ކައުންސިލްތަކާއި އ.ތ.މ. ކޮމިޓީތަކާ ބައްދަލުކުރައްވައި، އެރަށްރަށުގެ ތަރައްޤީއަށް ބޭނުންވާ ކަންކަމާއި، ރައްޔިތުން އެންމެ އެދޭކަންކަމާ ގުޅޭގޮތުން ވެސް އެމަނިކުފާނު މަޝްވަރާ ކުރައްވާނެއެވެ.
ރައީސް ޑރ.މުއިއްޒުގެ މި ދަތުރުފުޅުގައި އެމަނިކުފާނުގެ އަރިހުގައި ސަރުކާރުގެ މަތީފަންތީގެ ވަފުދެއް ބައިވެރިވެވަޑައިގަންނަވައެވެ.
މިހާތަނަށް ރައީސް ޑރ.މުއިއްޒުގެ މި ދަތުފުޅުގައި ޖުމްލަ 145 ކައުންސިލަކާ ބައްދަލުކުރައްވައި މަޝްވަރާކުރައްވާފައިވާއިރު، މި ފަސްއަހަރުގެ ތެރޭގައި ރާއްޖޭގެ ކޮންމެ ރަށަކަށްވެސް މަދުވެގެން ދެ ފަހަރު ޒިޔާރަތްކުރެއްވުމަކީ އަމާޒެއް ކަމަށް ރައީސް ޑރ.މުއިއްޒު ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
