އެއްވެސް މީހަކު އެއްޗެއް ބުނުމުން ފިޔަވަޅެއް ނާޅުއްވާނެ ކަމަށާއި، ބޭނުންފުޅުވަނީ ރައްޔިތުންގެ އަޑު އަހަން ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
މިއަދު ޅ.ކުރެންދޫ ރައްޔިތުންނާއި ވާހަކަފުޅު ދައްކަވަމުން ރައީސް ޑރ.މުއިއްޒު ވިދާޅުވީ، ފާޑުވެސް ކިޔަން ވާނެ ކަމަށާއި، ހެޔޮ ނިޔަތުގައި ކަންކަން ރަނގަޅު ކުރަން ބުނާ އެއްޗެއް ނަމަ ވަރަށް ބޮޑަށް މަރުހަބާ ވެސް ކިޔުއްވާނެ ކަމަށާއި، ހިތް ހަމަނުޖެހިގެން އެއްޗެސް ބުނި ކަމަށް ވިޔަސް ފިޔަވަޅެއް ނާޅުއްވާނެ ކަމަށެވެ.
"އަޅުގަނޑާއި ދިމާލަށް އެއްވެސް މީހަކު އެއްޗެއް ބުނުމަކުން ފިޔަވަޅެއް ނާޅާނަން. އަޅުގަނޑު ބޭނުންވަނީ ރައްޔިތުންގެ އަޑު އަހަން. ކްރިޓިސައިޒް ވެސް ކުރަންވާނެ. އެއީ ޕޮސިޓިވް، ހެޔޮ ނިޔަތުގައި ކަންކަން ރަނގަޅު ކުރަން ވިދާޅުވާ އެއްޗެއް ނަމަ ވަރަށް ބޮޑަށް މަރުހަބާވެސް ކިޔާނަން. އަދި ހިތް ހަމަނުޖެހިގެން ވިދާޅުވާ އެއްޗެސް ވިޔަސް، ފިޔަވަޅެއް ނާޅާނަން."
ރައީސް ޑރ.މުއިއްޒު ވިދާޅުވިއެވެ.
ރައީސް ޑރ.މުއިއްޒު ވިދާޅުވީ، އެފަދައިން ދަންނަވަން ޖެހިވަޑައިގަތީ، އެމަނިކުފާނާއި ދިމާލަށް ކޮންމެވެސް އެއްޗެއް ސޯޝަލް މީޑިއާގައި ލިޔެގެން، ސަރުކާރު ކުންފުންޏަކުން ކޮންމެވެސް މުއައްޒަފަކަށް ފިޔަވަޅު އެޅިކަމަށް ނޫހަކުން ފެނުމާއި ގުޅިގެން ކަމަށެވެ. ވަގުތުން އެ ކުންފުނީގެ މެނޭޖިން ޑިރެކްޓަރ (އެމްޑީ) އަށް ގުޅާފައި ވެގެން އުޅޭ ގޮތް ސާފުކުރެއްވި ކަމަށް ވެސް ރައީސް ޑރ.މުއިއްޒު ވިދާޅުވިއެވެ.
ފިޔަވަޅުއެޅީ ހަމައެކަނި ރައީސް ޑރ.މުއިއްޒު އާއި ބެހޭ ގޮތުން ސޯޝަލް މީޑިއާގައި ލިޔެގެން ނޫން ކަމަށާއި އެއަށް ވުރެ މާ ސީރިއަސް ކަންތައްތަކެއް ހުރުމުން ކަމަށް އެކުންފުނީގެ އެމްޑީ ރައީސް ޑރ.މުއިއްޒު އަށް ދެންނެވި ކަމަށް އެމަނިކުފާނު ވިދާޅުވިއެވެ. އެކުންފުނިން މުއައްޒަފާއި މެދު ފިޔަވަޅު އަޅާފައިވަނީ، ކުންފުނީގައި އޮންނަ އުސޫލުތަކުގެ ތެރެއިން ކަމަށް އެމްޑީ ވިދާޅުވިކަމަށް ވެސް ރައީސް ޑރ.މުއިއްޒު ވިދާޅުވިއެވެ. އަދި ކަން ހިނގާ ދިޔަ ގޮތް ރައްޔިތުންނަށް ސާފުކޮށްދިނުމަށް އެމްޑި އަށް ދަންނަވާފައިވާނެ ކަމަށްވެސް ރައީސް ޑރ.މުއިއްޒު ވިދާޅުވިއެވެ.
"އެއީ އަޅުގަނޑު ބޭނުމެއްނޫން، އަޅުގަނޑާއި ދިމާލަށް އެއްޗެއް ބުނެގެން ފިޔަވަޅެއް އަޅާކަށް. އެކަހަލަ ކަންތައް ކުރާ މީހެއް ނޫން އަޅުގަނޑަކީ އެއްވެސް އިރެއްގައި. ގާނޫނާއި ގަވާއިދާއި އެއްގޮތަށް ހަމަ ކޮންމެ މީހަކަށް ކޮންމެ އެއްޗެއްވެސް ވިދާޅުވެވެން ވާނެ. އަދި ހިތްހަމަނުޖެހެންޏާ ހަމަ ބޭނުން ވާހަކައެއް ދެއްކެންވާނެ. އެކަމަކު އަޅުގަނޑެއް ފިޔަވަޅެއް ނާޅާނަން."
ރައީސް ޑރ.މުއިއްޒު ވިދާޅުވިއެވެ.
މިފެންނަނީ ވަރަށް ބޮޑަށް ހަގީގަތް އޮޅުވާލަން ބައެއް ފަރާތްތަކުން ބަޔަކު މަސައްކަތްކުރާތަން ކަމަށާއި ރައްޔިތުންނަން ހަގީގަތް އެނގި، ސާފުކޮށްދޭން ޖެހޭ ކަމަށް ރައީސް ޑރ.މުއިއްޒު ވިދާޅުވިއެވެ. އަދި މި ސަރުކާރުގެ ބޭފުޅުންގެ ފަރާތުންވެސް ފެންނާނީ ސާފުބަހުން ތެދު ބަހުން ވާހަކަ ދައްކާތަން ކަމަށް ވިދާޅުވެ ރައީސް ޑރ.މުއިއްޒު ވަނީ ސާފު ބަހުން ތެދު ބަހުން ދައްކާ ވާހަކަ ރައްޔިތުން ވިސްނުމަށްފަހު ޚިޔާރުކުރަން އެދިވަޑައިގެންފައެވެ.
Advertisement
This content is created and paid for by advertisers and does not involve Voice Journalists
