ޅ.އޮޅުވެލިފުށީގެ ސީއެމްބިއުލާންސް ޚިދުމަތަށް ހައްލެއް ހޯދަވައިދެއްވާނެކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސް ޑރ.މުއިއްޒު މިފަދައިން ވިދާޅުވީ، މިއަދު އެމަނިކުފާނު ޅ އަތޮޅަށް ކުރައްވާ ދަތުރުފުޅުގެ ތެރެއިން އެ އަތޮޅު އޮޅުވެލިފުށީގެ ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީ (އ.ތ.މ) އާ ބައްދަލުކުރައްވައި ދެއްކެވި ވާހަކަފުޅުގެ ތެރެއިންނެވެ.

ކުރެންދޫ ޙަބަޝީ ޕްރީސްކޫލުގައި ބޭއްވި މި ބައްދަލުވުމުގައި އޮޅުވެލިފުށީގެ ތަރައްޤީއަށް އެންމެ މުހިންމު ކަންކަމާ ގުޅޭގޮތުން ވަނީ މަޝްވަރާކޮށްފައެވެ. އެގޮތުން މި ބައްދަލުވުމުގައި އޮޅުވެލިފުށި ކައުންސިލުން ފާހަގަކުރި ކަންކަމުގެ ތެރޭގައި، ސީއެމްބިއުލަންސް ގެ ޚިދުމަތް މިހާރަށްވުރެ ފަސޭހައިން ލިބޭނެ މަގުފަހިކުރުން ހިމެނެއެވެ. މިކަމާއި ގުޅިގެން ރައީސް ޑރ.މުއިއްޒު ވަނީ ސީއެމްބިއުލާންސްއާ ގުޅޭގޮތުން ކައުންސިލުން ފާހަގަކުރެއްވި ކަންކަމަށް ހައްލެއް ހޯދަވައިދެއްވާނެކަމުގައި ވިދާޅުވެފައެވެ.

Advertisement

މީގެ އިތުރުންވެސް ކައުންސިލުން ވަނީ އެރަށުގެ ބަނދަރުގެ މަސައްކަތް ނުފެށި އޮތުމުގެ އެކަމުގެ ކަންބޮޑުވުން ރައީސް ޑރ.މުއިއްޒު އާއި ހިއްސާކޮށް، ފެނާއި ނަރުދަމާ ނިޒާމުގެ މަސައްކަތް ވީ އެންމެ އަވަހަށް ނިންމައިދިނުމަށް އެދި، ކަރަންޓުގެ ޙާލަތު ރަނގަޅުކުރަން ބޭނުންވާކަމަށް ވެސް ބުނެފައެވެ.

މި ބައްދަލުކުރެއްވުމުގައި އ.ތ.މ. ކޮމިޓީން، ކޮމިޓީގެ މެންބަރުންނަށް ރޯދައިގެ އިނާޔަތް ހަމަޖެހިފައި އޮތުމުގެ މުހިންމުކަމަށް އަލިއަޅުވާލުމުގެ އިތުރުން، ބަޖެޓުގެ ދަތިކަމާހުރެ އެކޮމިޓީގެ އިމާރާތުގެ މަރާމާތުގެ މަސައްކަތްތައް ކުރިޔަށް ނުގެންދެވޭތީ އެކަމުގެ ކަންބޮޑުވުން ވެސް ފާޅުކޮށްފައެވެ.

މިބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުން މެދުވެރިކުރައްވައި ރައީސް ޑރ.މުއިއްޒު ވަނީ  ކައުންސިލުން ފާހަގަކުރެއްވި މުހިންމު ކަންތައްތަކުގެ އެންމެ ފަހުގެ މަޢުލޫމާތު ކައުންސިލާއި ހިއްސާކުރައްވާފައެވެ.