ގެވެށި އަނިޔާއިން ރައްކާތެރިކުރުމުގެ އަމުރަށް އެދުމުގެ މަރުހަލާ ޕްރޮސެކިއުޓާ ޖެނެރަލް (ޕީޖީ) އޮފީހުން ފަސޭހަ ކޮށްދީފިއެވެ.
މިކަން ހާމަކުރައްވާ ޕީޖީ ހުސައިން ޝަމީމް، އެބޭފުޅާގެ ބްލޮގްގައި ވިދާޅުވީ، މިހާރު ޕީޖީ އޮފީހުގެ ވެބްސައިޓަށް، އެމީހެއްގެ އީފާސް ލޮގްއިން ބޭނުންކޮށްގެން ވަނުމުން، އެޕްލިކޭޝަންތަކުގެ މެނޫއިން "ގެވެށި އަނިޔާއިން ރައްކާތެރިކުރުމުގެ އަމުރަކަށް އެދުން" ކިޔާ ޓެބެއް އޮންނާނެ ކަމަށާއި، އެޓެބަށް ފިތާލުމުން އޮންލައިންކޮށް، ގެވެށި އަނިޔާއިން ރައްކާތެރިކުރުމުގެ އަމުރަށް އެދޭ ފޯމު ފުރޭނޭ ގޮތް ހަމަޖެހިފައި ހުންނާނެ ކަމަށެވެ.
ފޯމުގައި ފުރަންޖެހޭ އަސާސީ ބައިތައް ކަމަށްވާ ނަމާއި އެޑްރެހާއި އީމެއިލާއި އެނޫންވެސް އީފާސްގައި ހުރި މަޢުލޫމާތު ހުންނާނީ އޮޓޮމެޓިކުން ފުރާފައި ކަމަށާއި އިތުރަށް ފުރަންޖެހޭނީ އެމީހަކަށް ދިމާވި ހާދިސާއާބެހޭ މަޢުލޫމާތު ކަމަށް ވެސް ޕީޖީ ޝަމީމް ވިދާޅުވިއެވެ. އަދި ގެވެށި އަނިޔާލިބޭ ޙާލަތެއްގައި ހުރި މީހަކަށް، ރައްކާތެރި މާޙައުލަކަށްދެވުމުން މިފޯމު އޮންލައިންކޮށް ފުރައިލެވޭނެ ކަމަށާއި، އެމީހަކު އެ ފޯމު ފޮނުވަން ބޭނުންވާ ކޯޓުގެ ނަން ނެގުމުން، އެކޯޓެއްގެ އީމެއިލް އެޑްރެހަށް، އެކޯޓެއްގެ ލެޓަރ ހެޑުގައި، ފޯމު ފޮނުވައިލަދިނުމުގެ ޚިދުމަތް، ޕީޖީ އޮފީހުގެ އޮންލައިން ޕޯޓަލުން ދޭނެކަން ފާހަގަކުރައްވާ ޕީޖީ ވިދާޅުވީ އަނިޔާ ލިބޭ ޙާލަތެއްގައި ހުރި މީހާ، ފޯމު ހިފައިގެން ކޯޓު ދޮށަށް ހިނގަންޖެހުން މިހިސާބުން ނިމުމަކަށް އައީ ކަމުގައެވެ.
ޕީޖީ ޝަމީމް ވިދާޅުވީ އެފޯމު ކޯޓަށް ދާނީ ޕީޖީ އޮފީހުގެ އީމެއިލަކާއެކުގައި އެ އީމެއިލުގައި ޕީޖީ އޮފީހުގެ އޮންލައިން ޕޯޓަލަށް ލިބުނު ގެވެށި އަނިޔާއިން ރައްކާތެރިކުރުމުގެ އަމުރަށް އެދޭ ފޯމު، ފޮނުވި ކަމަށް އޮންނާނެ ކަމަށެވެ. މިއީ ޕީޖީ އޮފީހުން ދޭ އީމެއިލް ފޯވާޑުކޮށްދިނުމުގެ ޚިދުމަތެއް ކަމުން ފޯމުގައި ހުރި މަޢުލޫމާތެއްވެސް ޕީޖީ އޮފީހަކަށް ނޭނގޭނެކަމަށާއި، ފޯމުގައި ހުރި ކަންކަމަކީ ފޯމު ފުރާމީހާއާ ކޯޓާ ދޭތެރޭ ކުރާ މުޢާމަލާތެއް ކަމަށް ވެސް ބްލޮގްގައި ވެއެވެ.
މީގެ އިތުރުން، ކޯޓުން އެފޯމު ޕްރޮސެސްކުރުމުގެ ކަންތައް ފަސޭހަކޮށްދިނުމުގެ ގޮތުން، ޕީޖީ އޮފީހުގެ ގަވަމެންޓް ޕޯޓަލުގެ ތެރޭގައި ކޮންމެ ކޯޓަކަށް ހަދައިދީފައިވާ ލޮގިން އިން، އެކޯޓަކަށް ހުށައެޅިފައި ހުރި ހުރިހާ ގެވެށި އަނިޔާއިން ރައްކާތެރި ކުރުމުގެ ފޯމު ބަލައިގަނެ، ޕްރޮސެސް ކުރެވޭނެ ކަމަށް ވެސް ޕީޖީ ޝަމީމް ވިދާޅުވިއެވެ. އޮންލައިން ޕޯޓަލްގެ ތެރެއިން އެފޯމު ބަލައިގަތުމަށް، އަދި އިޞްލާޙުކުރުމަށް ނުވަތަ ބަލައިނުގަތުމަށް ނިންމައިފިނަމަ، އެކަން ސަބަބާއެކު ލިޔަންޖެހޭނެ ކަމަށާއި ކޯޓުން ނިންމާ ނިންމުމާއި އެނިންމުން ނިންމި ސަބަބު، އީމެއިލަކުންނާއި ފޯމު ހުށަހެޅި މީހާގެ އޮންލައިން ޕޯޓަލުގެ ތެރެއިން ފެންނަން ހުންނާނެ ކަމަށް ވެސް ޕީޖީ ވިދާޅުވިއެވެ. މި ހިދުމަތާއި އެކު އޮންލައިން ޕޯޓަލްގެ ތެރެއިން ފޯމު އިޞްލާޙުކޮށް އަލުން ހުށަހެޅުމުގެ ޚިދުމަތްވެސް ލިބޭނެއެވެ.
މި ނިޒާމް ގެ އިތުރުން ވެސް، ކުރީގައި އޮންނަ ނިޒާމްގައިވާ ގޮތަށް ކޯޓާ ހަމައަށް ފޯމު ލިބުމުން، ޕީޖީ އޮފީހުގެ ގަވަރމަންޓް ޕޯޓަލް ބޭނުން ނުކުރައްވަން ކޯޓުން ނިންމަވާ ޙާލަތުގައި، ފޯމު ހުށަހެޅި މީހާއާ ސީދާ ކޯޓުން މުޢާމަލާތު ކުރެވޭނެ ކަމަށް ވެސް ޕީޖީ ޝަމީމް ވިދާޅުވިއެވެ.
މިޚިދުމަތް މިމަހުގެ 7 ވަނަ ދުވަހު ފުވައްމުލަކު މެޖިސްޓްރޭޓް ކޯޓުގައި ތައާރަފްކޮށްފައިވާ ކަމަށް ޕީޖީ ޝަމީމް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
