އެއްގަމު އުޅަނދު ރަޖިސްޓަރީކޮށްދޭނެ އަދަދާއ،ި އުޅަނދު ބޭނުންކުރެވޭނެ މުއްދަތު ކަނޑައެޅުމުގެ ގަވައިދަށް އިސްލާހު ގެނެސްފިއެވެ.

އެ ގަވައިދަށް ގެނެސްފައިވާ އިސްލާހުގައި ވަނީ، ދިވެހިރާއްޖޭގައި މީހުން ދިރިއުޅޭ ރަށްރަށާއި ސިޓީތަކުގައި ނުވަތަ އެ ރަށްރަށާއި ސިޓީތަކުން ވަކި ޞަރަހައްދެއްގައި ބޭނުންކުރުމަށް އުޅަނދުތަކުގެ އަދަދު ކަނޑައަޅާނީ، އެސެސްމެންޓް ހެދުމަށްފަހު، ވެހިކަލްގެ ކެޕޭސިޓީއަކީ ކޮބައިކަން ދެނެގަނެ،އެ ރަށެއްގެ ނުވަތަ ސިޓީއެއްގެ ލޯކަލް ކައުންސިލުގެ އިދާރާއިން ކަމަށެވެ. 

އަދި އުޅަނދުތަކުގެ އަދަދު ކަނޑައެޅުމަށް ބޭނުންވާ ރަށާއި ސިޓީ ނުވަތަ ސަރަހައްދުގައި އެއްގަމު އުޅަނދު ދުއްވުމަށް ކަނޑައަޅާފައިވާ މަގުތަކުގެ ލޭނުތަކުގެ ޖުމްލަ ދިގުމިނާއި ޕާކުކުރުމަށް ކަނޑައަޅާފައިވާ ސަރަހައްދުގެ ބޮޑުމިނާއި އެ ސަރަހައްދުގައު ޕާކުކުރެވޭނެ އުޅަނދުގެ އަދަދު ކަނޑައެޅުމަށްޓަކައި ތަފުސީލީ އެސެސްމަންޓުތައް އުޅަނދުތަކުގެ އަދަދު ކަނޑައަޅާ ފަރާތުން ހަދަންވާނެ ކަމަށާ، އުޅަނދުތަކުގެ އަދަދު ކަނޑައެޅުމަށްޓަކައި ބަލަންޖެހޭ މިންގަނޑުތައް ކަނޑައަޅާނީ އެސެންމަންޓުތައް ހެދުމަށްފަހު އެ އެސެސްމަންޓްތަކުގެ ނަތީޖާއަށް ރިއާޔަތްކޮށް އެ ރަށެއްގެ ލޭން މީޓަރުގެ ޖުމްލަ ދިގުމިނާއި އެ ރަށަކުން ލިބޭ ޖުމްލަ ޕާކިން އޭރިއާ އެ ރަށެއްގެ ކައުންސިލަކުން ކަނޑައެޅުމަށް ފަހުގައި ކަމަށް އެ ގަވާއިދުގައި ވެއެވެ. 

އިސްލާހުގައި އިތުރަށް ބުނީ، ކަނޑައެޅޭ ވެހިކަލް ކެޕޭސިޓީ އެ ރަށެއްގެ ބިމުން މިންވަރަށާއި ޖާގައަށް ބޭނުންކުރާ އުޅަނދުތައް ބަލައި ކޮންމެ ފަސް އަހަރަކުން މުރާޖާ ކުރަންޖެހޭނެ ކަމަށާ އަދި އެ ރަށެއްގައި ބޭނުންކުރާ އުޅަނދު އެ ރަށަކަށް ކަނޑައަޅައި އިއުލާނުކުރާ ވެހިކަލް ކެޕޭސިޓީއަށްވުރެ އިތުރުނުވާކަން ކަށަވަރުކުރުމަށް އުޅަނދުތަކުގެ މައުލޫމާތު އަދާހަމަކޮށް ކައުންސިލްތަކުން ބަލަހަށްޓަން ޖެހޭނެ ކަމަށެވެ. 

ހަމައެހެންމެ، އުޅަނދުތަކުގެ އަދަދު ކަނޑައަޅާ ރަށް ނުވަތަ ސިޓީގައި ބޭނުންކުރުމަށް ރަޖިސްޓްރީކޮށްފައިވާ އުޅަނދުގެ އަދަދަކީ، ކަނޑައެޅި އަދަދުގެ ނިސްބަތަށް ވުރެ އިތުރު އަދަދެއް ނަމަ، އަދަދު ކަނޑައެޅި ނިސްބަތް އެ ގޮތުގައި ހިފެހެއްޓުމަށް ރީ-ރެޖިސްޓްރޭޝަން ޕްރޮސެސްއެއްގެ ދަށުން އުޅަނދުގެ އަދަދުގެ ތެރޭގައި ހިމެނޭ ނިޒާމެއް ކައުންސިލްތަކުން އެކުލަވާލައި ރީ-ރަޖިސްޓްރީ ކުރުމަށް އެކަށީގެންދާ ހަމަހަމަ ފުރުސަތާއި މުއްދަތު ދިނުމަށް އެ އިސްލާހުގައި ބުނެފައިވެއެވެ. 

މި ގަވާއިދު، މިމަހު 7 ވަނަ ދުވަހު ގެޒެޓު ކުރެވި އެދުވަހުން ފެށިގެން ގަވާއިދަށް ޢަމަލުކުރަން ވަނީ ފަށާފައެވެ.